മുംബൈ: 2026 ലെ കാൻ ഫിലിം ഫെസ്റ്റിവലിൽ ബോളിവുഡ് താരം ഐശ്വര്യ റായ് ബച്ചന്റെ വസ്ത്രധാരണത്തെയും ലുക്കിനെയും പരിഹസിച്ചവർക്ക് ചുട്ട മറുപടിയുമായി നടി കങ്കണ റണാവത്ത് രംഗത്ത്. ഫാഷൻ എന്നത് ഒരു വ്യക്തിപരമായ തെരഞ്ഞെടുപ്പാണെന്നും ഒരു സ്ത്രീയും മറ്റുള്ളവരെ പ്രീതിപ്പെടുത്താൻ വേണ്ടിയല്ല വസ്ത്രം ധരിക്കേണ്ടതെന്നും കങ്കണ തന്റെ ഇൻസ്റ്റാഗ്രാം സ്റ്റോറിയിലൂടെ വ്യക്തമാക്കി. കാനിലെ റെഡ് കാർപെറ്റിൽ നിന്നുള്ള ഐശ്വര്യയുടെ ചിത്രം പങ്കുവെച്ചുകൊണ്ടാണ് കങ്കണ പിന്തുണയറിയിച്ചത്.
“ഫാഷനും സ്റ്റൈലും ആത്മപ്രകാശനമാണ്. അത് ഒരാളുടെ ജീവിതത്തെയും മനോഭാവത്തെയും കുറിച്ചുള്ള സ്വന്തം വ്യാഖ്യാനമാണ്. ഒരു സ്ത്രീയും ആരോടും കടപ്പെട്ടിരിക്കുന്നില്ല. ഐശ്വര്യ വളരെ സുന്ദരിയായി കാണപ്പെടുന്നു. അവളെ മറ്റേതെങ്കിലും രീതിയിൽ കാണാൻ ആഗ്രഹിക്കുന്നവർ, നിങ്ങൾക്ക് ലഭിച്ച സൗന്ദര്യം എന്തുകൊണ്ട് കാണിച്ചുകൂടാ? അവൾ നിങ്ങളെ സന്തോഷിപ്പിക്കാൻ ഇവിടെ വന്നതല്ല, അവൾ മഹത്വമുള്ളവളാണ്. ചുവന്ന പരവതാനിയിൽ പ്രായമായ സ്ത്രീകളെ കണ്ട് നിങ്ങൾക്ക് പരിചയമില്ലെങ്കിൽ, ഇപ്പോൾ അവരുമായി പരിചയപ്പെടുക,” – കങ്കണ കുറിച്ചു.
കാൻ ഫിലിം ഫെസ്റ്റിവലിലെ ഐശ്വര്യയുടെ ആദ്യദിന ലുക്ക് ഏറെ ശ്രദ്ധിക്കപ്പെട്ടിരുന്നു. പ്രമുഖ ഡിസൈനർ അമിത് അഗർവാൾ രൂപകൽപ്പന ചെയ്ത “ലുമിനാര” എന്ന പ്രത്യേക കോച്ചർ വസ്ത്രമാണ് താരം ധരിച്ചിരുന്നത്. തോളിൽ നിന്ന് ഉയർന്നുവരുന്ന ഘടനാപരമായ ചിറകുകൾ പോലുള്ള എക്സ്റ്റൻഷനുകളും, പ്രപഞ്ചത്തിന്റെ ആഴങ്ങളെ സൂചിപ്പിക്കുന്ന നീല നിറവും ചേർന്നതായിരുന്നു ഈ വേറിട്ട വസ്ത്രം.
തുടർന്നുള്ള ദിവസങ്ങളിൽ സോഫി കോച്ചറിന്റെ ബേബി പിങ്ക് ഗൗണിലും, സമകാലിക ശൈലിയിലുള്ള വെള്ള പാന്റ്സൂട്ടിലും ഐശ്വര്യ റെഡ് കാർപെറ്റിൽ തിളങ്ങിയിരുന്നു. കാൻ ഫിലിം ഫെസ്റ്റിവലിൽ ഐശ്വര്യ റായ് ബച്ചന്റെ 24-ാമത് പങ്കാളിത്തമാണിത്. ലോകപ്രശസ്ത ബ്യൂട്ടി ബ്രാൻഡായ ലോറിയൽ പാരീസിന്റെ പ്രതിനിധിയായാണ് താരം കാനിൽ എത്തിയത്.