മുൻ എം.പി കെ. കവിത ‘തെലങ്കാന രാഷ്ട്ര സേന’ (TRS) എന്ന പേരിൽ പുതിയ രാഷ്ട്രീയ പാർട്ടി പ്രഖ്യാപിച്ചതിനെതിരെ കടുത്ത പരിഹാസവുമായി ഭാരത് രാഷ്ട്ര സമിതി (BRS). ബി.ആർ.എസിന്റെ പഴയ പേരിനോട് സാമ്യമുള്ള ചുരുക്കപ്പേര് സ്വീകരിച്ച കവിതയുടെ നീക്കത്തെ പരിഹസിച്ചുകൊണ്ട്, “ഒറിജിനൽ എപ്പോഴും ഒറിജിനൽ തന്നെയായിരിക്കും” എന്ന് ബി.ആർ.എസ് എക്സ് പ്ലാറ്റ്ഫോമിൽ കുറിച്ചു.
പ്രശസ്തമായ ബ്രാൻഡുകളെയും അവയുടെ വ്യാജപ്പതിപ്പുകളെയും താരതമ്യം ചെയ്യുന്ന ചിത്രങ്ങൾ പങ്കുവെച്ചുകൊണ്ടാണ് ബി.ആർ.എസ് കവിതയ്ക്കെതിരെ പ്രത്യാക്രമണം നടത്തിയത്.
യഥാർത്ഥ ബ്രാൻഡായ ‘കോൾഗേറ്റി’നൊപ്പം അതിന്റെ വ്യാജപ്പതിപ്പായ ‘കൂൾഗേറ്റ്’ വെച്ചുകൊണ്ടുള്ള ചിത്രം ഇതിൽ പ്രധാനപ്പെട്ട ഒന്നായിരുന്നു. പേരിൽ ചെറിയ മാറ്റം വരുത്തി വിപണിയിലിറക്കുന്ന അനുകരണങ്ങളെപ്പോലെയാണ് കവിതയുടെ പുതിയ പാർട്ടിയെന്നാണ് ഇതിലൂടെ ബി.ആർ.എസ് അർത്ഥമാക്കുന്നത്.
മറ്റൊരു ചിത്രത്തിൽ കുടിവെള്ള ബ്രാൻഡായ ‘ബിസ്ലേരി’യും അതിന്റെ വ്യാജപ്പതിപ്പായ ‘ബ്രിസ്ലി’യുമാണ് ഉൾപ്പെടുത്തിയിരിക്കുന്നത്. ജനങ്ങൾക്കിടയിൽ വിശ്വാസ്യതയുള്ള യഥാർത്ഥ പ്രസ്ഥാനം ബി.ആർ.എസ് ആണെന്നും, പുതിയ പാർട്ടി വെറും നിഴൽ മാത്രമാണെന്നും പരോക്ഷമായി സൂചിപ്പിക്കുന്നതായിരുന്നു ഈ പോസ്റ്റ്. പാർട്ടിയുടെ പേര് മാറ്റത്തിന് മുൻപുള്ള വികാരം ചൂഷണം ചെയ്യാനാണ് കവിത ടി.ആർ.എസ് എന്ന പേര് തിരഞ്ഞെടുത്തതെന്ന വിമർശനം ഇതിനോടകം ഉണ്ടായി.