കൊച്ചി: അമേരിക്കൻ തലസ്ഥാനമായ വാഷിംഗ്ടൺ ഡി.സിയിൽ നിന്ന് വെറും 25 മൈൽ അകലെയായി സ്ഥിതി ചെയ്യുന്ന ലൗഡൺ കൗണ്ടി, അമേരിക്കയുടെ വൈൻ കൺട്രി എന്നറിയപ്പെടുന്ന മനോഹരമായ വിനോദസഞ്ചാര കേന്ദ്രമാണ്. ലോകോത്തര വൈനറികൾ, ക്രാഫ്റ്റ് ബ്രൂവറികൾ, ഡിസ്റ്റിലറികൾ, സമ്പന്നമായ കാർഷിക പാരമ്പര്യം എന്നിവയ്ക്കൊപ്പം ഫാം-ടു-ടേബിൾ ഭക്ഷണ സംസ്കാരവും ലൗഡണിന്റെ പ്രത്യേകതയാണ്. ബ്ലൂ റിഡ്ജ് മലനിരകളുടെ താഴ്വരകൾക്കും പൊട്ടോമാക് നദിയുടെ തീരങ്ങൾക്കുമിടയിൽ സ്ഥിതി ചെയ്യുന്ന കൗണ്ടിയിൽ അമേരിക്കൻ വിപ്ലവത്തിന് മുൻപുള്ള കാലഘട്ടത്തിലെ മനോഹരമായ ഗ്രാമങ്ങളും ലോകത്തിന്റെ ഇന്റർനെറ്റ് സംവിധാനത്തെ പിന്തുണയ്ക്കുന്ന ഡാറ്റാ സെന്ററുകളുള്ള ആധുനിക ടെക് ഹബ്ബുകളും ഒരുമിച്ച് കാണാം. പ്രശസ്തമായ അപ്പലാച്ചിയൻ ട്രെയിൽ, കുതിരയോട്ടം, പോളോ, ഷോ ജമ്പിങ്, ഫോക്സ് ഹണ്ടിങ് തുടങ്ങിയവയും ലൗഡണിനെ ശ്രദ്ധേയമായ വിനോദസഞ്ചാര കേന്ദ്രമാക്കുന്നു.
അമേരിക്കയുടെ പുതിയ നാപ
ഡിസി വൈൻ കൺട്രി എന്നറിയപ്പെടുന്ന ലൗഡൺ, അമേരിക്കയിലെ ശ്രദ്ധേയമായ പുതിയ വൈൻ മേഖലയായി മാറുകയാണ്. ആദ്യ വൈൻ ഉൽപ്പാദനം ആരംഭിച്ച് നാല് പതിറ്റാണ്ടുകൾ പിന്നിടുമ്പോൾ കൗണ്ടിയിൽ ഇപ്പോൾ 50-ലേറെ വൈനറികളുണ്ട്. വൈവിധ്യമാർന്ന ഭൂപ്രകൃതിയും മികച്ച നീർവാർച്ചയുള്ള മണ്ണും വിവിധയിനം മുന്തിരികൾക്കും വൈൻ ശൈലികൾക്കും അനുയോജ്യമായ സാഹചര്യം ഒരുക്കുന്നു. ഫ്രഞ്ച് ശൈലിയിലുള്ള ബോർഡോ, ഇറ്റലിയിലെ പീഡ്മോണ്ടിനെ ഓർമിപ്പിക്കുന്ന നെബിയോളോ, സ്പാനിഷ് ശൈലിയിലുള്ള അൽബാരിനോ, വിർജീനിയയുടെ സവിശേഷ മുന്തിരിയായ നോർട്ടൺ തുടങ്ങിയവ ഇവിടെ ഉൽപ്പാദിപ്പിക്കുന്നു.
ദേശീയ തലത്തിലുള്ള അംഗീകാരങ്ങളും പുരസ്കാരങ്ങളും നേടുന്നതിനൊപ്പം, 1970-കളിലെ നാപയെ ഓർമിപ്പിക്കുന്ന സൗഹൃദവും ആത്മാർത്ഥതയും ഇവിടുത്തെ വൈൻ സംസ്കാരത്തിനുണ്ട്. വൈൻ നിർമ്മാതാക്കൾ തന്നെ സന്ദർശകരോടൊപ്പം വൈൻ ടേസ്റ്റിങ്ങിൽ പങ്കെടുക്കുകയും സമീപത്തെ വൈനറികളും മികച്ച വിന്റേജുകളും പരിചയപ്പെടുത്തുകയും ചെയ്യുന്നു. വൈൻ ടോക്കുകൾ, ഫുഡ്-വൈൻ പെയറിങ്ങുകൾ, മുന്തിരിത്തോട്ടങ്ങളിലെ പിക്നിക്കുകൾ, സംഗീത പരിപാടികൾ, പ്രാദേശിക വൈൻ ടൂർ കമ്പനികൾ ഒരുക്കുന്ന പ്രത്യേക അനുഭവങ്ങൾ എന്നിവയും സന്ദർശകരെ ആകർഷിക്കുന്നു. കൗണ്ടിയിൽ തന്നെ ഡുള്ളസ് ഇന്റർനാഷണൽ എയർപോർട്ട് ഉള്ളതിനാൽ വിമാനമിറങ്ങിയ ഉടൻ തന്നെ വൈൻ അനുഭവത്തിലേക്ക് കടക്കാനും സാധിക്കും.
ലീസ്ബർഗിന്റെ പുനരുജ്ജീവനം: വിർജീനിയയിലെ ഏറ്റവും കൂൾ ടൗൺ
അമേരിക്ക 250-ാം ജന്മവാർഷികം ആഘോഷിക്കുന്ന വേളയിൽ ലൗഡൺ കൗണ്ടിയുടെ ആസ്ഥാനമായ ലീസ്ബർഗും ശ്രദ്ധേയമായ മാറ്റത്തിന്റെ ഘട്ടത്തിലാണ്. 1758-ൽ സ്ഥാപിതമായ ഈ പട്ടണത്തിലെ കൊളോണിയൽ കാലഘട്ടത്തിലെ ചുവന്ന ഇഷ്ടിക കെട്ടിടങ്ങളും ഫെഡറൽ കാലഘട്ടത്തിലെ ബ്രൗൺസ്റ്റോൺ കെട്ടിടങ്ങളും മരങ്ങൾ നിറഞ്ഞ തെരുവുകളും ന്യൂയോർക്കിലെ വെസ്റ്റ് വില്ലേജിനെ ഓർമിപ്പിക്കുന്നു.
റാൽഫ് ലോറൻ ശൈലിയിൽ ഒരുക്കിയ ഹോട്ടൽ ബർഗ്, റൂഫ്ടോപ്പ് ബാറും മികച്ച ഭക്ഷണശാലയായ ദ ഹണ്ടോൺ-ഉം ഉൾപ്പെടെ 2025 അവസാനത്തോടെ ചരിത്രപ്രധാനമായ നഗരമധ്യത്തിൽ പ്രവർത്തനം ആരംഭിച്ചു. മിഷെലിൻ അംഗീകാരം നേടിയ ഷെഫിന്റെ നേതൃത്വത്തിലാണ് റെസ്റ്റോറന്റ് പ്രവർത്തിക്കുന്നത്. മൂന്ന് വാതിലുകൾക്കപ്പുറം, 19-ാം നൂറ്റാണ്ടിലെ നവീകരിച്ച കെട്ടിടത്തിൽ ഷട്ടേഴ്സ് ഓൺ കിംഗ് എന്ന പുതിയ റെസ്റ്റോറന്റും പ്രവർത്തനം ആരംഭിച്ചിട്ടുണ്ട്. തുറന്ന ഇഷ്ടിക ചുവരുകൾ, ലെതർ സോഫകൾ, കല്ലുകൊണ്ടുള്ള ഫയർപ്ലേസുകൾ എന്നിവയുള്ള ഇവിടെ ആധുനിക അമേരിക്കൻ വിഭവങ്ങളാണ് ഒരുക്കുന്നത്.
മാർഷൽ പ്ലാനിന്റെ ശിൽപിയായ ജനറൽ ജോർജ് സി. മാർഷലിന്റെ വീടും റെസ്റ്റോറന്റിന് സമീപത്താണ്. ആർട്ടിസനൽ കോഫി ഷോപ്പുകൾ, കോക്ക്ടെയിൽ ലോഞ്ചുകൾ, പബ്ലിക് ആർട്ട് ഇൻസ്റ്റലേഷനുകൾ, മ്യൂസിയങ്ങൾ, ഗാലറികൾ, സ്വതന്ത്ര ബൂട്ടിക്കുകൾ എന്നിവയും ലീസ്ബർഗിന്റെ ആകർഷണങ്ങളാണ്.
ചരിത്രം നിറഞ്ഞ ലൗഡൺ
അമേരിക്കയുടെ 250-ാം വാർഷികാഘോഷങ്ങളുടെ ഭാഗമായി ലൗഡണിലെ ഏഴ് മ്യൂസിയങ്ങളും സാംസ്കാരിക കേന്ദ്രങ്ങളും ചേർന്ന് ലൗഡൺ ഹെറിറ്റേജ് പാസ് അവതരിപ്പിച്ചിട്ടുണ്ട്. മേഖലയിലെ ചരിത്രപ്രാധാന്യമുള്ള നിരവധി കേന്ദ്രങ്ങളിലേക്ക് കുറഞ്ഞ നിരക്കിൽ പ്രവേശനം ലഭ്യമാക്കുന്ന മൾട്ടി-സൈറ്റ് ടിക്കറ്റാണിത്.
മുൻ വിർജീനിയ ഗവർണറുടെ എസ്റ്റേറ്റും കുതിരയോട്ട കേന്ദ്രവുമായ മോർവൻ പാർക്ക്,1804-ൽ നിർമ്മിച്ച ഗ്രീക്ക് റിവൈവൽ ശൈലിയിലുള്ള മാൻഷനും 1798-ൽ സ്ഥാപിതമായ ഇംഗ്ലീഷ് ടെറസ്ഡ് ഗാർഡനുമുള്ള ഓറ്റ്ലാൻഡ്സ് ഹിസ്റ്റോറിക് ഹൗസ് ആൻഡ് ഗാർഡൻസ്, പുനരുദ്ധരിച്ച ചരിത്രപ്രസിദ്ധമായ ഗ്രിസ്റ്റ് മില്ലായ ആൽഡി മിൽ ഹിസ്റ്റോറിക് പാർക്ക് എന്നിവ ഹെറിറ്റേജ് പാസിൽ ഉൾപ്പെടുന്നു.
അമേരിക്കൻ പ്രസിഡന്റ് പദവി വഹിച്ച ശേഷം ഓക്ക് ഹില്ലിൽ താമസിച്ചിരുന്ന ജെയിംസ് മൺറോ ആൽഡി മിൽ സന്ദർശിച്ചിരുന്നതായും ചരിത്രരേഖകളുണ്ട്. കൂടാതെ 1728-ൽ സ്ഥാപിതമായ റെഡ് ഫോക്സ് ഇൻ ആൻഡ് ടാവേൺ ലൗഡണിലെ പ്രധാന ചരിത്രകേന്ദ്രങ്ങളിലൊന്നാണ്. ജാക്കി കെന്നഡി, എലിസബത്ത് ടെയ്ലർ, റോബർട്ട് ഡുവാൽ തുടങ്ങിയ പ്രമുഖർക്ക് പുറമെ ജോർജ് വാഷിംഗ്ടണും ഇവിടെ എത്തിയിട്ടുണ്ട്.
ലോകത്തിന്റെ രുചികൾ ഒരിടത്ത്
ലോകത്തിന്റെ വിവിധ ഭാഗങ്ങളിൽ നിന്നുള്ള രുചികളും പാചകപാരമ്പര്യങ്ങളും സംഗമിക്കുന്ന ഒരു ഭക്ഷണകേന്ദ്രമായും ലൗഡൺ മാറിയിട്ടുണ്ട്. ജാലിസ്കോ വേരുകളുള്ള കുടുംബം നടത്തുന്ന മഞ്ച കോസിന, എൽ പിറ്റായോ തുടങ്ങിയ പുതിയ മെക്സിക്കൻ റെസ്റ്റോറന്റുകൾ ലൗഡണിലെ ലാറ്റിൻ ഭക്ഷണരംഗത്തിന് പുതിയ മാനം നൽകുന്നു.
ആഷ്ബേണിലെ ഫാം ആൻഡ് ഫോർക്ക കിച്ചൻ ൽ, ജോസ് ആൻഡ്രസിനൊപ്പം പ്രവർത്തിച്ചിട്ടുള്ള ഷെഫ്-ഓണർ ജോർജ് ചികാസ് സ്പാനിഷ് തപാസ് പ്രചോദനമാക്കിയ സീസണൽ ഫാം-ടു-ടേബിൾ വിഭവങ്ങൾ ഒരുക്കുന്നു.
ഇന്ത്യൻ ഭക്ഷണവും ഇവിടെ കൂടുതൽ ശ്രദ്ധ നേടുകയാണ്. പ്രാദേശിക ശൃംഖലയായ ബിരിയാണി ഗ്രിൽ മൂന്ന് ലൗഡൺ കേന്ദ്രങ്ങളിൽ മല്ലിയില ചേർത്ത ഹരിയാലി ചിക്കൻ, ഗോവൻ ശൈലിയിലുള്ള ചെമ്മീൻ പുലാവ് തുടങ്ങിയ വിഭവങ്ങൾ നൽകുന്നു. ഷെഫ് രൂപ വിരയുടെ ദ സിഗ്നേച്ചർ ആഴ്ചയിൽ ഒരിക്കൽ ആധികാരിക ഗുജറാത്തി വെജിറ്റേറിയൻ താളി ഒരുക്കുന്നു.
തായ്, ജാപ്പനീസ്, കൊറിയൻ വിഭവങ്ങൾക്ക് പുറമെ ലീസ്ബർഗിലെ ഏഷ്യൻ നൂഡിൽസ് ഹൗസ് വിയറ്റ്നാമീസ് ബോട്ട് സൂപ്പ്, ബ്രിസ്കറ്റ് ഫോ തുടങ്ങിയ വിഭവങ്ങളിലൂടെ ശ്രദ്ധ നേടുന്നു. ഫോർഡ്സ് ഫിഷ് ഷാക്കും കിംഗ് സ്ട്രീറ്റ് ഓയ്സ്റ്റർ ബാറും സമുദ്രവിഭവങ്ങൾക്ക് പ്രശസ്തമാണ്. അതേസമയം ഗിയാക്കോമോ ഗാലിംബെർട്ടിയുടെ പുതിയ ജിവിനോ വൈൻ ബാർ മെഡിറ്ററേനിയൻ ശൈലിയിലുള്ള ബ്രാൻസിനോയ്ക്ക് പേരുകേട്ടതാണ്. ഫ്രഞ്ച് ബിസ്ട്രോ വിഭവങ്ങൾ ആഗ്രഹിക്കുന്നവർക്ക് സ്റ്റർലിംഗിലെ ബ്രസ്സറി റോയൽ മികച്ച തിരഞ്ഞെടുപ്പാണ്.
പ്രകൃതിയുടെ മടിത്തട്ടിൽ
കിഴക്കൻ ലൗഡൺ ആധുനിക നഗരജീവിതത്തിന്റെ കേന്ദ്രമാണെങ്കിൽ, പടിഞ്ഞാറൻ ലൗഡൺ പ്രകൃതിസ്നേഹികളുടെ പറുദീസയാണ്. പച്ചപ്പ് നിറഞ്ഞ കൃഷിയിടങ്ങൾ, മലനിരകൾ, ഗ്രാവൽ റോഡുകൾ, ഹൈക്കിങ് ട്രെയിലുകൾ, സൈക്കിൾ പാതകൾ, കല്ലുകൊണ്ടുള്ള വേലികളുള്ള ഗ്രാമീണ പാതകൾ എന്നിവ ഈ പ്രദേശത്തിന്റെ സവിശേഷതയാണ്.
ഫോർബ്സ് ഫൈവ്-സ്റ്റാർ അംഗീകാരമുള്ള സലമാൻഡർ മിഡിൽബർഗ് റിസോർട്ടിലെ വനമേഖലയിലൂടെ സിപ്പ്ലൈൻ ചെയ്യുന്നതുമുതൽ 45 മൈൽ നീളുന്ന വാഷിംഗ്ടൺ ആൻഡ് ഓൾഡ് ഡൊമിനിയൻ റെയിൽറോഡ് റീജിയണൽ പാർക്കിലൂടെ സൈക്കിൾ സവാരി നടത്തുന്നതുവരെ നിരവധി അനുഭവങ്ങൾ ഇവിടെ ലഭ്യമാണ്. ലോകപ്രശസ്തമായ അപ്പലാച്ചിയൻ ട്രെയിലിലെ ലൗഡൺ ഭാഗത്തുള്ള 13 മൈൽ നീളമുള്ള “ദ റോളർകോസ്റ്റർ” ഹൈക്കിങ് ട്രെയിലും സാഹസികരെ ആകർഷിക്കുന്നു.
പൊട്ടോമാക് നദിയിൽ കയാക്കിങ്, സ്റ്റാൻഡ്-അപ്പ് പാഡിൽബോർഡിങ്, ഫ്ലൈ-ഫിഷിങ് എന്നിവയും ആസ്വദിക്കാം. ഗോൾഫ് പ്രേമികൾക്കായി പൊട്ടോമാക് നദിക്ക് സമീപമുള്ള അൽഗോങ്കിയൻ ഗോൾഫ് കോഴ്സ് 18 ഹോളുകളുമായി ഒരുക്കിയിട്ടുണ്ട്. റോബർട്ട് ട്രെന്റ് ജോൺസും ഗ്രെഗ് നോർമനും രൂപകൽപ്പന ചെയ്ത കോഴ്സുകളിലായി 45 ഹോളുകളുള്ള ലാൻസ്ഡൗൺ റിസോർട്ട് ആണ് മറ്റൊരു പ്രധാന ആകർഷണം.