സിനിമാ ലോകവും ആരാധകരും ഒരുപോലെ കാത്തിരുന്ന അഭ്യൂഹങ്ങൾക്ക് വിരാമമിട്ടുകൊണ്ട് നടൻ വിജയ് ദേവരക്കൊണ്ടയും നടി രശ്മിക മന്ദാനയും വിവാഹിതരായി. ഹൈദരാബാദിൽ വെച്ച് നടന്ന സ്വകാര്യ ചടങ്ങിലായിരുന്നു ഇരുവരുടെയും വിവാഹം. വിവാഹ ചിത്രങ്ങൾക്ക് കർശന നിയന്ത്രണങ്ങൾ ഏർപ്പെടുത്തിയിരുന്നതിനാൽ ചടങ്ങിന്റെ ദൃശ്യങ്ങളൊന്നും തന്നെ നേരത്തെ പുറത്തുവന്നിരുന്നില്ല. എന്നാൽ ഇപ്പോൾ ഹൃദയസ്പർശിയായ കുറിപ്പോടെ വിവാഹചിത്രങ്ങൾ വിജയ് സോഷ്യൽ മീഡിയയിൽ പങ്കുവെച്ചിരിക്കുകയാണ്.
രശ്മികയെ തന്റെ ജീവിതപങ്കാളിയായി തിരഞ്ഞെടുത്തതിനെക്കുറിച്ച് വികാരാധീനനായ വിജയ് ഇങ്ങനെ കുറിച്ചു. “ഒരു ദിവസം അവളെ ഞാൻ അത്രമേൽ മിസ്സ് ചെയ്തു. അവൾ കൂടെയുണ്ടായിരുന്നെങ്കിൽ എന്റെ ദിവസം എത്ര സുന്ദരമായേനെ എന്ന് ഞാൻ ആഗ്രഹിച്ചുപോയി. അവൾ അരികിലുണ്ടെങ്കിൽ ഭക്ഷണം കൂടുതൽ രുചികരമാകുമെന്നും, എന്റെ വ്യായാമമുറകൾ കൂടുതൽ രസകരമാകുമെന്നും എനിക്ക് തോന്നി. എനിക്ക് അവളെ അത്രമേൽ ആവശ്യമായിരുന്നു. അങ്ങനെയാണ് എന്റെ ഉറ്റ സുഹൃത്തിനെ ഞാൻ ഭാര്യയായി കണ്ടെത്തിയത്.”
കരിയറിലെ ഏറ്റവും മികച്ച ഘട്ടത്തിൽ നിൽക്കുന്ന രണ്ട് താരങ്ങളുടെ വിവാഹം ആരാധകർക്കിടയിൽ വലിയ ആവേശമാണ് ഉണ്ടാക്കിയിരിക്കുന്നത്. ഫോട്ടോകൾ പങ്കുവെച്ച നിമിഷം മുതൽ സോഷ്യൽ മീഡിയയിൽ ആശംസകളുടെ പ്രവാഹമാണ്. ഇരുവരുടെയും ഹൃദയസ്പർശിയായ ഈ കുറിപ്പും ചിത്രങ്ങളും ഇതിനോടകം തന്നെ ഇന്റർനെറ്റിൽ വൈറലായിക്കഴിഞ്ഞു.