‘അടിയന്തര ഘട്ടങ്ങളിൽ ജീവൻ കാക്കാൻ സി. പി. ആർ’; ഖത്തറിൽ കൊട്ടാരക്കര പ്രവാസി കൂട്ടായ്മയുടെ നേതൃത്വത്തിൽ മെഡിക്കൽ പരിശീലനം

ദോഹ: ഖത്തറിലെ കൊട്ടാരക്കര നിവാസികളുടെ കൂട്ടായ്മയായ KEFAQ, അംഗങ്ങൾക്കായി FINQ-യുമായി സഹകരിച്ച് സി. പി. ആർ അവബോധനവും പരിശീലന പരിപാടിയും ദോഹയിലെ ICCയിൽ സംഘടിപ്പിച്ചു.

KEFAQ പ്രസിഡന്റ് ബിനേഷ് ബാബു അധ്യക്ഷനായ യോഗത്തിൽ സെക്രട്ടറി ജോബിൻ പണിക്കർ സ്വാഗതം ആശംസിച്ചു. പരിപാടി ഉദ്ഘാടനം ചെയ്ത ആസ്റ്റർ ഹോസ്പിറ്റലിലെ ഇന്റേണൽ മെഡിസിൻ വിഭാഗം മേധാവി ഡോ. ജോബിൻ ബെഞ്ചമിൻ, ജീവൻ രക്ഷിക്കാൻ സഹായിക്കുന്ന സുപ്രധാന അറിവ് നേടുന്നതിനായി സമയം കണ്ടെത്തി പരിപാടിയിൽ പങ്കെടുത്ത എല്ലാവരെയും അഭിനന്ദിച്ചു. KEFAQ അഡ്വൈസറി ബോർഡ് ചെയർമാൻ ബിജു കെ. ഫിലിപ്പ് ആശംസകൾ നേർന്നു.

തുടർന്ന് ഖത്തറിലെ ഇന്ത്യൻ നഴ്സുമാരുടെ സംഘടനയായ FINQ CPR അവബോധന സെഷനും പ്രായോഗിക പരിശീലനവും നയിച്ചു. പരിപാടി കൺവീനർമാരായ ചാൾസ് കെ. ചാക്കോ, ജൂണോ വിനീത് എന്നിവരുടെ നേതൃത്വത്തിൽ വൈസ് പ്രസിഡന്റുമാരായ സിബി മാത്യു, ബിജു പി. ജോൺ, ട്രസ്റ്റിമാരായ ബെന്നി ബേബി, അനീഷ് തോമസ്, ജോയിന്റ് സെക്രട്ടറിമാരായ ടിൻസി ജോബി, ജലു അമ്പാടി, ഷാജി കരിക്കം എന്നിവരും മാനേജിങ് കമ്മിറ്റി അംഗങ്ങളും പരിപാടിക്ക് നേതൃത്വം നൽകി.

FINQ ടീമിന്റെ വിദഗ്ധ പരിശീലനവും KEFAQ അംഗങ്ങളുടെ സജീവ പങ്കാളിത്തവും പരിപാടിയുടെ വിജയത്തിന് കരുത്തേകി. ചടങ്ങിൽ ട്രസ്റ്റി ബെന്നി ബേബി നന്ദി രേഖപ്പെടുത്തി.