യഷ് നായകനായി ഗീതു മോഹൻദാസ് സംവിധാനം ചെയ്ത ബിഗ് ബജറ്റ് ചിത്രം ‘ടോക്സിക്: എ ഫെയറി ടെയിൽ ഫോർ ഗ്രോൺ അപ്സ്’ ബോക്സ് ഓഫീസിൽ മന്ദഗതിയിൽ മുന്നേറുന്നു. റിലീസ് ചെയ്ത് രണ്ടാഴ്ച പിന്നിടുമ്പോൾ ചിത്രത്തിന്റെ കളക്ഷനിൽ നേരിയ വർദ്ധനവ് രേഖപ്പെടുത്തിയിട്ടുണ്ട്. ട്രേഡ് ട്രാക്കറായ സാക്നിൽക് റിപ്പോർട്ട് പ്രകാരം ഇന്ത്യയിൽ നിന്ന് മാത്രം 1,927 ഷോകളിലൂടെ ചിത്രം 2.35 കോടി രൂപയാണ് നേടിയത്. ഇതോടെ ഇന്ത്യയിലെ ആകെ നെറ്റ് കളക്ഷൻ 243.40 കോടി രൂപയായും ഗ്രോസ് കളക്ഷൻ 290.50 കോടി രൂപയായും ഉയർന്നു.
വിദേശ മാർക്കറ്റിൽ നിന്ന് 11-ാം ദിവസം 75 ലക്ഷം രൂപയാണ് ചിത്രം നേടിയത്. ഇതോടെ ഓവർസീസ് ഗ്രോസ് കളക്ഷൻ 44 കോടി രൂപയിലെത്തി. ആഗോളതലത്തിലുള്ള ആകെ ഗ്രോസ് കളക്ഷൻ 334.50 കോടി രൂപ കടന്നിരിക്കുകയാണ്. 500 മുതൽ 1000 കോടി രൂപ വരെ നിർമാണച്ചെലവുള്ള ചിത്രം, ഇന്ത്യൻ സിനിമയിലെ ഏറ്റവും ഉയർന്ന ബജറ്റുകളിൽ ഒന്നായാണ് ഒരുക്കിയിരിക്കുന്നത്.
റിലീസ് ദിവസമായ ആഗസ്റ്റ് 26ന് ഇന്ത്യയിൽ നിന്ന് മാത്രം 101.10 കോടിയുടെ റെക്കോർഡ് ഓപ്പണിങ് നേടിയ ചിത്രത്തിന്, പിന്നീട് ബോക്സ് ഓഫീസിൽ കാര്യമായ കുതിപ്പ് നടത്താനായില്ല. ആദ്യ ദിവസങ്ങളിലെ വലിയ തരംഗത്തിന് ശേഷം കളക്ഷൻ ഗ്രാഫ് താഴേക്ക് പോവുകയായിരുന്നു. എട്ടാം ദിവസം 5.45 കോടിയും, ഒൻപതാം ദിവസം 4.25 കോടിയും, പത്താം ദിവസം 1.75 കോടിയുമായിരുന്നു വരുമാനം.
11-ാം ദിവസം കന്നഡ പതിപ്പ് 1.38 കോടി രൂപയും ഹിന്ദി പതിപ്പ് 90 ലക്ഷം രൂപയും നേടി. മൊത്തത്തിലുള്ള ഒക്യുപൻസി 28.1 ശതമാനമായിരുന്നു. കിയാര അദ്വാനി, നയൻതാര, താര സുതരിയ, ഹുമ ഖുറേഷി തുടങ്ങി വൻ താരനിര തന്നെ അണിനിരന്ന ചിത്രമാണ് ടോക്സിക്.