ഐപിഎല്ലിൽ മുംബൈ ഇന്ത്യൻസിന്റെ വിശ്വസ്തനായ പേസർ ജസ്പ്രിത് ബുംറയുടെ മങ്ങിയ ഫോം ആരാധകരെയും ടീം മാനേജ്മെന്റിനെയും ഒരുപോലെ ആശങ്കയിലാക്കുന്നു. സീസണിൽ അഞ്ച് മത്സരങ്ങൾ പൂർത്തിയാകുമ്പോഴും ഒരു വിക്കറ്റ് പോലും നേടാൻ ബുംറയ്ക്ക് കഴിഞ്ഞിട്ടില്ല. 15-കാരൻ വൈഭവ് സൂര്യവംശി ഉൾപ്പെടെയുള്ള യുവതാരങ്ങൾ ബുംറയെ അനായാസം നേരിടുന്നത് മുംബൈ ഇന്ത്യൻസിന് വലിയ തിരിച്ചടിയാവുകയാണ്.
ബുംറയുടെ പ്രകടനം വിലയിരുത്തി മുൻ താരം ഇർഫാൻ പത്താൻ രംഗത്തെത്തി. ബുംറയുടെ പന്തുകളുടെ വേഗത കുറഞ്ഞതാണ് വിക്കറ്റ് ലഭിക്കാത്തതിന് കാരണമെന്ന് പത്താൻ ചൂണ്ടിക്കാട്ടുന്നു. ഈ സീസണിൽ മണിക്കൂറിൽ ശരാശരി 130 കിലോമീറ്റർ വേഗതയിൽ മാത്രമാണ് ബുംറ പന്തെറിയുന്നത്. എറിയുന്ന പന്തുകളിൽ 44 ശതമാനവും സ്ലോ ബോളുകൾ ആണ്. പഴയതുപോലെ വേഗത വീണ്ടെടുത്താൽ ബുംറയ്ക്ക് വിക്കറ്റുകൾ സ്വന്തമാക്കാൻ കഴിയുമെന്നും മറ്റ് സാങ്കേതിക തിരുത്തലുകളുടെ ആവശ്യമില്ലെന്നും പത്താൻ പറഞ്ഞു.
തോൽവികൾക്ക് പിന്നാലെ മുംബൈ ഇന്ത്യൻസ് ക്യാമ്പിൽ ഭിന്നത രൂക്ഷമാകുന്നതായും സൂചനയുണ്ട്. പഞ്ചാബ് കിംഗ്സിനെതിരായ മത്സരത്തിന് ശേഷം ക്യാപ്റ്റൻ ഹാർദിക് പാണ്ഡ്യയും ബുംറയും തമ്മിൽ വാക്കുതർക്കത്തിലേർപ്പെടുന്ന ദൃശ്യങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്. 196 റൺസ് എന്ന മികച്ച സ്കോർ ഉയർത്തിയിട്ടും 16.3 ഓവറിൽ തന്നെ പഞ്ചാബ് ലക്ഷ്യം കണ്ടത് മുംബൈ നിരയിലെ പോരായ്മകൾ എടുത്തുകാണിക്കുന്നു.