റൺവേ വഴി ആറാട്ട് എഴുന്നള്ളത്ത്!” തിരുവനന്തപുരം വിമാനത്താവളം ഇന്ന് മണിക്കൂറുകളോളം അടച്ചിടും

ശ്രീപത്മനാഭസ്വാമി ക്ഷേത്രത്തിലെ പൈങ്കുനി ആറാട്ട് ഘോഷയാത്ര പ്രമാണിച്ച് തിരുവനന്തപുരം അന്താരാഷ്ട്ര വിമാനത്താവളത്തിലെ വിമാന സർവീസുകൾ ഇന്ന് വൈകുന്നേരം താൽക്കാലികമായി നിർത്തിവെക്കും. വൈകുന്നേരം 4.45 മുതൽ രാത്രി 9 മണി വരെ നാല് മണിക്കൂറോളമാണ് റൺവേയുടെ പ്രവർത്തനം അടച്ചിടുന്നത്. പതിറ്റാണ്ടുകളായി തുടർന്നുപോരുന്ന ആചാരപരമായ ഘോഷയാത്രയ്ക്ക് സുഗമമായ പാതയൊരുക്കുന്നതിനായാണ് വിമാന ഷെഡ്യൂളുകളിൽ ഇത്തരത്തിൽ മാറ്റം വരുത്തുന്നത്. നിയന്ത്രണങ്ങൾ ഏർപ്പെടുത്തിയ വിവരം അതത് വിമാനക്കമ്പനികൾ യാത്രക്കാരെ മുൻകൂട്ടി അറിയിച്ചിട്ടുണ്ടെന്നും വിമാനത്താവളം അധികൃതർ വ്യക്തമാക്കി.

ക്ഷേത്രത്തിലെ പൈങ്കുനി, അൽപശി ഉത്സവങ്ങളുടെ സമാപനത്തോടനുബന്ധിച്ചുള്ള ആറാട്ട് ഘോഷയാത്ര വിമാനത്താവളത്തിന്റെ റൺവേ മുറിച്ചുകടന്നാണ് ശംഖുമുഖം കടപ്പുറത്തേക്ക് പോകുന്നത്. 1932-ൽ അന്നത്തെ തിരുവിതാംകൂർ രാജാവായിരുന്ന ചിത്തിരതിരുനാൾ മഹാരാജാവിന്റെ നേതൃത്വത്തിലാണ് വിമാനത്താവളം സ്ഥാപിതമായത്. അന്ന് വിമാനത്താവളത്തിനായി റൺവേ നിർമ്മിച്ച ഇടത്തിലൂടെയായിരുന്നു ആറാട്ട് എഴുന്നള്ളത്തിന്റെ പരമ്പരാഗത പാത കടന്നുപോയിരുന്നത്. വിമാനത്താവളം വന്നാലും ആറാട്ടിന് ഈ പാത തന്നെ ഉപയോഗിക്കണമെന്ന് രാജാവ് നിഷ്കർഷിക്കുകയും അന്നത്തെ കേന്ദ്രസർക്കാരുമായി കരാറിൽ ഏർപ്പെടുകയും ചെയ്തിരുന്നു. ആ ചരിത്രപരമായ ഉടമ്പടിയാണ് ഇന്നും വിമാനത്താവള അധികൃതർ പാലിച്ചുപോരുന്നത്.

ഘോഷയാത്ര തിരികെ ക്ഷേത്രത്തിൽ എത്തുന്നതോടെയാണ് പൈങ്കുനി ഉത്സവത്തിന് സമാപനമാകുന്നത്. രാത്രി 9 മണിക്ക് ശേഷം വിമാനത്താവളത്തിന്റെ പ്രവർത്തനം സാധാരണ നിലയിലാകും. ഇത്തവണ ആറാട്ട് ചടങ്ങുകളുടെ തത്സമയ ദൃശ്യങ്ങൾ വിമാനത്താവളത്തിന്റെ ഔദ്യോഗിക സോഷ്യൽ മീഡിയ അക്കൗണ്ടുകൾ വഴി ലഭ്യമാക്കുമെന്നും അധികൃതർ അറിയിച്ചിട്ടുണ്ട്. ആചാരവും ആധുനികതയും കൈകോർക്കുന്ന ഈ അപൂർവ്വ കാഴ്ച കാണാൻ നിരവധി പേരാണ് ശംഖുമുഖത്തും വിമാനത്താവള പരിസരത്തും എത്താറുള്ളത്