കഴിഞ്ഞ ദിവസം നടന്ന ഇന്ത്യ-ഇംഗ്ലണ്ട് ടി20 മത്സരത്തിലൂടെ ക്രിക്കറ്റ് ലോകത്തിന്റെ ശ്രദ്ധാകേന്ദ്രമായി മാറിയ താരമാണ് വൈഭവ് സൂര്യവംശി. ഇപ്പോഴിതാ, ഇന്ത്യൻ കൗമാര താരത്തിന്റെ ബാറ്റിംഗ് മികവിനെ വാനോളം പുകഴ്ത്തി രംഗത്തെത്തിയിരിക്കുകയാണ് ഇംഗ്ലീഷ് താരം ജേക്കബ് ബേഥൽ. വൈഭവിനൊപ്പം കളിക്കാൻ സാധിക്കുന്നത് വിചിത്രമായ അനുഭവമാണെന്നാണ് ബേഥലിന്റെ പ്രതികരണം.
ബേഥലിന്റെ വാക്കുകൾ
“വൈഭവ് സൂര്യവംശി എന്നേക്കാൾ ഏഴ് വയസിന് ഇളയതാണ്. ഇത്രയും പ്രായം കുറഞ്ഞ ഒരാൾക്കൊപ്പം കളിക്കുന്നു എന്നത് ശരിക്കും വിചിത്രമായിട്ടാണ് തോന്നുന്നത്. ഇവിടെ വച്ച് മാത്രമല്ല, ഇന്ത്യയിൽ വെച്ചും അവന്റെ ബാറ്റിംഗ് ഞാൻ കണ്ടിട്ടുണ്ട്. അവനൊരു അവിശ്വസനീയ പ്രതിഭയാണ്. അവന്റെ ബാറ്റ് സ്വിങ് ചെയ്യുന്ന രീതി വളരെ മനോഹരമാണ്,” ജേക്കബ് ബേഥൽ വ്യക്തമാക്കി.
സച്ചിന്റെ റെക്കോർഡ് പഴങ്കഥയാക്കി വൈഭവ്
പതിനാറാം വയസ്സിൽ ഇന്ത്യൻ സീനിയർ ടീമിൽ അരങ്ങേറ്റം കുറിച്ചുകൊണ്ട് ക്രിക്കറ്റ് ഇതിഹാസം സച്ചിൻ ടെണ്ടുൽക്കറുടെ റെക്കോർഡാണ് ഈ യുവതാരം തിരുത്തിയെഴുതിയത്. തന്റെ അരങ്ങേറ്റ മത്സരത്തിൽ പത്ത് പന്തിൽ നിന്ന് പതിനാല് റൺസ് നേടിയ താരം, ബാറ്റർമാരുടെ പേടിസ്വപ്നമായ ജോഫ്ര ആർച്ചറുടെ പന്ത് സിക്സർ പറത്തിയാണ് തന്റെ വരവറിയിച്ചത്. മത്സരത്തിൽ രണ്ട് സിക്സറുകളാണ് വൈഭവ് തന്റെ അക്കൗണ്ടിലാക്കിയത്. വരാനിരിക്കുന്ന കാലത്തെ ഇന്ത്യൻ ക്രിക്കറ്റിന്റെ വലിയ പ്രതീക്ഷയായാണ് വൈഭവ് സൂര്യവംശിയെ ആരാധകർ കാണുന്നത്.