ഉപയോക്താക്കൾക്ക് വേഗമേറിയതും തടസ്സങ്ങളില്ലാത്തതുമായ ‘വൺ-ടച്ച്’ പേയ്മെന്റ് അനുഭവം പ്രദാനം ചെയ്യുന്നതിനായി യുപിഐ (UPI) ഇടപാടുകൾക്ക് ബയോമെട്രിക് ഓതന്റിക്കേഷൻ സംവിധാനം ആരംഭിക്കുന്നതായി പ്രമുഖ ഫിൻടെക് പ്ലാറ്റ്ഫോമായ ഫോൺപേ പ്രഖ്യാപിച്ചു. ഈ പുതിയ ഫീച്ചർ നിലവിൽ വരുന്നതോടെ, ഇടപാടുകൾ പൂർത്തിയാക്കാൻ ഓരോ തവണയും യുപിഐ പിൻ (UPI PIN) മാനുവലായി നൽകുന്നതിന് പകരം സ്മാർട്ട്ഫോണിലെ ഫിംഗർപ്രിന്റ് അല്ലെങ്കിൽ ഫേഷ്യൽ റെക്കഗ്നിഷൻ തുടങ്ങിയ സുരക്ഷാ സംവിധാനങ്ങൾ ഉപയോഗിക്കാൻ സാധിക്കും. ഇത്തരമൊരു നൂതന ഫീച്ചർ വിപുലമായ രീതിയിൽ വിപണിയിലെത്തിക്കുന്ന ആദ്യത്തെ പ്രമുഖ പേയ്മെന്റ് പ്ലാറ്റ്ഫോമുകളിലൊന്നായി ഇതോടെ ഫോൺപേ മാറി.
ഡിജിറ്റൽ ഇടപാടുകളുടെ സുരക്ഷയും വിശ്വാസ്യതയും വർധിപ്പിക്കുക എന്ന ലക്ഷ്യത്തോടെയാണ് ഈ ഫീച്ചർ രൂപകൽപ്പന ചെയ്തിരിക്കുന്നത്. തിരക്കേറിയ പൊതുസ്ഥലങ്ങളിൽ ഇടപാടുകൾ നടത്തുമ്പോൾ പിൻ നമ്പറുകൾ മറ്റുള്ളവർ കാണാനുള്ള സാധ്യത (Shoulder-surfing) ഇല്ലാതാക്കാൻ ഡിവൈസ് അധിഷ്ഠിത ബയോമെട്രിക് വെരിഫിക്കേഷൻ സഹായിക്കും. സുരക്ഷയ്ക്ക് പുറമെ, പിൻ മറന്നുപോകുന്നത് മൂലമുള്ള പരാജയങ്ങൾ കുറയ്ക്കാനും ഇടപാടുകളുടെ വിജയനിരക്ക് (Success Rate) ഗണ്യമായി മെച്ചപ്പെടുത്താനും ഇത് ഉപകരിക്കും. വെളിച്ചക്കുറവ് മൂലമോ സെൻസർ പ്രശ്നങ്ങൾ മൂലമോ ബയോമെട്രിക് സംവിധാനം തടസ്സപ്പെടുന്ന സാഹചര്യങ്ങളിൽ, ഉപയോക്താക്കൾക്ക് തൽക്ഷണം തന്നെ സാധാരണ യുപിഐ പിൻ ഉപയോഗിച്ച് പേയ്മെന്റ് പൂർത്തിയാക്കാനുള്ള ബദൽ സൗകര്യവും ഇതിൽ ഉൾപ്പെടുത്തിയിട്ടുണ്ട്.