ശബരിമല : 41 ദിവസം നീണ്ടുനിൽക്കുന്ന മണ്ഡലകാല തീർത്ഥാടനത്തിനായി ശബരിമല നട തിങ്കളാഴ്ച തുറക്കും. വൈകുന്നേരം അഞ്ച് മണിയോടെ മേൽശാന്തി ഇഡി പ്രസാദ് നമ്പൂതിരി തന്ത്രി കണ്ഠരര് ബ്രഹ്മദത്തൻ്റെ സാന്നിധ്യത്തിൽ ശ്രീകോവിൽ നട തുറന്ന് ദീപം തെളിയിക്കും. അതിനുശേഷം പതിനെട്ടാം പടിയിറങ്ങി ഹോമകുണ്ഡത്തിൽ അഗ്നി തെളിയിക്കുന്ന ചടങ്ങും നടക്കും. പതിനെട്ടാം പടിക്ക് താഴെ ഇരുമുടിക്കെട്ടുമായി കാത്തുനിൽക്കുന്ന മേൽശാന്തി സുബ്രഹ്മണ്യൻ ശങ്കരൻ നമ്പൂതിരിയെയും മാളികപ്പുറം മേൽശാന്തി എ ദാമോദരൻ നമ്പൂതിരിയെയും നിലവിലെ മേൽശാന്തി സോപാനത്തിലേക്ക് ആനയിക്കും. വൈകുന്നേരം 6:30 ഓടെ സന്നിധാനത്തും തുടർന്ന് മാളികപ്പുറത്തും സ്ഥാനാരോഹണ ചടങ്ങുകൾ നടക്കും.
വൃശ്ചികം 17-ന് പുലർച്ചെ 3 മണിക്ക് പുതിയ മേൽശാന്തിമാരാണ് സന്നിധാനത്തെയും മാളികപ്പുറത്തെയും നടകൾ തുറക്കുക. മണ്ഡലകാലത്ത് ഒരു ദിവസം പരമാവധി 80,000 പേർക്കാണ് ദർശനം അനുവദിച്ചിട്ടുള്ളത്. ഇതിൽ 66,000 പേർക്ക് വെർച്വൽ ക്യൂ ബുക്കിംഗ് വഴി എത്താനാകും. മുഖ്യമന്ത്രി തിരുവനന്തപുരത്തും പമ്പയിലും ചേർന്ന യോഗങ്ങളിലെ തീരുമാനങ്ങൾ അനുസരിച്ച് വിവിധ വകുപ്പുകളുടെ ഒരുക്കങ്ങൾ പൂർത്തിയായതായും അധികൃതർ അറിയിച്ചു.