തിരുവനന്തപുരം ബാലരാമപുരം ജംഗ്ഷന് സമീപമുള്ള കല്ലമ്പലത്ത് പ്രവർത്തിക്കുന്ന ടൂവീലർ വർക്ക്ഷോപ്പിൽ വൻ തീപിടിത്തം. ദേശീയപാതയോരത്തെ ‘പെൻഗ്വിൻ ടൂവിലർ വർക്ക്ഷോപ്പിനാണ്’ ഇന്നലെ രാത്രിയോടെ തീപിടിച്ചത്. അപകടത്തിൽ സർവീസിനായി സൂക്ഷിച്ചിരുന്ന എട്ടോളം ഇരുചക്ര വാഹനങ്ങൾ പൂർണ്ണമായി കത്തിനശിച്ചു. കൂടാതെ കടയ്ക്കുള്ളിലുണ്ടായിരുന്ന സർവീസ് ഉപകരണങ്ങൾക്കും കെട്ടിടത്തിനും വലിയ തോതിൽ നാശനഷ്ടങ്ങൾ സംഭവിച്ചിട്ടുണ്ട്. തീപിടിത്തം നടക്കുമ്പോൾ സ്ഥാപനത്തിൽ ജീവനക്കാർ ആരും ഇല്ലാതിരുന്നതിനാൽ വലിയൊരു ദുരന്തം ഒഴിവായി.
തീ പടരുന്നത് കണ്ട് നെയ്യാറ്റിൻകരയിൽ നിന്നെത്തിയ രണ്ട് ഫയർഫോഴ്സ് യൂണിറ്റുകളും പ്രാദേശിക പോലീസും ചേർന്നാണ് മണിക്കൂറുകൾ നീണ്ട പരിശ്രമത്തിനൊടുവിൽ തീയണച്ചത്. സമയോചിതമായ ഇടപെടൽ കാരണം തൊട്ടടുത്തുള്ള മറ്റ് വ്യാപാര സ്ഥാപനങ്ങളിലേക്ക് തീ പടരുന്നത് തടയാനായി. പ്രാഥമിക പരിശോധനയിൽ ഷോർട്ട് സർക്യൂട്ടിനെ തുടർന്നാണ് തീപിടിത്തമുണ്ടായതെന്നാണ് സംശയിക്കുന്നത്. സംഭവത്തിൽ പോലീസും ഫയർഫോഴ്സും അന്വേഷണം ആരംഭിച്ചിട്ടുണ്ട്. ലക്ഷക്കണക്കിന് രൂപയുടെ സാമ്പത്തിക നഷ്ടമാണ് വ്യാപാരിക്ക് ഉണ്ടായിരിക്കുന്നത്.