കടയിൽ സാധനം വാങ്ങിയാലും ബില്ലടച്ചാലും ഒരു ക്യു.ആർ കോഡ് സ്കാൻ ചെയ്താൽ മതി, പണം നിമിഷങ്ങൾക്കുള്ളിൽ കൈമാറും. യു.പി.ഐ ഇടപാടുകൾ ജീവിതത്തിന്റെ ഭാഗമായതോടെ ചെറിയ തുകകൾ പോലും ഡിജിറ്റലായി ചെലവാക്കുന്നവരുടെ എണ്ണം വർധിക്കുകയാണ്. എന്നാൽ ദിവസവും നടക്കുന്ന ഇത്തരം ചെറിയ ഇടപാടുകൾ ശ്രദ്ധിക്കാതെ പോയാൽ മാസാവസാനം അക്കൗണ്ടിൽനിന്ന് എത്ര രൂപ ചെലവായെന്ന് പോലും തിരിച്ചറിയാൻ കഴിയാതെ വരും. പ്രത്യേകിച്ച് മറന്നുപോയ സബ്സ്ക്രിപ്ഷനുകളും ഓട്ടോ പേയ്‌മെന്റുകളുമാണ് പലപ്പോഴും അറിയാതെ പണം കുറയാൻ കാരണമാകുന്നത്.
ഒ.ടി.ടി സബ്സ്ക്രിപ്ഷനുകൾ, ആപ്പുകളുടെ അംഗത്വം, ഇൻഷുറൻസ് പ്രീമിയം, വൈദ്യുതി ബിൽ, ഇ.എം.ഐ തുടങ്ങിയവയ്ക്കായി യു.പി.ഐ ഓട്ടോപേ സംവിധാനം ഉപയോഗിക്കുന്നവരുണ്ട്. ഒരിക്കൽ അനുമതി നൽകിയാൽ നിശ്ചയിച്ച ഇടവേളകളിൽ തുക സ്വയം അക്കൗണ്ടിൽനിന്ന് കുറയാം. ഉപയോഗിക്കാത്ത സേവനങ്ങളുടെ സബ്സ്ക്രിപ്ഷനുകൾ പോലും റദ്ദാക്കാതെ തുടരുകയാണെങ്കിൽ പണം ഇത്തരത്തിൽ നഷ്ടപ്പെടാം. അതിനാൽ യു.പി.ഐ ആപ്പിലെ ഓട്ടോപേ അല്ലെങ്കിൽ മാന്ഡേറ്റ് വിഭാഗത്തിൽ കയറി സജീവമായ അനുമതികൾ പരിശോധിക്കേണ്ടത് പ്രധാനമാണ്.
ഇതിനൊപ്പം ദിവസേനയുള്ള ചെറിയ ചെലവുകളും പരിശോധിക്കണം. യു.പി.ഐ ആപ്പിലെ ഇടപാട് ചരിത്രത്തിലൂടെ പണമിടപാടുകളുടെ വിവരങ്ങൾ അറിയാൻ കഴിയും. ഏത് സ്ഥാപനത്തിനാണ് പണം നൽകിയത്, എത്ര തുകയാണ് ചെലവായത്, ആവർത്തിച്ചുള്ള പേയ്‌മെന്റുകളുണ്ടോ തുടങ്ങിയ കാര്യങ്ങൾ പരിശോധിക്കുന്നത് അനാവശ്യ ചെലവുകൾ തിരിച്ചറിയാൻ സഹായിക്കും. ആവശ്യമില്ലാത്ത ഓട്ടോപേ മാന്ഡേറ്റുകൾ ആപ്പിലെ മാന്ഡേറ്റ് നിയന്ത്രണ വിഭാഗത്തിലൂടെ റദ്ദാക്കാം. എന്നാൽ ആപ്പ് ഫോണിൽനിന്ന് നീക്കം ചെയ്യുന്നതുകൊണ്ടോ സബ്സ്ക്രിപ്ഷൻ ആപ്പ് ഡിലീറ്റ് ചെയ്യുന്നതുകൊണ്ടോ ഓട്ടോപേ റദ്ദാകില്ല. സേവനവും പ്രത്യേകം റദ്ദാക്കേണ്ടിവരാം.
യു.പി.ഐ ഇടപാടുകൾ സുരക്ഷിതമായി ഉപയോഗിക്കാൻ ഓരോ ഇടപാടും പരിശോധിക്കുന്ന ശീലം വളർത്തണം. പരിചയമില്ലാത്ത പേയ്‌മെന്റ് അഭ്യർഥനകൾ അംഗീകരിക്കരുത്. പണം സ്വീകരിക്കാനെന്ന പേരിൽ ആരെങ്കിലും ആവശ്യപ്പെട്ടാൽ യു.പി.ഐ പിൻ നൽകുകയും അരുത്. അനുമതിയില്ലാത്ത പണമിടപാട് ശ്രദ്ധയിൽപ്പെട്ടാൽ ഉടൻ ബാങ്കിനെയും ബന്ധപ്പെട്ട യു.പി.ഐ ആപ്പിന്റെ ഉപഭോക്തൃസേവന വിഭാഗത്തെയും അറിയിക്കണം. ചെറിയ തുകയാണെന്ന് കരുതി അവഗണിക്കുന്ന ചെലവുകൾ മാസാവസാനം വലിയ തുകയായി മാറാം. അതുകൊണ്ട് ഇടയ്ക്കിടെ ഇടപാട് ചരിത്രവും ഓട്ടോപേ അനുമതികളും പരിശോധിക്കുന്നത് സാമ്പത്തിക അച്ചടക്കത്തിന്റെ ഭാഗമാക്കാം.