കണ്ണൂർ: സിപിഎം വിപുലീകൃത കണ്ണൂർ ജില്ലാ കമ്മിറ്റി യോഗത്തിൽ മുൻ മുഖ്യമന്ത്രി പിണറായി വിജയനെതിരെ ശക്തമായ വിമർശനങ്ങൾ ഉയർന്നു. മകൾ വീണയുമായി ബന്ധപ്പെട്ട എക്‌സാലോജിക്‌സ് വിവാദവും തുടർന്നുണ്ടായ ഇഡി, വിജിലൻസ് അന്വേഷണങ്ങളും പാർട്ടിയുടെ പ്രതിച്ഛായക്ക് കോട്ടം വരുത്തിയെന്ന് ഒരു പാനൂർ പ്രതിനിധി യോഗത്തിൽ തുറന്നടിച്ചു. പിണറായിക്കും അദ്ദേഹത്തിന്റെ മകൾക്കുമെതിരായ ആരോപണങ്ങൾ പാർട്ടി ചർച്ച ചെയ്യണമെന്നും യോഗത്തിൽ ആവശ്യമുയർന്നു.
നേരത്തെ വി.എസ്. അച്യുതാനന്ദന്റെയും കോടിയേരി ബാലകൃഷ്ണന്റെയും മക്കൾക്കെതിരെ സമാനമായ ആരോപണങ്ങൾ ഉയർന്നപ്പോൾ പാർട്ടി അവരെ പരസ്യമായി സംരക്ഷിക്കാൻ തയ്യാറായിരുന്നില്ലെന്നും പ്രതിനിധികൾ ചൂണ്ടിക്കാട്ടി. എന്നാൽ പിണറായി വിജയന്റെ മകളെ പാർട്ടി പരസ്യമായി ന്യായീകരിക്കുന്നത് ഇരട്ടത്താപ്പാണെന്നും ഇത് അനുചിതമാണെന്നും യോഗത്തിൽ ചോദ്യമുയർന്നു. ഈ ചോദ്യം ചെയ്യൽ യോഗത്തിന്റെ അന്തരീക്ഷം ചൂടുപിടിപ്പിക്കുകയും നേതൃത്വത്തെ അസ്വസ്ഥമാക്കുകയും ചെയ്തു.
വിമർശനങ്ങളോട് കടുത്ത അമർഷവും ദേഷ്യവും പ്രകടിപ്പിച്ചാണ് പിണറായി വിജയൻ മറുപടി പ്രസംഗം നടത്തിയത്. താൻ സംസാരിച്ച രണ്ട് മണിക്കൂറിൽ ഒരു മണിക്കൂറിലേറെയും മകൾക്കെതിരെയുള്ള ആരോപണങ്ങളെ പ്രതിരോധിക്കാനും ന്യായീകരിക്കാനുമാണ് അദ്ദേഹം ഉപയോഗിച്ചത്. ലാവ്‌ലിൻ കേസ് മുതൽ നിലവിലെ വിജിലൻസ് അന്വേഷണം വരെയുള്ള കാര്യങ്ങൾ വിശദീകരിച്ച അദ്ദേഹം, തനിക്കെതിരായ വിമർശനങ്ങൾ ആസൂത്രിതമാണെന്നും പാനൂരിൽ ഇപ്പോഴും വിഭാഗീയത നിലനിൽക്കുന്നതിന്റെ തെളിവാണിതെന്നും ആരോപിച്ചു.