ആർട്ടിഫിഷ്യൽ ഇന്റലിജൻസിന്റെ അതിവേഗ വളർച്ചയും റോബോട്ടിക് സാങ്കേതികവിദ്യയും മനുഷ്യന്റെ തൊഴിലിടങ്ങളെ ബാധിക്കുന്ന സാഹചര്യം ഒഴിവാക്കണമെന്ന് ആവശ്യപ്പെട്ട് പോളണ്ടിൽ തികച്ചും വ്യത്യസ്തമായ പ്രതിഷേധം അരങ്ങേറി. വാർസോയിൽ ഡിജിറ്റൽ കാര്യ മന്ത്രാലയത്തിന് മുന്നിലാണ് മനുഷ്യരൂപത്തിലുള്ള റോബോട്ടുകളും റോബോട്ട് നായകളും ഉൾപ്പെടെയുള്ള യന്ത്രങ്ങൾ അണിനിരന്ന് സമരം നടത്തിയത്. ‘ഡെമോക്രാറ്റിസം’ എന്ന സംഘടനയുടെ നേതൃത്വത്തിൽ നടന്ന ഈ അപൂർവ്വ പ്രതിഷേധം അന്താരാഷ്ട്ര തലത്തിൽ തന്നെ വലിയ ശ്രദ്ധ നേടിയിരിക്കുകയാണ്.
റോബോട്ടുകൾ വട്ടത്തിൽ നീങ്ങിയും പതാകകൾ വീശിയും ഉച്ചഭാഷിണികളിലൂടെ മുദ്രാവാക്യങ്ങൾ മുഴക്കിയുമാണ് പ്രതിഷേധത്തിൽ പങ്കെടുത്തത്. സാങ്കേതികവിദ്യ ഇനി വിദൂരമായ ഭാവിയുടെ കാര്യമല്ലെന്നും, എഐയും റോബോട്ടിക്സും തൊഴിൽ വിപണിയിൽ ഉണ്ടാക്കുന്ന മാറ്റങ്ങളെക്കുറിച്ച് ഗൗരവമായ ചർച്ചകൾ നടക്കേണ്ടതുണ്ടെന്നും സംഘാടകർ വ്യക്തമാക്കി. വഴിയാത്രക്കാരുടെ ശ്രദ്ധ ആകർഷിക്കുന്നതിനൊപ്പം റോബോട്ടുകൾക്ക് ചെയ്യാൻ കഴിയുന്ന കാര്യങ്ങൾ നേരിട്ട് കാണിച്ചുകൊടുക്കുക കൂടിയായിരുന്നു ഈ വ്യത്യസ്തമായ സമരത്തിലൂടെ ലക്ഷ്യമിട്ടത്.
യൂറോപ്യൻ യൂണിയന്റെ എഐ നിയമങ്ങൾ കർശനമായി നടപ്പാക്കുന്നതിന്റെ ഭാഗമായി പോളണ്ടും പുതിയ നിയമനിർമ്മാണങ്ങൾ നടത്തിവരുന്ന വേളയിലാണ് ഈ സമരം നടന്നിരിക്കുന്നത്. എഐ സംവിധാനങ്ങളുടെ മേൽനോട്ടത്തിനായി പുതിയ കമ്മീഷൻ രൂപീകരിക്കുകയും ദേശീയ ചട്ടക്കൂട് തയ്യാറാക്കുകയും ചെയ്തിട്ടുണ്ട്. മനുഷ്യരെ മാറ്റിസ്ഥാപിക്കാനുള്ള എഐയുടെ സാധ്യതകൾ ഗൗരവമായി കണ്ട് തൊഴിലാളികളെ സംരക്ഷിക്കുന്നതിനുള്ള ശക്തമായ നിയമപരമായ നിയന്ത്രണങ്ങൾ വേണമെന്നാണ് സമരക്കാരുടെ പ്രധാന ആവശ്യം.