ചുറ്റും മണ്ണ്… മുകളിൽ ഇരുട്ട്… പുറത്തുനിന്നുള്ള ലോകവുമായി യാതൊരു ബന്ധവുമില്ലാതെ ഒരു പകലും രാത്രിയും. ശ്വാസമെടുക്കാൻ പോലും പ്രയാസകരമായ സാഹചര്യത്തിൽ 11 മാസം മാത്രം പ്രായമുള്ള കുഞ്ഞ് മരണത്തോട് മല്ലിടുകയായിരുന്നു. ഒടുവിൽ, ഏകദേശം 24 മണിക്കൂറുകൾക്ക് ശേഷം മണ്ണിനടിയിൽനിന്ന് ആ കുഞ്ഞിന്റെ കരച്ചിൽ ഉയർന്നു! അമേരിക്കയിലെ സൗത്ത് കരോലൈനയിൽ നടന്ന ഈ സംഭവം കേൾക്കുന്നവരെയെല്ലാം ഞെട്ടിക്കുന്നതാണ്. കോവ ഷാർപ്പ് എന്ന 11 മാസം പ്രായമുള്ള കുഞ്ഞിനെ ജീവനോടെ കുഴിച്ചുമൂടിയ നിലയിൽ കണ്ടെത്തി അത്ഭുതകരമായി രക്ഷപ്പെടുത്തുകയായിരുന്നു. നായ്ക്കൾക്കുള്ള കൂട്ടിനുള്ളിലാക്കി തുണിയിൽ പൊതിഞ്ഞ നിലയിലായിരുന്നു കുഞ്ഞിനെ മണ്ണിനടിയിൽ കണ്ടെത്തിയത്. ലെക്സിങ്ടൺ കൗണ്ടിയിൽ കാണാതായ കുഞ്ഞിനായി നൂറോളം രക്ഷാപ്രവർത്തകർ ഒരു പകൽ മുഴുവൻ തിരച്ചിൽ നടത്തി. ഒടുവിൽ കാട്ടുപ്രദേശത്ത് പുതുതായി മണ്ണിട്ട ഒരു സ്ഥലം കണ്ടെത്തിയതോടെയാണ് നിർണായക വഴിത്തിരിവുണ്ടായത്. അവിടെ കുഴിച്ചുനോക്കിയപ്പോഴാണ് നായ്ക്കൂടിനുള്ളിൽ കുഞ്ഞിനെ കണ്ടെത്തിയത്. മണ്ണിനടിയിൽനിന്ന് പുറത്തെടുക്കുമ്പോൾ കുഞ്ഞ് കരയുന്നുണ്ടായിരുന്നുവെന്ന് രക്ഷാപ്രവർത്തകർ പറഞ്ഞു. നായ്ക്കൂടിന് ചുറ്റും പൊതിഞ്ഞിരുന്ന തുണിക്കിടയിൽ രൂപപ്പെട്ട വായുസഞ്ചാരമുള്ള ചെറിയ ഇടവും തണുത്ത കാലാവസ്ഥയുമാകാം ഇത്രയും സമയം കുഞ്ഞിന്റെ ജീവൻ നിലനിർത്തിയതെന്നാണ് പ്രാഥമിക നിഗമനം. ആശുപത്രിയിൽ പ്രവേശിപ്പിച്ച കുഞ്ഞിനെ രാത്രി വിട്ടയച്ചു. നിലവിൽ ബന്ധുക്കളുടെ സംരക്ഷണയിലാണ് കുഞ്ഞ്.
സംഭവത്തിൽ കുഞ്ഞിന്റെ പിതാവ് 25 വയസ്സുകാരനായ മൈക്കൽ കോമറിനെ വധശ്രമം ഉൾപ്പെടെയുള്ള കുറ്റങ്ങൾ ചുമത്തി പോലീസ് അറസ്റ്റ് ചെയ്തു. മുത്തശ്ശിയുടെ സംരക്ഷണത്തിലായിരുന്ന കുഞ്ഞിനെ മറ്റൊരു പരിചാരകൻ എത്തുന്നതുവരെ അച്ഛനെ ഏൽപ്പിച്ചതായിരുന്നു. എന്നാൽ പരിചാരകൻ എത്തിയപ്പോൾ അച്ഛനെയും കുഞ്ഞിനെയും കണ്ടെത്താനായില്ല. ഇതോടെയാണ് തിരച്ചിൽ ആരംഭിച്ചത്. ഒടുവിൽ നടത്തിയ അന്വേഷണമാണ് കാട്ടുപ്രദേശത്തെ മണ്ണിനടിയിലേക്ക് രക്ഷാപ്രവർത്തകരെ എത്തിച്ചത്. എന്നാൽ, സ്വന്തം കുഞ്ഞിനെ ജീവനോടെ കുഴിച്ചുമൂടാൻ പിതാവിനെ പ്രേരിപ്പിച്ചതെന്താണെന്ന ചോദ്യം ഇപ്പോഴും അവശേഷിക്കുകയാണ്. കുഞ്ഞിന്റെ അമ്മയുമായുള്ള തർക്കങ്ങളും ഗാർഹികപീഡനവുമായി ബന്ധപ്പെട്ട പ്രശ്നങ്ങളും സംഭവത്തിന് പിന്നിലുണ്ടോ എന്ന കാര്യം അന്വേഷണസംഘം പരിശോധിക്കുന്നുണ്ട്. അമ്മയ്ക്കൊപ്പം ഒരേ സംസ്ഥാനത്ത് കഴിയാൻ താൽപര്യമില്ലെന്നും കുഞ്ഞിനെ ന്യൂയോർക്കിലേക്ക് കൊണ്ടുപോകാൻ ആഗ്രഹമുണ്ടെന്നും മൈക്കൽ പറഞ്ഞിരുന്നതായി കുഞ്ഞിന്റെ വലിയമ്മ വെളിപ്പെടുത്തിയിട്ടുണ്ട്.ഒരു പകലും രാത്രിയും മണ്ണിനടിയിൽ കഴിഞ്ഞിട്ടും ജീവിതത്തിലേക്ക് തിരിച്ചെത്തിയ കുഞ്ഞിന്റെ അതിജീവനം അത്ഭുതകരമാണ്. എന്നാൽ ഈ സംഭവത്തിൽ ഉയരുന്ന ഏറ്റവും വലിയ ചോദ്യം, ഇത്രയും ചെറിയൊരു കുഞ്ഞിനോട് ഇത്തരമൊരു ക്രൂരത കാട്ടാൻ എന്താണ് കാരണമെന്നതാണ്. കുടുംബത്തിനുള്ളിലെ തർക്കങ്ങളാണോ അതോ മറ്റെന്തെങ്കിലും കാരണങ്ങളാണോ സംഭവത്തിന് പിന്നിലെന്ന് പോലീസ് അന്വേഷണത്തിലൂടെ വ്യക്തമാകേണ്ടതുണ്ട്. കുഞ്ഞിന്റെ ജീവൻ രക്ഷിച്ച നൂറോളം രക്ഷാപ്രവർത്തകരുടെ തിരച്ചിൽ ഒരു ദുരന്തത്തിന്റെ വക്കിൽനിന്ന് ആ കുരുന്നിനെ ജീവിതത്തിലേക്ക് തിരികെയെത്തിച്ചപ്പോൾ, സംഭവത്തിന്റെ പിന്നിലെ യഥാർഥ കാരണങ്ങൾ പുറത്തുകൊണ്ടുവരാനുള്ള അന്വേഷണത്തിലേക്കാണ് ഇനി ലോകത്തിന്റെ ശ്രദ്ധ.