യൂത്ത് കോൺ​ഗ്രസുകാരുമൊത്ത് പൊലീസ് സ്റ്റേഷനുള്ളിൽ പിറന്നാൾ ആഘോഷം; സിഐക്കുണ്ടായത് ജാ​ഗ്രതക്കുറവ്; കടുത്ത നടപടികളുണ്ടാകില്ല

കോഴിക്കോട്: കൊടുവള്ളി സ്റ്റേഷനിലെ പിറന്നാളാഘോഷത്തിൽ സിഐക്കെതിരെ കടുത്ത നടപടികളുണ്ടാകില്ലെന്ന് റിപ്പോർട്ട്. കൊടുവള്ളി സിഐ കെ പി അഭിലാഷ് യൂത്ത് കോൺ​ഗ്രസ് പ്രവർത്തകർക്കൊപ്പം പൊലീസ് സ്റ്റേഷനുള്ളിൽ കേക്ക് മുറിച്ച് പിറന്നാൾ ആഘോഷിച്ചത് വിവാദമായിരുന്നു. ഇതിന് പിന്നാലെ വടകര റൂറൽ എസ്പി സംഭവത്തിൽ അന്വേഷണം നടത്തി. സിഐക്ക് ജാ​ഗ്രത കുറവ് സംഭവിച്ചെന്നാണ് റൂറൽ എസ്പിയുടെ അന്വേഷണ റിപ്പോർട്ട്.

അബദ്ധം പറ്റിയതാണെന്നാണ് സിഐയുടെ വിശദീകരണം. ഈ വിശദീകരണം അംഗീകരിച്ചാണ് ജാഗ്രതക്കുറവ് മാത്രമാണ് സംഭവിച്ചതെന്ന് വടകര റൂറൽ എസ്പി അന്വേഷണ റിപ്പോർട്ട് നൽകിയത്. ഇൻസ്പെക്ടർക്ക് ജാഗ്രതക്കുറവുണ്ടായതായി താമരശ്ശേരി ഡിവൈഎസ്പിയും കണ്ടെത്തിയിരുന്നു. സ്റ്റേഷനകത്ത് പിറന്നാൾ ആഘോഷിക്കുന്നതിലൂടെ തെറ്റായ കീഴ്​വഴക്കവും സന്ദേശവും നൽകുന്നുവെന്നും താമരശേരി റൂറൽ എസ്പിക്ക് നൽകിയ റിപ്പോർട്ടിലും വ്യക്തമാക്കിയിരുന്നു.

അതേസമയം, സിഐ അഭിലാഷിൻറേത് ചട്ടവിരുദ്ധമായ നടപടിയാണെന്ന് ഡിവൈഎഫ്ഐ ആരോപിച്ചു. സിഐക്കെതിരെ നിയമ നടപടി സ്വീകരിക്കണമെന്നും ഡിവൈഎഫ്ഐ ആവശ്യപ്പെടുന്നു. സിഐ അഭിലാഷ് പരാതികൾ ഒത്തുതീർപ്പാക്കി പണം വാങ്ങുന്നുണ്ടെന്നും ഡിവൈഎഫ്ഐ ആരോപിച്ചു.