തിരഞ്ഞെടുപ്പിലെ കനത്ത പരാജയത്തിന് പിന്നാലെ സി.പി.എമ്മിൽ നേതൃമാറ്റത്തിനായുള്ള സമ്മർദ്ദം ശക്തമാകുന്നു. പിണറായി വിജയൻ പ്രതിപക്ഷ നേതാവാകാൻ യോഗ്യനല്ലെന്നും അദ്ദേഹം എംഎൽഎ സ്ഥാനം രാജിവെക്കണമെന്നും പാറശ്ശാല ഏരിയ സെക്രട്ടറി എസ്. അജയകുമാർ ആവശ്യപ്പെട്ടു. തോൽവി വിലയിരുത്താൻ ചേർന്ന പാർട്ടി ഏരിയ കമ്മിറ്റി യോഗത്തിലാണ് അദ്ദേഹം ഈ നിലപാട് വ്യക്തമാക്കിയത്. മുൻപ് പിണറായി വിജയനെ ‘കാരണഭൂതൻ’ എന്ന് വാഴ്ത്തുന്ന പാട്ട് പുറത്തിറക്കിയ പരിപാടിയുടെ സംഘാടക സമിതി ചെയർമാനായിരുന്നു അജയകുമാർ എന്നത് ശ്രദ്ധേയമാണ്.
സംസ്ഥാന നേതൃത്വത്തിനെതിരെ പാർട്ടിയുടെ കീഴ്ഘടകങ്ങളിൽ നിന്ന് വ്യാപക വിമർശനമാണ് ഉയരുന്നത്. പിണറായി വിജയനും എം.വി. ഗോവിന്ദനും പാർട്ടി സെക്രട്ടറി എന്ന നിലയിൽ എ. വിജയരാഘവനും സ്വീകരിച്ച ചില നിലപാടുകൾ പാർട്ടിക്ക് വലിയ തിരിച്ചടിയായെന്നാണ് വിലയിരുത്തൽ. പാർട്ടി സഖാക്കളെ കേവലം തൊഴിലാളികളെപ്പോലെ കാണുന്ന നേതൃത്വത്തിന്റെ രീതികൾക്കെതിരെയും വിമർശനം ഉയർന്നിട്ടുണ്ട്. വെള്ളാപ്പള്ളി നടേശനുമായി അടുപ്പം പുലർത്തിയതും, കുമാരനാശാനെക്കാൾ മഹാനാണ് വെള്ളാപ്പള്ളി എന്ന തരത്തിൽ പിണറായി വിജയൻ നടത്തിയ പരാമർശങ്ങളും ന്യൂനപക്ഷങ്ങളെ പാർട്ടിയിൽ നിന്ന് അകറ്റാൻ കാരണമായെന്ന് യോഗത്തിൽ ചൂണ്ടിക്കാട്ടി.
സംസ്ഥാന സർക്കാരിനെ നിയന്ത്രിക്കുന്നതിൽ പാർട്ടി പരാജയപ്പെട്ടെന്നും വിമർശകർ പറയുന്നു. കോടിയേരി ബാലകൃഷ്ണന് ശേഷം എത്തിയ നേതൃത്വത്തിന് കാര്യങ്ങൾ ജനങ്ങളിലേക്കും പാർട്ടി അണികളിലേക്കും കൃത്യമായി എത്തിക്കാൻ സാധിച്ചില്ല. വാർത്താസമ്മേളനങ്ങളിൽ എം.വി. ഗോവിന്ദൻ ഉപയോഗിക്കുന്ന ഭാഷാ പ്രയോഗങ്ങൾ സാധാരണക്കാർക്ക് അന്യമാണെന്നും, അദ്ദേഹത്തിന് തന്നെയല്ലേ ഇതൊക്കെ മനസ്സിലാകുന്നതെന്നുമുള്ള രൂക്ഷമായ ചോദ്യങ്ങൾ അടൂർ ഏരിയ കമ്മിറ്റിയിൽ ഉൾപ്പെടെ ഉയർന്നു. ജനവികാരം മനസ്സിലാക്കുന്നതിൽ നേതൃത്വം ദയനീയമായി പരാജയപ്പെട്ടുവെന്ന അഭിപ്രായമാണ് പാർട്ടിക്കുള്ളിൽ ഇപ്പോൾ ശക്തമാകുന്നത്.