തമിഴ്നാട് സർക്കാരിന്റെ മികച്ച നടിക്കുള്ള പുരസ്കാരം ഏറ്റുവാങ്ങിയതിന് പിന്നാലെ തന്റെ സന്തോഷം പങ്കുവെച്ച് നടി മഞ്ജു വാര്യർ രംഗത്തെത്തി. “ജീവിതം നിങ്ങൾക്കായി കരുതിവെച്ചത് നിങ്ങളെ തേടിയെത്തും” എന്ന മനോഹരമായ കുറിപ്പോടെയാണ് താരം സോഷ്യൽ മീഡിയയിൽ ഈ നേട്ടം ആഘോഷിച്ചത്. പുരസ്കാരം സ്വീകരിക്കുന്ന വീഡിയോയും ചിത്രങ്ങളും പങ്കുവെച്ച മഞ്ജുവിനെ അഭിനന്ദിച്ചുകൊണ്ട് നിരവധി ആരാധകരും സഹപ്രവർത്തകരുമാണ് രംഗത്തെത്തിയത്.
അസുരൻ എന്ന ചിത്രത്തിലെ അഭിനയത്തിനാണ് മഞ്ജുവിനെ തേടി ഈ അംഗീകാരമെത്തിയത്. ഈ അവസരത്തിൽ തമിഴ്നാട് ഗവൺമെന്റിനും ചിത്രത്തിലെ നായകൻ ധനുഷിനും സംവിധായകൻ വെട്രിമാരനും നിർമാതാവ് കലൈപുലി എസ്. താണുവിനും അസുരൻ ടീമിലെ ഓരോരുത്തർക്കും നടി നന്ദി രേഖപ്പെടുത്തി. ഭാഷയുടെ അതിർവരമ്പുകൾ ഭേദിച്ച് തന്നെ സ്നേഹിക്കുന്ന ആരാധകരോടുള്ള പ്രത്യേക കടപ്പാടും താരം തന്റെ കുറിപ്പിലൂടെ അറിയിച്ചു.
2016 മുതൽ 2022 വരെയുള്ള ഏഴ് വർഷത്തെ പുരസ്കാരങ്ങളാണ് തമിഴ്നാട് സർക്കാർ ഒന്നിച്ച് പ്രഖ്യാപിച്ചത്. മഞ്ജു വാര്യർക്ക് പുറമെ അപർണ ബാലമുരളി, ലിജോമോൾ ജോസ്, നയൻതാര, കീർത്തി സുരേഷ് തുടങ്ങിയ മലയാളി നടിമാരും വിവിധ വർഷങ്ങളിലായി മികച്ച നടിക്കുള്ള പുരസ്കാരത്തിന് അർഹരായി. ഇവരെ കൂടാതെ ജ്യോതിക, സായ് പല്ലവി എന്നിവരും ഈ നേട്ടം സ്വന്തമാക്കി. അപർണ ബാലമുരളിയും കീർത്തി സുരേഷും പുരസ്കാരം സ്വീകരിക്കുന്ന ചിത്രങ്ങൾ സോഷ്യൽ മീഡിയയിൽ പങ്കുവെച്ചിട്ടുണ്ട്.