രാജ്യത്തെ നികുതി ചരിത്രത്തിൽ നിർണ്ണായകമായ മാറ്റങ്ങൾ കുറിച്ചുകൊണ്ട് 2026 ഏപ്രിൽ 1 മുതൽ പുതിയ ‘ഇൻകം ടാക്സ് ആക്ട് 2025’ പ്രാബല്യത്തിൽ വരും. ആറ് പതിറ്റാണ്ട് പഴക്കമുള്ള 1961-ലെ നിയമത്തിന് പകരമായാണ് ഇത് നടപ്പിലാക്കുന്നത്. നികുതി നടപടികൾ ലളിതമാക്കുന്നതിന്റെ ഭാഗമായി നിയമങ്ങളുടെ എണ്ണം 399-ൽ നിന്ന് 190 ആയും ടാക്സ് ഫോമുകൾ 511-ൽ നിന്ന് 333 ആയും കുറച്ചിട്ടുണ്ട്. കൂടാതെ, സാമ്പത്തിക വർഷവും അസസ്മെന്റ് വർഷവും തമ്മിലുള്ള ആശയക്കുഴപ്പം ഒഴിവാക്കാൻ ‘ടാക്സ് ഇയർ’ എന്ന പുതിയ രീതിയും ഏപ്രിൽ മുതൽ നിലവിൽ വരും.
ശമ്പളക്കാർക്ക് വലിയ ആശ്വാസം നൽകുന്ന പ്രഖ്യാപനങ്ങളാണ് പുതിയ നികുതി പരിഷ്കാരത്തിലുള്ളത്. എച്ച്ആർഎ ഇളവ് ലഭിക്കുന്ന മെട്രോ നഗരങ്ങളുടെ പട്ടികയിൽ ബെംഗളൂരു, ഹൈദരാബാദ്, പുണെ, അഹമ്മദാബാദ് എന്നിവയെക്കൂടി ഉൾപ്പെടുത്തിയത് ഐടി ജീവനക്കാർക്കും മറ്റും വലിയ ഗുണമാകും. കുട്ടികളുടെ വിദ്യാഭ്യാസ അലവൻസ് പ്രതിമാസം 100 രൂപയിൽ നിന്ന് 3,000 രൂപയായും ഹോസ്റ്റൽ ചെലവ് പരിധി 9,000 രൂപയായും വർദ്ധിപ്പിച്ചു. ഇതിനുപുറമെ, നികുതിരഹിത മീൽ കാർഡ് പരിധി പ്രതിദിനം 200 രൂപയായും കോർപ്പറേറ്റ് ഗിഫ്റ്റ് വൗച്ചർ പരിധി 15,000 രൂപയായും ഉയർത്തിയിട്ടുണ്ട്.
ഡിജിറ്റൽ ഇടപാടുകളുടെ സുരക്ഷ ഉറപ്പാക്കാൻ ആർബിഐ പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. എല്ലാ ഓൺലൈൻ ഇടപാടുകൾക്കും ഇനി മുതൽ ഒടിപിക്ക് പുറമെ പാസ്വേഡ്, പിൻ അല്ലെങ്കിൽ ബയോമെട്രിക് വിവരങ്ങൾ കൂടി ഉൾപ്പെടുന്ന ‘ടു-ഫാക്ടർ ഓതന്റിക്കേഷൻ’ നിർബന്ധമാകും. ബാങ്കിംഗ് ചാർജുകളിലും മാറ്റമുണ്ട്; എടിഎം വഴി യുപിഐ ഉപയോഗിച്ച് പണം പിൻവലിക്കുന്നതിന് നിശ്ചിത പരിധി കഴിഞ്ഞാൽ 23 രൂപയും ജിഎസ്ടിയും നൽകേണ്ടി വരും. ചില ബാങ്കുകൾ ഡെബിറ്റ് കാർഡുകൾ വഴിയുള്ള പ്രതിദിന പണം പിൻവലിക്കൽ പരിധി പകുതിയോളമായി കുറച്ചിട്ടുമുണ്ട്.
പാൻ കാർഡുമായി ബന്ധപ്പെട്ട നിയമങ്ങളും കർശനമാക്കി. ഇനി മുതൽ പാൻ കാർഡിന് അപേക്ഷിക്കാൻ ആധാർ മാത്രം മതിയാകില്ല; ജനനത്തീയതി തെളിയിക്കാൻ പത്താം ക്ലാസ് സർട്ടിഫിക്കറ്റ്, പാസ്പോർട്ട് അല്ലെങ്കിൽ ഡ്രൈവിംഗ് ലൈസൻസ് എന്നിവയിലേതെങ്കിലും ഹാജരാക്കണം. 10 ലക്ഷത്തിന് മുകളിലുള്ള ക്യാഷ് ഡെപ്പോസിറ്റ്, 20 ലക്ഷത്തിന് മുകളിലുള്ള വസ്തു ഇടപാടുകൾ എന്നിവയ്ക്ക് പാൻ നിർബന്ധമാണ്. നിക്ഷേപ മേഖലയിൽ, ഓഹരി ബൈബാക്ക് വഴി ലഭിക്കുന്ന തുക ഇനി മുതൽ മൂലധന നേട്ടമായി കണക്കാക്കി നികുതി ഈടാക്കും. ഫ്യൂച്ചർ ആന്റ് ഓപ്ഷൻ ട്രേഡിംഗിലെ സെക്യൂരിറ്റീസ് ട്രാൻസാക്ഷൻ ടാക്സും വർദ്ധിപ്പിച്ചിട്ടുണ്ട്.
യാത്രാ മേഖലയിലും ഗണ്യമായ മാറ്റങ്ങൾ ഏപ്രിൽ മുതൽ പ്രാബല്യത്തിൽ വരും. ട്രെയിൻ പുറപ്പെടുന്നതിന് 8 മണിക്കൂർ മുമ്പ് ടിക്കറ്റ് റദ്ദാക്കിയാൽ മാത്രമേ ഇനി മുതൽ റീഫണ്ട് ലഭിക്കുകയുള്ളൂ. വിദേശ യാത്രാ പാക്കേജുകൾക്കുള്ള ടിസിഎസ് നിരക്ക് 2 ശതമാനമായി കുറച്ചത് വിനോദസഞ്ചാരികൾക്ക് ആശ്വാസമാകും. അതേസമയം, ഫാസ്ടാഗ് നിരക്കുകളിൽ നേരിയ വർദ്ധനവുണ്ടാകും. പശ്ചിമേഷ്യൻ യുദ്ധസാഹചര്യങ്ങൾ നിലനിൽക്കുന്നതിനാൽ ഏപ്രിൽ ഒന്നിന് എൽപിജി, സിഎൻജി വിലകളിൽ മാറ്റമുണ്ടാകാൻ സാധ്യതയുണ്ടെന്നും റിപ്പോർട്ടുകൾ സൂചിപ്പിക്കുന്നു.