മൊബൈൽ സാങ്കേതികവിദ്യയുടെ ചരിത്രത്തിൽ പുതിയൊരു അധ്യായം കുറിച്ചുകൊണ്ട് ഹോണറിന്റെ ‘റോബോട്ട് ഫോൺ’ ഈ വർഷം വിപണിയിലെത്തും. ബാഴ്സലോണയിൽ നടക്കുന്ന മൊബൈൽ വേൾഡ് കോൺഗ്രസ് 2026-ലാണ് ഹോണർ ഈ അത്ഭുത ഉപകരണം പ്രദർശിപ്പിച്ചത്. ഒരു സ്മാർട്ട്ഫോണിനുള്ളിൽ തന്നെ ലോകത്തിലാദ്യമായി ത്രീ-ആക്സിസ് മെക്കാനിക്കൽ ഗിംബൽ സംവിധാനം ഉൾപ്പെടുത്തി എന്നതാണ് ഈ ഫോണിന്റെ ഏറ്റവും വലിയ സവിശേഷത. വീഡിയോ ഷൂട്ട് ചെയ്യുമ്പോൾ കയ്യിലൊരു ഡിജെഐ ഗിംബൽ ഉപയോഗിക്കുന്നതിന് തുല്യമായ സ്റ്റെബിലൈസേഷൻ ഈ ഫോൺ നൽകുമെന്നാണ് കമ്പനി അവകാശപ്പെടുന്നത്.
200 മെഗാപിക്സൽ ക്യാമറയുമായി എത്തുന്ന ഈ റോബോട്ട് ഫോൺ, ആർട്ടിഫിഷ്യൽ ഇന്റലിജൻസിന്റെ സഹായത്തോടെ ചലിക്കുന്ന വസ്തുക്കളെ സ്വയം ട്രാക്ക് ചെയ്യാനും ഫ്രെയിമിനുള്ളിൽ നിർത്താനും പ്രാപ്തമാണ്. ഇതിനായി ജർമ്മനിയിലെ പ്രശസ്ത മോഷൻ പിക്ചർ കമ്പനിയായ എആർആർഐയുമായി ചേർന്നാണ് ഹോണർ ഈ സാങ്കേതികവിദ്യ വികസിപ്പിച്ചിരിക്കുന്നത്. ഈ വർഷം രണ്ടാം പകുതിയോടെ ചൈനയിൽ പുറത്തിറങ്ങുന്ന ഈ ഉപകരണം വൈകാതെ തന്നെ ആഗോള വിപണിയിലേക്കും എത്തും.
സ്മാർട്ട്ഫോണിന് പുറമെ സ്വന്തമായി വികസിപ്പിച്ച ഹ്യൂമനോയിഡ് റോബോട്ടും, മടക്കാവുന്ന ഫോണുകൾക്കായി പുതിയ സിലിക്കൺ-കാർബൺ ബാറ്ററി സാങ്കേതികവിദ്യയും ഹോണർ മേളയിൽ അവതരിപ്പിച്ചു. സാധാരണ ഫോണുകളിൽ നിന്ന് വ്യത്യസ്തമായി റോബോട്ടിക് ചലനങ്ങളും അത്യാധുനിക ക്യാമറ സംവിധാനവുമുള്ള ഈ പുതിയ വിഭാഗം ഫോണുകൾക്ക് വിപണിയിൽ ഉയർന്ന വിലയായിരിക്കും ലഭിക്കുക. സ്മാർട്ട്ഫോൺ എന്നാൽ വെറുമൊരു ആശയവിനിമയ ഉപകരണം മാത്രമല്ല, ഒരു ചെറിയ റോബോട്ട് കൂടിയാണെന്ന് തെളിയിക്കുകയാണ് ഹോണർ ഇതിലൂടെ ലക്ഷ്യമിടുന്നത്