അയോധ്യയിലെ രാമക്ഷേത്രത്തിൽ ഭക്തർ നൽകിയ സംഭാവനകളിൽ തട്ടിപ്പ് നടന്നെന്ന ആരോപണത്തിൽ സ്വതന്ത്രവും സമഗ്രവുമായ അന്വേഷണം നടത്തണമെന്ന് ആവശ്യപ്പെട്ട് ലോക്സഭ പ്രതിപക്ഷ നേതാവ് രാഹുൽ ഗാന്ധിയും രാജ്യസഭ പ്രതിപക്ഷ നേതാവ് മല്ലികാർജുൻ ഖാർഗെയും പ്രധാനമന്ത്രി നരേന്ദ്ര മോദിക്ക് സംയുക്ത കത്തയച്ചു. വിശ്വാസത്തോടെയും ഭക്തിയോടെയും ക്ഷേത്രത്തിന് സംഭാവന നൽകിയ ലക്ഷക്കണക്കിന് ഭക്തർക്ക് സത്യാവസ്ഥ അറിയാനും ഉത്തരവാദികളെ നിയമത്തിന് മുന്നിൽ കൊണ്ടുവരാനും അവകാശമുണ്ടെന്ന് ഇരുവരും കത്തിൽ ചൂണ്ടിക്കാട്ടി.
ജൂണിൽ പുറത്തുവന്ന സംഭാവന മോഷണ ആരോപണത്തെ തുടർന്ന് പോലീസ് കേസെടുത്ത് ഇതുവരെ എട്ട് പേരെ അറസ്റ്റ് ചെയ്തിട്ടുണ്ട്. ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റിലെ രണ്ട് മുതിർന്ന ഭാരവാഹികൾ രാജിവെച്ചതും വിവാദത്തിന് ആക്കം കൂട്ടി. ട്രസ്റ്റിന്റെ സാമ്പത്തിക ഇടപാടുകളും പണം, സ്വർണം, വെള്ളി ഉൾപ്പെടെയുള്ള വഴിപാടുകളുടെ കണക്കുകളും സ്വതന്ത്രമായി പരിശോധിക്കണമെന്നും അന്വേഷണ റിപ്പോർട്ടും സാമ്പത്തിക രേഖകളും പൊതുജനങ്ങൾക്ക് ലഭ്യമാക്കണമെന്നും കോൺഗ്രസ് നേതാക്കൾ ആവശ്യപ്പെട്ടു.
സുപ്രീം കോടതിയുടെ നിർദേശപ്രകാരം കേന്ദ്രസർക്കാർ രൂപീകരിച്ച ട്രസ്റ്റായതിനാൽ ഈ വിഷയത്തിൽ കേന്ദ്രത്തിന് ഉത്തരവാദിത്തമുണ്ടെന്നും പ്രധാനമന്ത്രിയുടെ മൗനം അംഗീകരിക്കാനാകില്ലെന്നും കത്തിൽ പറയുന്നു. ആരോപണങ്ങളിൽ കുറ്റക്കാരെന്ന് കണ്ടെത്തുന്നവർക്കെതിരെ, സ്ഥാനമോ സ്വാധീനമോ നോക്കാതെ കർശന നടപടി സ്വീകരിക്കണമെന്നും, ഭക്തരുടെ വിശ്വാസം സംരക്ഷിക്കാൻ സർക്കാർ പൂർണ സുതാര്യത ഉറപ്പാക്കണമെന്നും രാഹുൽ ഗാന്ധിയും മല്ലികാർജുൻ ഖാർഗെയും ആവശ്യപ്പെട്ടു.