ഒരു ലോറി കാണാതാകുന്നു… ഉടമ അറിയാതെ വാഹനം മറ്റൊരാൾക്ക് വിൽക്കുന്നു, അവിടെനിന്ന് വീണ്ടും കൈമാറ്റം, പിന്നെയും വിൽപ്പന. ഒടുവിൽ കേരളത്തിൽനിന്ന് കർണാടകയിലേക്കും തമിഴ്‌നാട്ടിലേക്കും കടന്ന ലോറി കണ്ടെത്താൻ പോലീസിന് നടത്തേണ്ടിവന്നത് 2,500 കിലോമീറ്ററിലധികം നീളുന്ന അന്വേഷണയാത്ര. വയനാട് തിരുനെല്ലി തൃശ്ശിലേരി സ്വദേശിയായ അനൂപിന്റെ ടിപ്പർ ലോറിയാണ് മൂന്ന് മാസത്തോളം നീണ്ട അന്വേഷണത്തിനൊടുവിൽ തമിഴ്‌നാട്ടിലെ സേലത്തിന് സമീപത്തുനിന്ന് കണ്ടെത്തിയത്. ഏതാനും ദിവസത്തേക്ക് ഡ്രൈവർക്ക് വാടകയ്ക്ക് നൽകിയിരുന്ന ലോറി ഉടമയുടെ അറിവോ സമ്മതമോ ഇല്ലാതെ മറ്റൊരാൾക്ക് വിറ്റുവെന്നാണ് അനൂപിന്റെ പരാതി. ഓഗസ്റ്റിലാണ് വാഹനം കാണാതായത്. ലോറിയിലെ ജി.പി.എസ് സംവിധാനം തകർത്ത ശേഷമാണ് വാഹനം കൈമാറിയതെന്നാണ് പോലീസിന്റെ കണ്ടെത്തൽ. ഇതോടെ വാഹനത്തിന്റെ യഥാർഥ സഞ്ചാരപാത കണ്ടെത്തുക അന്വേഷണസംഘത്തിന് വലിയ വെല്ലുവിളിയായി. കേരളത്തിൽനിന്ന് കർണാടകയിലേക്കും പിന്നീട് തമിഴ്‌നാട്ടിലേക്കും എത്തിയ ലോറി പലരുടെയും കൈകളിലൂടെ കടന്നുപോയിരുന്നു.
വാഹനം കൈമാറിയവരിലേക്കും വാങ്ങിയവരിലേക്കും അന്വേഷണം വ്യാപിപ്പിച്ച പോലീസ് ഏകദേശം 26 പേരുമായി ബന്ധപ്പെട്ട വിവരങ്ങൾ ശേഖരിച്ചു. ആദ്യ വാങ്ങുന്നയാളെ കണ്ടെത്തിയപ്പോഴേക്കും ലോറി മറ്റൊരാൾക്ക് കൈമാറിയ സംഭവവും അന്വേഷണത്തെ സങ്കീർണമാക്കി. സൈബർ സെല്ലിന്റെ സഹായത്തോടെ വിവിധ സ്ഥലങ്ങളിലെ സി.സി.ടി.വി ദൃശ്യങ്ങൾ പരിശോധിക്കുകയും ടോൾ പ്ലാസകളിലെ രേഖകൾ ശേഖരിച്ച് വാഹനത്തിന്റെ യാത്രാമാർഗം പുനർനിർമിക്കുകയും ചെയ്തു. പ്രതികളുമായി ബന്ധപ്പെട്ട ബാങ്ക് ഇടപാടുകളും പരിശോധിച്ചു. ഇങ്ങനെ പല ഘട്ടങ്ങളിലായി നടത്തിയ അന്വേഷണത്തിനൊടുവിൽ സേലത്തിന് സമീപം ഒമല്ലൂരിൽനിന്ന് ഏകദേശം 80 കിലോമീറ്റർ അകലെയുള്ള ഒറ്റപ്പെട്ട സ്ഥലത്ത് ലോറി കണ്ടെത്തുകയായിരുന്നു. ചൊവ്വാഴ്ചയാണ് തിരുനെല്ലി പോലീസ് വാഹനം വീണ്ടെടുത്തത്. അപ്പോഴേക്കും ലോറി പൊളിച്ചുമാറ്റുന്നതിനായി സ്ക്രാപ്പ് യാർഡിലേക്ക് മാറ്റാനുള്ള ഒരുക്കങ്ങൾ നടന്നുവരികയായിരുന്നുവെന്നാണ് റിപ്പോർട്ട്. വാഹനത്തിന്റെ സ്പെയർ പാർട്സുകൾ വേർതിരിച്ച് സെക്കൻഡ് ഹാൻഡ് വിപണിയിൽ വിൽക്കാനായിരുന്നു പദ്ധതിയെന്നും പോലീസ് പറയുന്നു.അന്വേഷണത്തിന് നേതൃത്വം നൽകിയ തിരുനെല്ലി പോലീസ് സംഘത്തിൽ സിവിൽ പോലീസ് ഓഫീസർമാരായ എം.ആർ. ജിതിനും ഇ.ജി. വിനായകും ഉൾപ്പെടെയുള്ള ഉദ്യോഗസ്ഥരുണ്ടായിരുന്നു. മുതിർന്ന പോലീസ് ഉദ്യോഗസ്ഥരുടെ മേൽനോട്ടത്തിലായിരുന്നു അന്വേഷണം. എന്നാൽ കേസിലെ പ്രധാന പ്രതി ഇപ്പോഴും ഒളിവിലാണെന്നാണ് പോലീസ് അറിയിച്ചിരിക്കുന്നത്. ഉടമയുടെ കൈവശത്തുനിന്ന് കാണാതായ വാഹനം പല സംസ്ഥാനങ്ങളിലൂടെ സഞ്ചരിച്ച് 26-ലധികം പേരുമായി ബന്ധപ്പെട്ട ഇടപാടുകൾക്കുശേഷം സ്ക്രാപ്പ് യാർഡിലെത്താനിരിക്കെ കണ്ടെത്തിയ സംഭവം വാഹനമോഷണ സംഘങ്ങളുടെ