ഭരണിക്കാവിൽ ഇ. കാസിം അനുസ്മരണം ഉദ്ഘാടനം ചെയ്തു സംസാരിക്കവെ, യുഡിഎഫിനെതിരെ രൂക്ഷവിമർശനവുമായി സിപിഐഎം സംസ്ഥാന സെക്രട്ടറിയേറ്റ് അംഗം എം.വി. ജയരാജൻ രംഗത്തെത്തി. വി.ഡി. സതീശൻ മുഖ്യമന്ത്രിയായതോടെ ബിജെപിയുടെ ‘ബി’ ടീമായിരുന്ന യുഡിഎഫ്, ഇപ്പോൾ അവരുടെ ‘എ’ ടീമായി മാറിയെന്ന് അദ്ദേഹം ആരോപിച്ചു.
ആർഎസ്എസിന്റെ പ്രാർത്ഥനാ ഗീതം ഏറ്റുചൊല്ലാൻ പോലും മടിയില്ലാത്തവരാണ് കേരളം ഭരിക്കുന്നതെന്ന് ജയരാജൻ കുറ്റപ്പെടുത്തി. കേന്ദ്രസർക്കാർ ഇന്ത്യ മുന്നണിയുടെ ഭാഗമായ കക്ഷികൾക്കെതിരെ നടത്തുന്ന രാഷ്ട്രീയ വേട്ടയ്ക്ക് കോൺഗ്രസ് കൂട്ടുനിൽക്കുകയാണ്. ഇന്ത്യ ബ്ലോക്കിലെ മറ്റ് കക്ഷികൾക്കെതിരെ ഇഡി റെയ്ഡ് നടക്കുമ്പോൾ കോൺഗ്രസ് മൗനം പാലിക്കുന്നത് ഇതിന്റെ തെളിവാണെന്ന് അദ്ദേഹം ചൂണ്ടിക്കാട്ടി. മുഖ്യമന്ത്രി പിണറായി വിജയന്റെ വീട്ടിൽ റെയ്ഡ് നടന്നപ്പോൾപ്പോലും അപലപിക്കാൻ കോൺഗ്രസ് തയ്യാറായില്ലെന്നും അദ്ദേഹം ഓർമ്മിപ്പിച്ചു.
തൊഴിലാളി ദിനത്തിൽ വി.ഡി. സതീശൻ അദാനിയുടെ ഫ്ലൈറ്റിൽ മംഗലാപുരത്തെത്തി എൻഡിഎ നേതാക്കളെ കണ്ടത് ബിജെപിയുമായുള്ള രഹസ്യ ഡീലിന്റെ ഭാഗമാണെന്ന് എം.വി. ജയരാജൻ ആരോപിച്ചു. സംസ്ഥാന രാഷ്ട്രീയത്തിൽ കോൺഗ്രസ് സ്വീകരിക്കുന്ന ഇരട്ടത്താപ്പ് നയങ്ങൾക്കെതിരെ ശക്തമായ വിമർശനമാണ് അദ്ദേഹം ഉന്നയിച്ചത്.