നഗരത്തെ ഞെട്ടിച്ചുകൊണ്ട് തിരുവനന്തപുരം എസ്എടി ആശുപത്രിയിലെ ശുചിമുറിയിൽ ആറുമാസം വളർച്ചയെത്തിയ ഭ്രൂണം ഉപേക്ഷിക്കപ്പെട്ട നിലയിൽ കണ്ടെത്തി. തിരുവല്ലം സ്വദേശിനിയായ ഇരുപതുകാരിയായ അവിവാഹിതയായ യുവതിയാണ് പ്രസവത്തിനു പിന്നാലെ ഭ്രൂണം ശുചിമുറിയിലെ ക്ലോസറ്റിൽ തള്ളിയത്. സംഭവത്തിൽ മെഡിക്കൽ കോളേജ് പൊലീസ് അന്വേഷണം ഊർജിതമാക്കിയിട്ടുണ്ട്.
ഓഗസ്റ്റ് 2 രാത്രി 7.30 ഓടെയാണ് അമിത രക്തസ്രാവത്തെ തുടർന്ന് യുവതി ചികിത്സയ്ക്കായി ആശുപത്രിയിലെത്തിയത്. പ്രാഥമിക പരിശോധനയിൽ തന്നെ യുവതി ഗർഭിണിയായിരുന്നിരിക്കാമെന്ന സംശയം ഡോക്ടർമാരിൽ ഉയർന്നിരുന്നു. തുടർന്ന് നടത്തിയ വിശദമായ അന്വേഷണത്തിലാണ് യുവതി അവിവാഹിതയാണെന്ന വിവരം പുറത്തുവന്നത്.
ഇന്റർനെറ്റിൽനിന്ന് ലഭിച്ച വിവരങ്ങളുടെയും നിർദ്ദേശങ്ങളുടെയും അടിസ്ഥാനത്തിൽ ഗർഭഛിദ്രത്തിനുള്ള മരുന്ന് കഴിച്ചതാണ് യുവതിക്ക് കനത്ത രക്തസ്രാവം ഉണ്ടാകാൻ കാരണമായതെന്ന് ഡോക്ടർമാർ കണ്ടെത്തി. തുടർന്ന് പ്രാഥമിക ആവശ്യത്തിനെന്ന പേരിൽ ആശുപത്രിയിലെ ശുചിമുറിയിൽ കയറിയ യുവതി അവിടെവച്ച് പ്രസവിക്കുകയായിരുന്നു. പ്രസവത്തിനു ശേഷം ഭ്രൂണം ക്ലോസറ്റിൽ ഉപേക്ഷിക്കുകയായിരുന്നുവെന്ന് ഇവർ സമ്മതിച്ചു.
യുവതിയുടെ വസ്ത്രങ്ങളിലെ രക്തക്കറയും പെരുമാറ്റത്തിലെ അസ്വാഭാവികതയും കണ്ട് ജീവനക്കാർക്ക് സംശയം തോന്നിയതോടെയാണ് വിവരം പുറത്തറിയുന്നത്. ആശുപത്രി അധികൃതരുടെ അറിയിപ്പിനെ തുടർന്ന് മെഡിക്കൽ കോളേജ് പൊലീസ് സംഘവും അഗ്നിരക്ഷാസേനയും ഉടൻ തന്നെ സ്ഥലത്തെത്തി. തുടർന്ന് നടത്തിയ സങ്കീർണ്ണമായ പരിശോധനയിലും രക്ഷാപ്രവർത്തനത്തിലും ശുചിമുറിയുടെ ടാങ്ക് പൂർണ്ണമായി പൊളിച്ചാണ് ആറുമാസം വളർച്ചയെത്തിയ ഭ്രൂണം പുറത്തെടുത്തത്. നിലവിൽ പൊലീസിന്റെ കസ്റ്റഡിയിലുള്ള യുവതിക്കെതിരെ നിയമനടപടികൾ പുരോഗമിക്കുകയാണ്.