വൈറ്റ് ഹൗസിലെ അത്താഴവിരുന്നിനിടെ ഉണ്ടായ നാടകീയമായ വെടിവയ്പ്പ് സംഭവത്തെ പരിഹസിച്ചുകൊണ്ട് ഇറാൻ പുറത്തിറക്കിയ ആനിമേഷൻ വീഡിയോ ആഗോളതലത്തിൽ വലിയ ചർച്ചയാകുന്നു. ലെഗോ കളിപ്പാട്ടങ്ങളുടെ രൂപത്തിൽ നിർമ്മിച്ച ഈ വീഡിയോയിലൂടെ അമേരിക്കൻ പ്രസിഡന്റ് ഡോണൾഡ് ട്രംപിന്റെ നേതൃത്വത്തെയും വൈറ്റ് ഹൗസിലെ സുരക്ഷാ വീഴ്ചകളെയും ഇറാൻ രൂക്ഷമായ ഭാഷയിലാണ് പരിഹസിക്കുന്നത്. ട്രംപിന്റെ ജനപ്രീതിയും റേറ്റിംഗും ഇടിയുമ്പോഴെല്ലാം ലോകത്തിന്റെ ശ്രദ്ധ തിരിക്കാൻ അദ്ദേഹം നടത്തുന്ന മുൻകൂട്ടി നിശ്ചയിച്ച നാടകമാണ് ഈ വെടിവയ്പ്പെന്ന് വീഡിയോ ആരോപിക്കുന്നു.
ട്രംപിനെ അതീവ ദുർബലനും അഹംഭാവിയുമായാണ് ആനിമേഷനിൽ ചിത്രീകരിച്ചിരിക്കുന്നത്. പൊതുവേദികളിൽ കരുത്തനാണെന്ന് വരുത്തിതീർക്കാൻ ട്രംപ് ശ്രമിക്കുന്നുണ്ടെങ്കിലും അണിയറയിൽ സ്വന്തം ആളുകൾ പോലും അദ്ദേഹത്തെ നോക്കി ചിരിക്കുകയാണെന്ന് വീഡിയോ പരിഹസിക്കുന്നു. ‘നിങ്ങളുടെ പോളുകൾ ഇടിയുമ്പോഴെല്ലാം നിങ്ങൾ ഇതേ തന്ത്രം പുറത്തെടുക്കുന്നു’ എന്ന കുറിപ്പോടെ പുറത്തിറങ്ങിയ വീഡിയോ ട്രംപിന്റെ രാഷ്ട്രീയ തന്ത്രങ്ങളെ നിശിതമായി വിമർശിക്കുന്നതാണ്.
പ്രസ് സെക്രട്ടറിയുടെ വിവാദമായ മുൻകൂർ പരാമർശങ്ങളും വീഡിയോയുടെ പ്രചാരണത്തിന് ആക്കം കൂട്ടിയിട്ടുണ്ട്. ട്രംപിന്റെ സ്വന്തം അനുയായികൾ പോലും അദ്ദേഹത്തിന്റെ നേതൃത്വത്തിലെ പിഴവുകൾ തിരിച്ചറിഞ്ഞു തുടങ്ങിയിട്ടുണ്ടെന്നും വൈറ്റ് ഹൗസിനുള്ളിലെ വിള്ളലുകൾ വർദ്ധിക്കുകയാണെന്നും ഇറാൻ ഈ വീഡിയോയിലൂടെ സമർത്ഥിക്കുന്നു. സോഷ്യൽ മീഡിയയിൽ നിമിഷനേരം കൊണ്ട് വൈറലായ ഈ ആനിമേഷൻ അമേരിക്ക-ഇറാൻ നയതന്ത്ര ബന്ധത്തിൽ കൂടുതൽ അസ്വാരസ്യങ്ങൾ ഉണ്ടാക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.