ഷവോമി 17 സീരീസ് ഉടൻ എത്തും; ഈ മാസം അവസാനം ലോഞ്ച് ചെയ്യും

അടുത്ത ഫ്ലാഗ്ഷിപ്പ് സ്‌മാർട്ട്‌ഫോൺ സീരീസ് പുറത്തിറക്കാൻ ഒരുങ്ങിbചൈനീസ് ടെക് ഭീമനായ ഷവോമി. അടുത്ത ഫ്ലാഗ്ഷിപ്പ് സ്‌മാർട്ട്‌ഫോൺ സീരീസ് ഈ മാസം പുറത്തിറങ്ങുമെന്നാണ് റിപ്പോർട്ടുകൾ. ഷവോമി 15 തലമുറയിൽ നിന്ന് നേരിട്ട് പുതിയ 17 സീരീസിലേക്ക് മാറുകയാണെന്ന് കമ്പനി ഇപ്പോൾ പ്രഖ്യാപിച്ചിരിക്കുന്നത്. ഏതാനും ആഴ്ചകൾക്കുള്ളിൽ ഷവോമി 17 സീരീസ് പുറത്തിറക്കുമെന്നും ഷവോമിയുടെ പ്രസിഡന്‍റ് ലു വെയ്ബിംഗ് ചൈനീസ് സോഷ്യല്‍ മീഡിയ പ്ലാറ്റ്‌ഫോമായ വെയ്ബോയില്‍ വ്യക്തമാക്കി.

പ്രീമിയം ഫോൺ മേഖലയില്‍ ഷവോമിയുടെ വലിയ കുതിച്ചുചാട്ടമാണ് ഈ വരാനിരിക്കുന്ന ലൈനപ്പ് പ്രതിനിധീകരിക്കുന്നതെന്നും ലു വെയ്ബിംഗ് പറഞ്ഞു. ലോഞ്ചിന് മുന്നോടിയായി ഷവോമി തങ്ങളുടെ വെയ്‌ബോ പ്രൊഫൈൽ ചിത്രത്തില്‍ മാറ്റം വരുത്തിയിട്ടുണ്ട്. പുറത്തിറങ്ങാത്ത ഒരു ഫോണിന്‍റെ പിൻഭാഗം, അതിനടുത്തായി ഷവോമി 17 സീരീസ് എന്ന് എഴുതിയിരിക്കുന്നു. കഴിഞ്ഞ വർഷത്തെ ഷവോമി 15 ലൈനപ്പിനെപ്പോലെ, ക്വാൽകോമിന്‍റെ അടുത്ത തലമുറയിലെ ഹൈ-എൻഡ് ചിപ്‌സെറ്റായ ക്വാൽകോം സ്‌നാപ്ഡ്രാഗൺ 8 എലൈറ്റ് 5 പുറത്തിറങ്ങിയതിന് തൊട്ടുപിന്നാലെ ഷവോമി 17 സീരീസും അവതരിപ്പിക്കുമെന്ന് പ്രതീക്ഷിക്കുന്നു.

ഷവോമി 17, ഷവോമി 17 പ്രോ, ഷവോമി 17 പ്രോ മാക്‌സ് എന്നീ മൂന്ന് സ്‌മാര്‍ട്ട്‌ഫോണുകൾ ഇതിലുണ്ടാകും. ഇവയിലെല്ലാം ക്വാൽകോമിന്‍റെ ഏറ്റവും പുതിയ സ്‌നാപ്ഡ്രാഗൺ 8 എലൈറ്റ് ജെൻ 5 പ്രോസസർ ഉണ്ടായിരിക്കും. ഷവോമി 17 സീരീസിൽ 6.3 ഇഞ്ച് 1.5കെ ഒഎൽഇഡി ഡിസ്‌പ്ലേ ഉള്‍പ്പെടുത്താനാണ് സാധ്യത. ഇതിന് 120 ഹെര്‍ട്‌സ് റിഫ്രഷ് റേറ്റ് പിന്തുണ ലഭിക്കും. ക്യാമറ സജ്ജീകരണത്തെക്കുറിച്ച് പറയുകയാണെങ്കിൽ, ഓമ്‌നിവിഷൻ സെൻസറുള്ള 50 എംപി പ്രൈമറി ക്യാമറയും ഇതിൽ ഉണ്ടായിരിക്കാം. 50 എംപി അൾട്രാ വൈഡ് ലെൻസും 50 എംപി ടെലിഫോട്ടോ ലെൻസും (Samsung ISOCELL JN5 സെൻസർ) ഇതിൽ ലഭ്യമാകുമെന്ന് വെളിപ്പെടുത്തിയിട്ടുണ്ട്.