ദക്ഷിണേന്ത്യൻ സംസ്ഥാനങ്ങളിലെ മുഖ്യമന്ത്രിമാരുടെയും കേന്ദ്രഭരണ പ്രദേശങ്ങളിലെ പ്രതിനിധികളുടെയും പ്രധാന യോഗത്തിന് മുന്നോടിയായി, കേന്ദ്ര ആഭ്യന്തര മന്ത്രി അമിത് ഷാ ചെന്നൈയിൽ തമിഴ്നാട് മുഖ്യമന്ത്രിയുമായി കൂടിക്കാഴ്ച നടത്തി. ജലവിഭജന തർക്കങ്ങൾ, പ്രാദേശിക വികസനം തുടങ്ങിയ ദീർഘകാലമായി നിലനിൽക്കുന്ന അന്തർസംസ്ഥാന വിഷയങ്ങൾ ചർച്ച ചെയ്യാൻ കേന്ദ്രവും ദക്ഷിണേന്ത്യൻ സംസ്ഥാനങ്ങളും തയ്യാറെടുക്കുന്നതിനിടയാണ് ഈ നിർണായക സന്ദർശനം. മുഖ്യമന്ത്രി ചുമതലയേറ്റെടുത്തതിന് ശേഷമുള്ള ഇരുവരുടെയും ആദ്യ കൂടിക്കാഴ്ചയാണിത്.
ഓഗസ്റ്റ് 20 – ന് നടക്കുന്ന സോണൽ കൗൺസിൽ യോഗത്തിൽ കേന്ദ്ര ആഭ്യന്തര മന്ത്രി അമിത് ഷാ അധ്യക്ഷത വഹിക്കും. ആതിഥേയ മുഖ്യമന്ത്രി എന്ന നിലയിൽ തമിഴ്നാട് മുഖ്യമന്ത്രി കൗൺസിലിന്റെ വൈസ് ചെയർമാനായി പ്രവർത്തിക്കും. ആന്ധ്രാപ്രദേശ്, കർണാടക, കേരളം, തമിഴ്നാട്, തെലങ്കാന എന്നീ സംസ്ഥാനങ്ങളും പുതുച്ചേരി, ആൻഡമാൻ നിക്കോബാർ ദ്വീപുകൾ, ലക്ഷദ്വീപ് എന്നീ കേന്ദ്രഭരണ പ്രദേശങ്ങളും ഉൾപ്പെടുന്നതാണ് ദക്ഷിണ മേഖല കൗൺസിൽ. അന്തർസംസ്ഥാന പ്രശ്നങ്ങൾ പരിഹരിക്കുന്നതിനും പ്രാദേശിക സഹകരണം ശക്തിപ്പെടുത്തുന്നതിനുമുള്ള പ്രധാന വേദിയായാണ് ഇത് പ്രവർത്തിക്കുന്നത്.
കർണാടകയും തമിഴ്നാടും, തെലങ്കാനയും ആന്ധ്രാപ്രദേശും, തമിഴ്നാടും കേരളവും തമ്മിലുള്ള നദീജലം പങ്കിടൽ തർക്കങ്ങൾ യോഗത്തിൽ പ്രധാന ചർച്ചയാകും. കൂടാതെ സ്ത്രീകൾക്കും കുട്ടികൾക്കുമെതിരായ കുറ്റകൃത്യങ്ങൾ വേഗത്തിൽ തീർപ്പാക്കാനുള്ള ഫാസ്റ്റ് ട്രാക്ക് കോടതികളുടെ പ്രവർത്തനം, വിദ്യാഭ്യാസവുമായി ബന്ധപ്പെട്ട പ്രശ്നങ്ങൾ, ആന്ധ്രാപ്രദേശ് പുനഃസംഘടന നിയമം, പ്രധാനമന്ത്രി ആവാസ് യോജന തുടങ്ങിയ വിഷയങ്ങളും ചർച്ചകളിൽ ഉൾപ്പെടും. ആഭ്യന്തര മന്ത്രാലയത്തിന് കീഴിലുള്ള ഇന്റർ-സ്റ്റേറ്റ് കൗൺസിൽ സെക്രട്ടേറിയറ്റാണ് ഈ യോഗം സംഘടിപ്പിക്കുന്നത്.