ഗുരുഗ്രാം, ഇന്ത്യ: സാംസങ് ഇലക്ട്രോണിക്സ് കഴിഞ്ഞ മാസം ജൂലൈ 22ന് ഗാലക്സി ഇസഡ് സീരീസിന്റെ എട്ടാം തലമുറ അവതരിപ്പിച്ചു. ഗാലക്സി ഇസഡ് ഫോൾഡ്8 അൾട്രാ, ഗാലക്സി ഇസഡ് ഫോൾഡ്8, ഗാലക്സി ഇസഡ് ഫ്ലിപ്പ്8 എന്നിവ ഉൾപ്പെടുന്ന പുതിയ ശ്രേണി, ഉപഭോക്താക്കളുടെ വർഷങ്ങളായുള്ള ഉപയോഗാനുഭവങ്ങളിൽ നിന്നുള്ള ഉൾക്കാഴ്ചകളും സാംസങ്ങിന്റെ എൻജിനീയറിങ് മികവും സംയോജിപ്പിച്ചാണ് വികസിപ്പിച്ചിരിക്കുന്നത്. ഫോൾഡബിൾ സ്മാർട്ട്ഫോൺ അനുഭവത്തെ കൂടുതൽ മുന്നോട്ട് കൊണ്ടുപോകുന്ന ഈ ശ്രേണി, വിപണിയിലെ ഏറ്റവും മികച്ച ഫോൾഡബിൾ അനുഭവം നൽകുന്നതിനുള്ള സാംസങ്ങിന്റെ ശ്രമത്തെ പ്രതിഫലിപ്പിക്കുന്നു. ഗാലക്സി ഇസഡ് സീരീസിന്റെ വികസനത്തിൽ ഉപഭോക്തൃ കേന്ദ്രീകൃത എൻജിനീയറിങ് സമീപനം എങ്ങനെ നിർണായകമായെന്ന് സാംസങ് ഇലക്ട്രോണിക്സിന്റെ മൊബൈൽ എക്സ്പീരിയൻസ് ബിസിനസിലെ മൊബൈൽ ആർ & ഡി ഓഫീസ് – ഹാർഡ്വെയർ വിഭാഗം എക്സിക്യൂട്ടീവ് വൈസ് പ്രസിഡന്റും സീനിയർ എക്സിക്യൂട്ടീവുമായ സൺഗൂൺ മൂൺ വിശദീകരിച്ചു.
“ആദ്യഘട്ടം മുതൽ തന്നെ ആളുകൾ അവരുടെ സ്മാർട്ട്ഫോണുകളുമായി ഇടപഴകുന്ന രീതിയെ പുനർനിർവചിക്കാനുള്ള അവസരമായാണ് ഞങ്ങൾ ഫോൾഡബിൾ സാങ്കേതികവിദ്യയെ കണ്ടത്. ഏഴ് തലമുറകളിലൂടെ ഉപഭോക്താക്കൾ അവരുടെ ഉപകരണങ്ങൾ എങ്ങനെ തുറക്കുന്നു, കൈയിൽ കൊണ്ടുനടക്കുന്നു, നിവർത്തുന്നു, ദൈനംദിന ആവശ്യങ്ങൾക്ക് എങ്ങനെ ആശ്രയിക്കുന്നു എന്നിവയിൽ നിന്ന് ഞങ്ങൾ ഏറെ പഠിച്ചു,” അദ്ദേഹം പറഞ്ഞു. ഉപഭോക്തൃ അനുഭവങ്ങളിൽ നിന്നുള്ള ഈ ഉൾക്കാഴ്ചകളാണ് കൂടുതൽ വലുതും ആഴത്തിലുള്ളതുമായ ഡിസ്പ്ലേകൾ, ദൃഢതയിൽ വിട്ടുവീഴ്ച ചെയ്യാതെ കൂടുതൽ കനം കുറഞ്ഞതും ഭാരം കുറഞ്ഞതുമായ ഡിസൈൻ, ഫോൾഡബിൾ രൂപകൽപ്പനയുടെ സവിശേഷതകൾ നിലനിർത്തിക്കൊണ്ടുള്ള ഉയർന്ന പ്രകടനം എന്നിവയിലേക്ക് എൻജിനീയറിങ് ശ്രദ്ധ കേന്ദ്രീകരിക്കാൻ സഹായിച്ചതെന്ന് അദ്ദേഹം വ്യക്തമാക്കി. പുതിയ ഗാലക്സി ഇസഡ് സീരീസിൽ എല്ലാ ഘടകങ്ങളെയും പരസ്പരം ബന്ധിപ്പിച്ച ഒരു സംവിധാനമായി കണക്കിലെടുത്താണ് എൻജിനീയറിങ് നടത്തിയിരിക്കുന്നത്. ഫോൺ കൂടുതൽ കനം കുറഞ്ഞതാക്കുന്നതിന് ഡിസ്പ്ലേ, ഹിഞ്ച്, ബാറ്ററി, തെർമൽ സിസ്റ്റം, ഇന്റേണൽ ആർക്കിടെക്ചർ എന്നിവ ഒരുമിച്ച് പുനർരൂപകൽപ്പന ചെയ്യേണ്ടിവന്നതായി മൂൺ പറഞ്ഞു.
പുതിയ ഗാലക്സി ഇസഡ് സീരീസിൽ അവതരിപ്പിച്ച ഫ്ലെക്സ് ടൈറ്റാനിയം സാങ്കേതികവിദ്യ ഡിസ്പ്ലേയെ കൂടുതൽ കനം കുറഞ്ഞതും ദൃഢവുമാക്കുന്നതിനൊപ്പം മടക്കിന്റെ ദൃശ്യത കുറയ്ക്കാനും സഹായിക്കുന്നു. എയറോസ്പേസ് പോലുള്ള മേഖലകളിൽ ശക്തിക്കും രൂപഭേദം ചെറുക്കുന്നതിനും ഉപയോഗിക്കുന്ന ടൈറ്റാനിയം, ഫോൾഡബിൾ ഡിസ്പ്ലേയ്ക്ക് അനുയോജ്യമായ മെറ്റീരിയലായി സാംസങ് തിരഞ്ഞെടുത്തു. ഡിസ്പ്ലേയ്ക്ക് താഴെയുള്ള ടൈറ്റാനിയം പ്ലേറ്റ്, വഴക്കവും ഘടനാപരമായ ശക്തിയും നൽകുന്ന കൃത്യമായി രൂപകൽപ്പന ചെയ്ത ലാറ്റിസ് ഘടന, കൂടാതെ ഡിസ്പ്ലേ പാനലിന് താഴെയുള്ള ടൈറ്റാനിയം അലോയ് ഫിലിം എന്നിവയാണ് ഫ്ലെക്സ് ടൈറ്റാനിയം എൻജിനീയറിങ്ങിന്റെ പ്രധാന ഘടകങ്ങൾ. ഇതിലൂടെ ഡിസ്പ്ലേ മൊഡ്യൂളിന്റെ കനം 10 ശതമാനം കുറയ്ക്കാൻ സാധിച്ചതായി സാംസങ് അറിയിച്ചു. ബാറ്ററി, തെർമൽ സിസ്റ്റം, ക്യാമറ എന്നിവയ്ക്കായി കൂടുതൽ ഇടം ലഭിക്കുന്നതിനൊപ്പം ഉപകരണം കൂടുതൽ കനം കുറഞ്ഞതും ഭാരം കുറഞ്ഞതുമാകാനും ഫ്ലാറ്റായ ഇമ്മേഴ്സീവ് ഡിസ്പ്ലേയും കുറഞ്ഞ ക്രീസ് ദൃശ്യതയും കൈവരിക്കാനും ഇത് സഹായിക്കുന്നു.
ദീർഘമായ ബാറ്ററി ലൈഫ്, വേഗത്തിലുള്ള ചാർജിങ്, കനം കുറഞ്ഞ രൂപകൽപ്പന എന്നിവ ലക്ഷ്യമിട്ട് ബാറ്ററി സംവിധാനവും സാംസങ് പുനർരൂപകൽപ്പന ചെയ്തിട്ടുണ്ട്. ഗാലക്സി ഇസഡ് ഫോൾഡ്8 അൾട്രായിൽ ഊർജസാന്ദ്രത വർധിപ്പിക്കുന്നതിനായി സിലിക്കൺ-കാർബൺ ആനോഡോടുകൂടിയ 5,000 എം.എ.എച്ച്. ബാറ്ററിയാണ് ഉപയോഗിക്കുന്നത്. ഗാലക്സി ഇസഡ് ഫോൾഡ്8 അൾട്രായിലും ഗാലക്സി ഇസഡ് ഫോൾഡ്8ലും ബാറ്ററി സംവിധാനത്തിലേക്ക് വൈദ്യുതി കൂടുതൽ കാര്യക്ഷമമായി വിതരണം ചെയ്യാൻ സഹായിക്കുന്ന ഡ്യുവൽ-പാത്ത് ചാർജിങ് ആർക്കിടെക്ചറാണ് ഉപയോഗിച്ചിരിക്കുന്നത്. ഗാലക്സി ഇസഡ് ഫോൾഡ്8 അൾട്രായിൽ 45 വാട്ട് ഫാസ്റ്റ് ചാർജിങ് പിന്തുണയുണ്ട്, 30 മിനിറ്റിനുള്ളിൽ 67 ശതമാനം വരെ ചാർജ് ചെയ്യാനാകുമെന്നും സാംസങ് അറിയിച്ചു.
ദൃഢത ഉറപ്പാക്കുന്നതിനായി പുതിയ ഗാലക്സി ഇസഡ് സീരീസിന് ഡ്രോപ്പ്, ആവർത്തിച്ചുള്ള ഫോൾഡിങ്, മർദ്ദം, ഈർപ്പം, പൊടി തുടങ്ങിയ യഥാർഥ ഉപയോഗ സാഹചര്യങ്ങൾ ഉൾപ്പെടുത്തി 100ലധികം വിശ്വാസ്യതാ പരിശോധനകളും സാംസങ് നടത്തിയിട്ടുണ്ട്. വർഷങ്ങളോളം ദൈനംദിന ഉപയോഗത്തെ നേരിടാൻ ഫോൾഡബിൾ ഉപകരണങ്ങൾക്ക് കഴിയുമെന്ന് ഉറപ്പാക്കുകയാണ് ഈ പരിശോധനകളുടെ ലക്ഷ്യം. “എല്ലാം ആരംഭിക്കുന്നത് ഉപഭോക്താവിൽ നിന്നാണ്. ഏഴ് തലമുറകളിലൂടെ ഉപഭോക്തൃ ഉൾക്കാഴ്ചകളെ മെറ്റീരിയലുകളിലും ഘടകങ്ങളിലും മൊത്തത്തിലുള്ള ഉപകരണ അനുഭവത്തിലുമുള്ള നവീകരണങ്ങളാക്കി മാറ്റുകയാണ് ഞങ്ങൾ ചെയ്തത്,” മൂൺ പറഞ്ഞു. ഫ്ലെക്സ് ടൈറ്റാനിയം, നൂതന ബാറ്ററി സാങ്കേതികവിദ്യ, ദൃഢത, പ്രകടനം, കനം കുറഞ്ഞ രൂപകൽപ്പന എന്നിവയുടെ സംയോജനത്തിലൂടെ ഗാലക്സി ഇസഡ് സീരീസ് ഫോൾഡബിൾ സാങ്കേതികവിദ്യയുടെ പരിധികൾ കൂടുതൽ വിപുലീകരിക്കുകയാണെന്ന് സാംസങ് വ്യക്തമാക്കി.