തിരഞ്ഞെടുപ്പ് പ്രചാരണത്തിനിടെ മതപരമായ വികാരങ്ങൾ വോട്ടിനായി ഉപയോഗപ്പെടുത്തിയെന്ന് ആരോപിച്ച് കാഞ്ഞങ്ങാട് മണ്ഡലത്തിലെ യുഡിഎഫ് സ്ഥാനാർത്ഥി ഷൈജി ഓട്ടപള്ളിക്കെതിരെ പരാതി. രാജപുരം ഹോളി ഫാമിലി ഫൊറോന ദേവാലയത്തിൽ നടത്തിയ വോട്ട് അഭ്യർത്ഥനയ്ക്കിടെ സ്ഥാനാർത്ഥി മതത്തെയും സമുദായത്തെയും പരാമർശിച്ചുകൊണ്ട് സംസാരിച്ചെന്നാണ് പ്രധാന ആക്ഷേപം.
എൽഡിഎഫ് സ്ഥാനാർത്ഥി ഗോവിന്ദൻ പള്ളിക്കാപ്പിലിന്റെ ചീഫ് ഏജന്റ് വി.കെ. രാജനാണ് മുഖ്യ വരണാധികാരിക്ക് പരാതി നൽകിയത്. സ്ഥാനാർത്ഥിയുടെ പ്രസംഗത്തിന്റെ വീഡിയോ ദൃശ്യങ്ങൾ പ്രചരിച്ചതിന് പിന്നാലെയാണ് നിയമനടപടി ആരംഭിച്ചത്. തിരഞ്ഞെടുപ്പ് പെരുമാറ്റച്ചട്ടത്തിന്റെ ലംഘനമാണ് സ്ഥാനാർത്ഥി നടത്തിയതെന്ന് പരാതിയിൽ ചൂണ്ടിക്കാട്ടുന്നു. വോട്ടർമാരെ സ്വാധീനിക്കാൻ മതപരമായ അടയാളങ്ങളും വിശ്വാസങ്ങളും ഉപയോഗിക്കുന്നത് ജനാധിപത്യ പ്രക്രിയയ്ക്ക് വിരുദ്ധമാണെന്നും ഇതിനെതിരെ കർശന നടപടി സ്വീകരിക്കണമെന്നും പരാതിക്കാരൻ ആവശ്യപ്പെട്ടു.