ഇ-കോമേഴ്സ് ഭീമനായ ഫ്ലിപ്പ്കാർട്ട് ഭക്ഷണവിതരണ സേവന രംഗത്തേക്ക് ചുവടുവെക്കുന്നു. അടുത്ത ഏതാനും ആഴ്ചകൾക്കുള്ളിൽ തന്നെ ഫുഡ് ഡെലിവറി സേവനം ആരംഭിക്കുമെന്ന് ഫ്ലിപ്പ്കാർട്ട് ഗ്രൂപ്പ് സി.ഇ.ഒ കല്യാൺ കൃഷ്ണമൂർത്തി അറിയിച്ചു. തുടക്കത്തിൽ തിരഞ്ഞെടുക്കപ്പെട്ട ഉപഭോക്താക്കൾക്കിടയിൽ പരീക്ഷണാടിസ്ഥാനത്തിലാണ് സേവനം ലഭ്യമാക്കുക. ഉപഭോക്താക്കളുടെ പ്രതികരണങ്ങൾ വിലയിരുത്തിയ ശേഷമായിരിക്കും ഇത് രാജ്യമൊട്ടാകെ വ്യാപിപ്പിക്കുക.
ഫുഡ് ഡെലിവറിക്കായി പുതിയ പ്രത്യേക ആപ്പ് പുറത്തിറക്കുന്നതിനൊപ്പം നിലവിലുള്ള ഫ്ലിപ്പ്കാർട്ട് ആപ്പിലൂടെയും ഈ സേവനം ലഭ്യമാക്കും. കേന്ദ്ര സർക്കാരിന്റെ കീഴിലുള്ള ഓപ്പൺ നെറ്റ്വർക്ക് ഫോർ ഡിജിറ്റൽ കൊമേഴ്സ് ശൃംഖലയുമായി സഹകരിച്ചായിരിക്കും ഫ്ലിപ്പ്കാർട്ട് പ്രവർത്തിക്കുക എന്നാണ് സൂചനകൾ. കുറഞ്ഞ നിരക്കിനേക്കാൾ വേഗത്തിലുള്ള വിതരണം, വിപുലമായ റെസ്റ്റോറന്റുകളുടെ ലിസ്റ്റിംഗ്, മികച്ച ഉപഭോക്തൃ സേവനം എന്നിവ ഉറപ്പാക്കാനാണ് കമ്പനി ലക്ഷ്യമിടുന്നത്. ഏത് നഗരത്തിലാണ് സേവനം ആദ്യം ആരംഭിക്കുകയെന്നോ സേവനത്തിന് നൽകുന്ന പേരെന്തെന്നോ കമ്പനി ഇതുവരെ വെളിപ്പെടുത്തിയിട്ടില്ല. നിലവിൽ സൊമാറ്റോയും സ്വിഗ്ഗിയും ആധിപത്യം പുലർത്തുന്ന ഇന്ത്യൻ ഫുഡ് ഡെലിവറി വിപണിയിലേക്ക് ഫ്ലിപ്പ്കാർട്ട് കൂടി എത്തുന്നതോടെ മത്സരം കൂടുതൽ കടുക്കും.