ഫിഫ ലോകകപ്പിൽ ബ്രസീൽ നോക്കൗട്ട് റൗണ്ടിലേക്ക് യോഗ്യത നേടിയതിന് പിന്നാലെ അർജന്റീനൻ ഇതിഹാസം ലിയോണൽ മെസിയെക്കുറിച്ച് വാചാലനായി ബ്രസീൽ സൂപ്പർ താരം നെയ്മർ ജൂനിയർ. സ്കോട്ട്ലൻഡിനെതിരായ നിർണ്ണായക മത്സരത്തിന് ശേഷം മാധ്യമങ്ങളോട് സംസാരിക്കവെയാണ് മെസിയുമായുള്ള തന്റെ ആഴമേറിയ സൗഹൃദത്തെക്കുറിച്ച് നെയ്മർ മനസ്സ് തുറന്നത്. പരിക്കിനെത്തുടർന്ന് ആദ്യ രണ്ട് മത്സരങ്ങൾ നഷ്ടമായ നെയ്മർ ഈ മത്സരത്തിലൂടെയാണ് ലോകകപ്പിൽ തിരിച്ചെത്തിയത്.
മെസിയെ തന്റെ ഏറ്റവും മികച്ച സുഹൃത്തെന്നാണ് നെയ്മർ വിശേഷിപ്പിച്ചത്. “കളിക്കളത്തിലെ മികവിനേക്കാൾ വലിയൊരു വ്യക്തിത്വമാണ് അദ്ദേഹത്തിന്റേത്. എനിക്ക് അദ്ദേഹത്തോടുള്ള സ്നേഹവും കരുതലും മെസിക്കറിയാം,” നെയ്മർ പറഞ്ഞു. ബാഴ്സലോണയിലെ നാല് വർഷത്തെയും പിഎസ്ജിയിലെ രണ്ട് വർഷത്തെയും ഒരുമിച്ചുള്ള കളിജീവിതം മെസ്സിയും നെയ്മറും തമ്മിലുള്ള സൗഹൃദത്തെ കൂടുതൽ ദൃഢമാക്കിയിട്ടുണ്ട്. എട്ട് പ്രധാന ട്രോഫികൾ ബാഴ്സലോണയിലും രണ്ട് ലീഗ് കിരീടങ്ങൾ പിഎസ്ജിയിലും ഇവർ ഒരുമിച്ച് സ്വന്തമാക്കിയിട്ടുണ്ട്.
അതേസമയം, മിയാമി സ്റ്റേഡിയത്തിൽ നടന്ന ഗ്രൂപ്പ് സിയിലെ അവസാന മത്സരത്തിൽ എതിരില്ലാത്ത മൂന്ന് ഗോളുകൾക്ക് സ്കോട്ട്ലൻഡിനെ തകർത്താണ് ബ്രസീൽ ഗ്രൂപ്പ് ചാമ്പ്യന്മാരായി പ്രീ-ക്വാർട്ടറിലേക്ക് (റൗണ്ട് ഓഫ് 32) കുതിച്ചത്. വിനീഷ്യസ് ജൂനിയർ മത്സരത്തിൽ ഇരട്ട ഗോളുകൾ നേടി തിളങ്ങി. ഏഴാം മിനിറ്റിലും ആദ്യ പകുതിയുടെ ഇഞ്ചുറി ടൈമിലും ഗോൾ കണ്ടെത്തിയ വിനീഷ്യസ്, 60-ാം മിനിറ്റിൽ മാത്യൂസ് കുഞ്ഞയുടെ ഗോളോടെ ബ്രസീലിന്റെ പട്ടിക തികച്ചു.
ഈ ഗോളുകളോടെ വിനീഷ്യസ് ജൂനിയർ ഒരു അപൂർവ്വ റെക്കോർഡിന് ഉടമയായി. ലോകകപ്പിലെ ആദ്യ മൂന്ന് മത്സരങ്ങളിൽ തുടർച്ചയായി ഗോൾ നേടുന്ന 24 വർഷത്തിനിടയിലെ ആദ്യ ബ്രസീൽ താരമായി അദ്ദേഹം മാറി. 2002-ൽ റൊണാൾഡോ നസാരിയോയും റിവാൾഡോയും സ്ഥാപിച്ച ചരിത്രനേട്ടത്തിനൊപ്പമാണ് വിനീഷ്യസ് ഇപ്പോൾ എത്തിനിൽക്കുന്നത്. ഈ നേട്ടം കൈവരിക്കുന്ന അഞ്ചാമത്തെ ബ്രസീൽ താരമാണ് വിനീഷ്യസ്. ഗ്രൂപ്പിൽ ഏഴ് പോയിന്റോടെ ബ്രസീൽ ഒന്നാം സ്ഥാനത്ത് എത്തിയപ്പോൾ, സ്കോട്ട്ലൻഡിന് ഇനി നോക്കൗട്ട് പ്രതീക്ഷകൾക്കായി മറ്റ് മത്സരഫലങ്ങളെ ആശ്രയിക്കേണ്ടി വരും.