ഇന്ത്യൻ വാഹന വിപണിയിൽ തരംഗം സൃഷ്ടിക്കാൻ ജാപ്പനീസ് കരുത്തുമായി നിസാൻ ഗ്രാവിറ്റ് എത്തുന്നു. നിസാൻ മാഗ്നൈറ്റിന്റെ വിജയത്തിന് പിന്നാലെ കമ്പനി അവതരിപ്പിക്കുന്ന ഈ പുതിയ എംപിവി, പ്രീമിയം ഫീച്ചറുകളാൽ സമ്പന്നമാണ്. മാഗ്നൈറ്റിന് സമാനമായ ഉൾവശം സജ്ജീകരിച്ചിരിക്കുന്ന കാറിൽ എട്ട് ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ഫോൺ മിററിംഗ്, നൂതനമായ ഡിജിറ്റൽ ഇൻസ്ട്രുമെന്റ് ക്ലസ്റ്റർ എന്നിവ ഉൾപ്പെടുത്തിയിട്ടുണ്ട്. സ്പീഡ് ഡിസ്പ്ലേയ്ക്ക് മുകളിലുള്ള റെവ് കൗണ്ടറും വശങ്ങളിലെ ഇന്ധന ഗേജും ഡ്രൈവർക്ക് ആധുനികമായ ഒരു കാഴ്ചാനുഭവം ഉറപ്പാക്കുന്നു.
പ്രയോഗികതയ്ക്ക് മുൻഗണന നൽകുന്ന ഡിസൈനാണ് ഗ്രാവിറ്റിന്റെ മറ്റൊരു സവിശേഷത. റെനോ ട്രൈബറിന് സമാനമായി, ഇതിലെ മൂന്നാം നിര സീറ്റുകൾ പൂർണ്ണമായും നീക്കം ചെയ്യാൻ സാധിക്കും. ഇത് കുടുംബയാത്രകൾക്കും കൂടുതൽ ലഗേജ് കൊണ്ടുപോകുന്നതിനും സൗകര്യപ്രദമാണ്. ബീജ്, കറുപ്പ് നിറങ്ങൾ സമന്വയിപ്പിച്ച ഡ്യുവൽ-ടോൺ അപ്ഹോൾസ്റ്ററി വാഹനത്തിന് മികച്ച പ്രീമിയം ലുക്ക് നൽകുന്നുണ്ട്. 1.0 ലിറ്റർ, 3-സിലിണ്ടർ പെട്രോൾ എഞ്ചിൻ കരുത്തേകുന്ന വാഹനത്തിൽ 72 bhp പവറും 96 Nm ടോർക്കും ലഭിക്കും. 5-സ്പീഡ് മാനുവൽ , സിറ്റി ഡ്രൈവിംഗിന് അനുയോജ്യമായ എഎംടി ഗിയർബോക്സ് ഓപ്ഷനുകൾ ഇതിൽ ലഭ്യമാണ്.
മാരുതി സ്വിഫ്റ്റ്, ഹ്യുണ്ടായി ഗ്രാൻഡ് i10 തുടങ്ങിയ ഹാച്ച്ബാക്കുകൾക്കും, ഡിസയർ, അമേസ് തുടങ്ങിയ കോംപാക്റ്റ് സെഡാനുകൾക്കും ശക്തമായ ഭീഷണി ഉയർത്താനാണ് നിസാൻ ഗ്രാവിറ്റ് ലക്ഷ്യമിടുന്നത്. ഈ സെഗ്മെന്റിലെ രണ്ടാമത്തെ എംപിവി എന്ന നിലയിൽ, ഹാച്ച്ബാക്കിന്റെ വിലയിൽ ഒരു ഫാമിലി കാർ ആഗ്രഹിക്കുന്നവരെ ഗ്രാവിറ്റ് ആകർഷിക്കും. സവിശേഷതകളും പ്രായോഗികതയും മികച്ച രീതിയിൽ ഒത്തിണങ്ങുന്ന ഈ വാഹനം വിപണിയിലെ മത്സരം കടുപ്പിക്കുമെന്ന് ഉറപ്പാണ്. ആകർഷകമായ വില കൂടി പ്രഖ്യാപിക്കുന്നതോടെ നിസാൻ ഗ്രാവിറ്റ് വിപണിയിൽ ഒരു വൻമാറ്റത്തിന് തുടക്കമിടുമോ എന്ന് കാത്തിരുന്ന് കാണാം.