പോലീസിനെ കണ്ട് ഓടി രക്ഷപെട്ട പ്രതി പിടിയിൽ

മലപ്പുറം: രണ്ട് ലക്ഷം രൂപയിലധികം വിലവരുന്ന നിരോധിത പുകയില ഉത്പന്നങ്ങള്‍ കാറിൽ നിന്ന് പിടികൂടിയ സംഭവത്തിൽ പോലീസിനെ വെട്ടിച്ച് കടന്ന് കളഞ്ഞ പ്രതി പിടിയിലായി. പുത്തനഴി സ്വദേശി തെങ്ങിന്‍തൊടി മുഹമ്മദ് ഫൈസലിനെ(45)യാണ് കരുവാരകുണ്ട് പോലീസ് അറസ്റ്റ് ചെയ്തത്. നിരോധിത പുകയില ഉത്പന്നങ്ങള്‍ കടത്തിയ കാറുമായാണ് ഇയാൾ ഒളിവിൽ പോയത്. സ്റ്റേഷന്‍ ഹൗസ് ഓഫീസര്‍ കെ.ടി. ശ്രീനിവാസനും സംഘവും ചേർന്നാണ് പ്രതിയെ പിടികൂടിയത്.

സമാനമായ കേസിൽ ഇയാളെ മുൻപും പോലീസ് അറസ്റ്റ് ചെയ്തിട്ടുണ്ട്. ഓപ്പറേഷന്‍ ഡി ഹണ്ടിന്റെ ഭാഗമായി കഴിഞ്ഞ ദിവസം കരുവാരകുണ്ട് പൊലീസ് നടത്തിയ പരിശോധനയില്‍ നാലായിരത്തോളം പാക്കറ്റ് നിരോധിത പുകയില ഉത്പന്നങ്ങള്‍ ഇയാളില്‍ നിന്നും കണ്ടെടുത്തിരുന്നു. കരുവാരകുണ്ട് പുത്തനഴി കവലയിലെ വീടിന് സമീപം നിര്‍ത്തിയിട്ട കാറില്‍ നിന്നാണ് ഇവ കണ്ടെത്തിയത്. കാറിൽ നിന്നും രണ്ട് ലക്ഷം രൂപയിലധികം വിലവരുന്ന നിരോധിത പുകയില ഉത്പന്നങ്ങളാണ് കണ്ടെത്തിയത്.

കെ ടി ശ്രീനിവാസന്‍റെ നേതൃത്വത്തിലുള്ള സംഘമാണ് കഴിഞ്ഞ ദിവസം ലഹരി ഉത്‌പന്നങ്ങള്‍ പിടികൂടിയത്. എസ്‌ഐ അരവിന്ദാക്ഷൻ, എഎസ്‌ഐ വിനോദ്, സീനിയർ സിവില്‍ പൊലീസ് ഓഫിസർമാരായ പ്രവീണ്‍ സനൂജ്, സുരേഷ് ബാബു, സിപിഒമാരായ രതീഷ് വെണ്ണീരിങ്ങല്‍, മനു പ്രസാദ്, അജിത്, സുരേഷ് ബാബു, രതീഷ് എന്നിവരാണ് അന്വേഷണ സംഘത്തിലുണ്ടായിരുന്നത്.