മഹാരാഷ്ട്രയിലെ ഉള്ളി കർഷകരും ദില്ലി ചലോ പ്രക്ഷോഭത്തിന്; കേന്ദ്ര നയങ്ങൾ വലയ്ക്കുന്നുവെന്ന് പരാതി

ന്യൂഡൽഹി: ഡൽഹിയിൽ നടക്കുന്ന കർഷകരുടെ ദില്ലി ചലോ പ്രതിഷേധത്തിൽ മഹാരാഷ്ട്രയിൽ നിന്നുള്ള ഉള്ളി കർഷകരും പങ്കെടുക്കുന്നു. രണ്ട് മാസമായി നിർത്തിവച്ചിരിക്കുന്ന ഉള്ളി കയറ്റുമതി പുനരാരംഭിക്കണമെന്നാവശ്യപ്പെട്ടാണ് കർഷകർ മാർച്ചിൽ പങ്കെടുക്കുന്നത്.

എല്ലാ വിളകൾക്കും മിനിമം താങ്ങുവില (എംഎസ്പി) ഉറപ്പാക്കുന്ന നിയമം പാസാക്കണമെന്ന് സംയുക്ത കിസാൻ മോർച്ചയുടെ നേതൃത്വത്തിൽ പഞ്ചാബിലെയും ഹരിയാനയിലെയും കർഷകർ ആവശ്യപ്പെട്ടു. ഇതിൽ പരോക്ഷമായി മഹാരാഷ്ട്രയിലെ കർഷകരുടെ ആവശ്യങ്ങളും ഉൾപ്പെടുന്നു. അതിനാൽ, മഹാരാഷ്ട്രയിലെ ഉള്ളി ഉത്പാദകരുടെ സംഘടന ദില്ലി ചലോ പ്രതിഷേധത്തിൽ പങ്കെടുക്കാൻ തീരുമാനിച്ചു.

പഞ്ചാബിലെയും ഹരിയാനയിലെയും കർഷകരുടെ സമരത്തെ തങ്ങൾ പൂർണമായി പിന്തുണയ്ക്കുന്നു, ഉടൻ തന്നെ മഹാരാഷ്ട്രയിലെ കർഷകരും പ്രക്ഷോഭത്തിൽ പങ്കെടുക്കാൻ ഡൽഹിയിലേക്ക് പോകുമെന്നും മഹാരാഷ്ട്ര സ്റ്റേറ്റ് ഉള്ളി പ്രൊഡ്യൂസേഴ്‌സ് ഫാർമേഴ്‌സ് അസോസിയേഷൻ സ്ഥാപക പ്രസിഡൻ്റ് ഭരത് ദിഘോലെ പറഞ്ഞു. അടുത്ത രണ്ട് മൂന്ന് ദിവസങ്ങൾക്കുള്ളിൽ മഹാരാഷ്ട്രയിലെ വിവിധ ജില്ലകളിലെ കർഷകർ പഞ്ചാബ് അതിർത്തിയിൽ ഈ പ്രതിഷേധത്തിൽ പങ്കുചേരുമെന്ന് അദ്ദേഹം അറിയിച്ചു.

‘കേന്ദ്ര സർക്കാരിൻ്റെ കർഷക വിരുദ്ധ നയങ്ങൾ കാരണം സംസ്ഥാനത്തെ കർഷകരും ദുരിതത്തിലാണ്. 2023 ഡിസംബറിൽ മോദി സർക്കാർ കയറ്റുമതി നിരോധിക്കാനുള്ള തീരുമാനമെടുത്തു. ഈ തീരുമാനം മൂലം കർഷകർ വലഞ്ഞു. ഉള്ളി, സോയാബീൻ, പരുത്തി, മുന്തിരി, മറ്റ് കാർഷിക ഉൽപ്പന്നങ്ങൾ എന്നിവയുടെ ഉയർന്ന വില കാരണം കർഷകർ നിലവിൽ ബുദ്ധിമുട്ടിലാണ്,’ ഡിഗോലെ പറഞ്ഞു.