സംസ്ഥാനത്ത് ഓണത്തോടനുബന്ധിച്ച് മഞ്ഞക്കാർഡ് ഉടമകൾക്കുള്ള സൗജന്യ ഓണക്കിറ്റ് വിതരണം ഓഗസ്റ്റ് 10 മുതൽ ആരംഭിക്കുമെന്ന് ഭക്ഷ്യവകുപ്പ് മന്ത്രി അനൂപ് ജേക്കബ്. 16 ഇനം അവശ്യസാധനങ്ങൾ അടങ്ങിയതായിരിക്കും ഇത്തവണത്തെ ഓണക്കിറ്റ്. ജനങ്ങൾക്ക് ആശ്വാസമായി ഓണച്ചന്തകൾ ഓഗസ്റ്റ് 8 മുതലും ഓണം ട്രേഡ് ഫെയറുകൾ ഓഗസ്റ്റ് 6 മുതലും ആരംഭിക്കും. സപ്ലൈകോ ഔട്ട്ലെറ്റുകൾ വഴി സബ്സിഡി നിരക്കിലുള്ള 13 ഇനം സാധനങ്ങൾ ലഭ്യമാക്കുമെന്നും വരുന്ന വർഷങ്ങളിൽ കൂടുതൽ വിഭാഗങ്ങളിലേക്ക് കിറ്റ് വിതരണം വ്യാപിപ്പിക്കാൻ നടപടിയെടുക്കുമെന്നും മന്ത്രി അറിയിച്ചു.
അതേസമയം, സംസ്ഥാനത്തെ സാമ്പത്തിക പ്രതിസന്ധി രൂക്ഷമായ സാഹചര്യത്തിൽ വരും ബജറ്റിന് മുന്നോടിയായി ചെലവുകൾ ചുരുക്കാൻ ധനവകുപ്പ് നിർദ്ദേശം നൽകിയിട്ടുണ്ട്. ധനകാര്യ അച്ചടക്കം ഉറപ്പാക്കുന്നതിന്റെ ഭാഗമായി അനാവശ്യ പദ്ധതികളും മാറ്റിവെക്കാവുന്ന അറ്റകുറ്റപ്പണികളും തൽക്കാലം ഒഴിവാക്കാനാണ് സർക്കുലറിലെ നിർദ്ദേശം. ഒഴിവുകളിൽ പുതിയ നിയമനം വരുത്താതെ നിലവിലെ ജീവനക്കാരെ പുനർവിന്യസിക്കാനും പുതുക്കിയ എസ്റ്റിമേറ്റ് തുക ബജറ്റ് വിഹിതത്തിൽ കവിയരുതെന്നും വ്യക്തമാക്കുന്നു.