പത്തു വർഷത്തെ തുടർച്ചയായ ഭരണത്തിന് ശേഷം കേരളത്തിൽ ഇടതുമുന്നണി പ്രതിപക്ഷത്തേക്ക് മാറുമ്പോൾ, സഭയിൽ പ്രതിപക്ഷ നേതാവായി ആര് വരുമെന്ന ചർച്ചകൾ സജീവമായിരിക്കുകയാണ്. മുഖ്യമന്ത്രി സ്ഥാനത്തുനിന്നും മാറുന്ന പിണറായി വിജയൻ തന്നെ പ്രതിപക്ഷ നേതൃസ്ഥാനം ഏറ്റെടുക്കുമോ എന്നതാണ് പ്രധാന ചോദ്യം. തിരഞ്ഞെടുപ്പിലെ കനത്ത തിരിച്ചടിയുടെ പശ്ചാത്തലത്തിൽ അദ്ദേഹം ഈ പദവി സ്വീകരിക്കുന്ന കാര്യത്തിൽ ഇതുവരെ ഔദ്യോഗിക പ്രതികരണങ്ങൾ നടത്തിയിട്ടില്ല. പിണറായി വിജയൻ വിമുഖത പ്രകടിപ്പിച്ചാൽ മാത്രമേ പാർട്ടി മറ്റ് പേരുകളിലേക്ക് കടക്കുകയുള്ളൂ.
സിപിഎം സംസ്ഥാന സെക്രട്ടറിയേറ്റ് യോഗത്തിന് ശേഷമായിരിക്കും പ്രതിപക്ഷ നേതാവിന്റെ കാര്യത്തിൽ അന്തിമ തീരുമാനമുണ്ടാകുക. നിലവിലെ രാഷ്ട്രീയ സാഹചര്യത്തിൽ, ഭരണപക്ഷത്തെ നേരിടാൻ കരുത്തനായ ഒരു നേതാവ് തന്നെ വേണമെന്ന അഭിപ്രായം പാർട്ടിക്കുള്ളിലുണ്ട്. അതിനാൽ ആദ്യത്തെ കുറച്ചു കാലം പിണറായി വിജയൻ തന്നെ സഭയെ നയിക്കാനാണ് സാധ്യത. അദ്ദേഹം ഒഴിഞ്ഞുനിൽക്കാൻ തീരുമാനിച്ചാൽ മുൻ ധനമന്ത്രി കെ.എൻ. ബാലഗോപാലിന്റെ പേരിനാകും മുൻഗണന ലഭിക്കുക. പരാജയത്തിന്റെ ആഘാതത്തിൽ നിന്നും പാർട്ടി മുക്തമാകാത്തതിനാൽ വരും ദിവസങ്ങളിൽ മാത്രമേ കൂടുതൽ വ്യക്തത വരൂ.
അതേസമയം, വൻ വിജയം നേടിയ കോൺഗ്രസ് ക്യാമ്പിൽ മുഖ്യമന്ത്രിയെ നിശ്ചയിക്കാനുള്ള നടപടികൾ ഹൈക്കമാൻഡ് വേഗത്തിലാക്കിയിട്ടുണ്ട്. മുഖ്യമന്ത്രി പദത്തിനായി പാർട്ടിയിലെ പ്രമുഖ നേതാക്കൾക്കിടയിൽ നീക്കങ്ങൾ ശക്തമാണ്. പുതിയ സർക്കാരിനെ നയിക്കാൻ കെ.സി. വേണുഗോപാൽ, വി.ഡി. സതീശൻ, രമേശ് ചെന്നിത്തല എന്നിവരുടെ പേരുകളാണ് പ്രധാനമായും ഉയർന്നു കേൾക്കുന്നത്. ഭൂരിഭാഗം എംഎൽഎമാരുടെയും പിന്തുണ തങ്ങൾക്കുണ്ടെന്ന് കെ.സി പക്ഷം അവകാശപ്പെടുമ്പോൾ, ഘടകകക്ഷികളുടെ പിന്തുണയും തിരഞ്ഞെടുപ്പ് നയിച്ചതിലെ മികവും ഉയർത്തിക്കാട്ടിയാണ് വി.ഡി. സതീശൻ വിഭാഗം രംഗത്തുള്ളത്.
മുഖ്യമന്ത്രിയെ തീരുമാനിക്കുന്നതിനായി എഐസിസി നിരീക്ഷകർ ഉടൻ കേരളത്തിലെത്തി എംഎൽഎമാരുടെയും എംപിമാരുടെയും അഭിപ്രായം തേടും. സീനിയോറിറ്റി പരിഗണിക്കണമെന്ന് ചെന്നിത്തല വിഭാഗം ആവശ്യപ്പെടുമ്പോൾ, ആരെ തിരഞ്ഞെടുക്കണമെന്നത് ഹൈക്കമാൻഡിന് വലിയ വെല്ലുവിളിയാണ്. ഒരാഴ്ചയ്ക്കുള്ളിൽ മുഖ്യമന്ത്രിയുടെ കാര്യത്തിൽ അന്തിമ തീരുമാനമെടുത്ത് പുതിയ സർക്കാർ അധികാരമേൽക്കാനാണ് യുഡിഎഫ് നീക്കം നടത്തുന്നത്.