സഹോദരങ്ങൾക്കൊപ്പം ലൂഡോ കളിക്കുന്നതിനിടെ കരുവിഴുങ്ങി; എട്ടുവയസുകാരിക്ക് ദാരുണാന്ത്യം

മംഗളൂരുവിൽ സഹോദരങ്ങൾക്കൊപ്പം ലൂഡോ കളിക്കുന്നതിനിടെ കരുവിഴുങ്ങിയ എട്ടുവയസുകാരിക്ക് ദാരുണാന്ത്യം. മംഗളൂരു തൊക്കോട്ടിന് സമീപം കോല്യയിൽ ശനിയാഴ്ച ഉച്ചയ്ക്കാണ് സംഭവം നടന്നത്. കാസർഗോഡ് മധൂർ ഉളിയത്തടുക്ക സ്വദേശികളായ രാജേഷ് ഗട്ടി – രാജേശ്വരി ദമ്പതികളുടെ മകൾ തനുഷ്ക (8) ആണ് മരിച്ചത്.

സ്കൂൾ അവധിയായതിനാൽ വീട്ടിലിരുന്ന് സഹോദരങ്ങൾക്കൊപ്പം ലൂഡോ കളിക്കുകയായിരുന്നു തനുഷ്ക. കളി ചിരിക്കിടയിൽ അബദ്ധത്തിൽ ലൂഡോ കോയിൻ വിഴുങ്ങുകയായിരുന്നു. ഉടൻ തന്നെ ശ്വാസതടസ്സം അനുഭവപ്പെട്ട് കുട്ടി അവശയായി. വീട്ടുകാർ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തനുഷ്കയുടെ അമ്മ രാജേശ്വരി ഉള്ളാളിലെ ഒരു സ്കൂളിൽ അധ്യാപികയാണ്. ജോലി ആവശ്യങ്ങൾക്കായി കുടുംബം കോല്യയിൽ വാടകയ്ക്ക് താമസിച്ചുവരികയായിരുന്നു.