പെരിയ ഇരട്ടക്കൊലക്കേസിലെ പ്രതികൾക്ക് കൂട്ടത്തോടെ പരോൾ അനുവദിച്ച നടപടിയിൽ ഗുരുതരമായ ചട്ടലംഘനം നടന്നതായി കണ്ടെത്തൽ. പരോൾ അനുവദിക്കുന്നതിന് മുൻപ് പാലിക്കേണ്ട സുപ്രധാനമായ നടപടിക്രമങ്ങളൊന്നും തന്നെ ജയിൽ വകുപ്പ് പാലിച്ചില്ലെന്നാണ് വ്യക്തമാകുന്നത്. ജില്ലാ പ്രൊബേഷൻ ഓഫീസറുടെയോ ലോക്കൽ പൊലീസിന്റെയോ റിപ്പോർട്ടുകൾ തേടാനോ, പരോൾ കാലയളവിലെ ക്രമസമാധാന പ്രശ്നങ്ങൾ വിലയിരുത്താനോ അധികൃതർ തയ്യാറായില്ല. കോടതി ഉത്തരവ് പ്രകാരമാണ് നടപടിയെന്നാണ് ജയിൽ വകുപ്പിന്റെ വിശദീകരണമെങ്കിലും, പരോൾ വ്യവസ്ഥകളിലെ മാറ്റം മാത്രമാണ് കോടതി പരാമർശിച്ചിരുന്നത്.
എൽഡിഎഫ് സർക്കാർ അധികാരമൊഴിയുന്നതിന് തൊട്ടുമുമ്പുള്ള ദിവസങ്ങളിലാണ് ഇത്രയും വലിയൊരാനുകൂല്യം പ്രതികൾക്ക് ലഭിച്ചത്. സംഭവത്തിൽ അന്ന് ആഭ്യന്തരമന്ത്രിയായിരുന്ന രമേശ് ചെന്നിത്തല അടിയന്തര റിപ്പോർട്ട് ആവശ്യപ്പെട്ടിരുന്നു. പരോൾ നടപടികൾ സംബന്ധിച്ച വസ്തുതകൾ സമഗ്രമായി അന്വേഷിച്ച് റിപ്പോർട്ട് നൽകാനും, തുടർന്ന് കർശന നടപടി സ്വീകരിക്കാനുമായിരുന്നു നിർദ്ദേശം.
2019 ഫെബ്രുവരി 17-ന് കാസർകോട് പെരിയയിലെ കല്യോട്ട് വെച്ചാണ് യൂത്ത് കോൺഗ്രസ് പ്രവർത്തകരായ ശരത് ലാലും (23) കൃപേഷും (19) ക്രൂരമായി കൊലചെയ്യപ്പെട്ടത്. ബൈക്കിൽ സഞ്ചരിക്കുകയായിരുന്ന ഇവരെ തടഞ്ഞുനിർത്തി പ്രതികൾ വെട്ടിക്കൊല്ലുകയായിരുന്നു. 22 മാസം നീണ്ട വിചാരണയ്ക്കൊടുവിൽ പീതാംബരൻ ഉൾപ്പെടെയുള്ള പത്ത് പ്രതികളെ ജീവപര്യന്തം തടവിന് കോടതി ശിക്ഷിച്ചിരുന്നു.