സംസ്ഥാനത്ത് എൽനിനോ പ്രതിഭാസത്തിന്റെ സ്വാധീനമുള്ള ഈ കാലവർഷക്കാലത്ത് ഇതുവരെയുള്ള മൂന്ന് മാസത്തിനിടെ 22 ശതമാനം മഴയുടെ കുറവാണ് രേഖപ്പെടുത്തിയിരിക്കുന്നതെന്ന് കാലാവസ്ഥാ വകുപ്പിന്റെ കണക്കുകൾ വ്യക്തമാക്കുന്നു. കഴിഞ്ഞ എൽനിനോ വർഷമായ 2023-ൽ 48 ശതമാനം മഴക്കുറവ് രേഖപ്പെടുത്തിയതുമായി താരതമ്യം ചെയ്യുമ്പോൾ ഇത്തവണ ലഭിച്ചത് മെച്ചപ്പെട്ട മഴയാണ്. ജൂൺ, ജൂലൈ മാസങ്ങളിൽ മഴ കാര്യമായി കുറഞ്ഞെങ്കിലും, ഓഗസ്റ്റ് മാസത്തിൽ ലഭിച്ച മികച്ച മഴയാണ് വലിയൊരു ആശ്വാസമായത്.
ഔദ്യോഗിക ഡാറ്റ പ്രകാരം സംസ്ഥാനത്തെ 7 ജില്ലകളിൽ സാധാരണ മഴ (+/- 19%) ലഭിച്ചിട്ടുണ്ട്. പതിവുപോലെ ഇത്തവണയും കൂടുതൽ മഴ ലഭിച്ചത് കാസർഗോഡ്, കണ്ണൂർ ജില്ലകളിലാണ്. എങ്കിലും ഇവിടെ യഥാക്രമം 12%, 7% വീതം കുറവ് മഴയാണ് രേഖപ്പെടുത്തിയത്. ഏറ്റവും കുറവ് മഴ ലഭിച്ചത് കൊല്ലം, തിരുവനന്തപുരം ജില്ലകളിലാണ്. അതേസമയം, തിരുവനന്തപുരത്ത് സാധാരണ ലഭിക്കേണ്ട മഴയെക്കാൾ വെറും 1 ശതമാനത്തിന്റെ കുറവ് മാത്രമാണ് ഉണ്ടായിട്ടുള്ളത്. രാജ്യത്താകെ ഇത്തവണത്തെ കാലവർഷം സാധാരണയിൽ കുറയാൻ സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ ആദ്യ ഘട്ട പ്രവചനം വ്യക്തമാക്കിയിരുന്നത്.
കിഴക്കൻ പസഫിക് സമുദ്രത്തിലെ ഉപരിതല ജലം പതിവിലും ചൂടാകുന്ന സ്വാഭാവിക കാലാവസ്ഥാ രീതിയാണ് എൽ നിനോ. കാലാവസ്ഥാ വ്യതിയാനത്തിന്റെ ഭാഗമായി ശരാശരിയേക്കാൾ 6 ഡിഗ്രി സെൽഷ്യസ് വരെ താപനില ഉയർന്നേക്കുമെന്നാണ് മുന്നറിയിപ്പ്. സമുദ്രങ്ങളിൽ ഉഷ്ണതരംഗങ്ങൾ രൂപപ്പെടുന്നത് കടുത്ത വരൾച്ചയ്ക്കും ചിലയിടങ്ങളിൽ അപ്രതീക്ഷിതമായ കനത്ത മഴയ്ക്കും കാരണമാകും. മധ്യ, കിഴക്കൻ പസഫിക് സമുദ്രത്തിലെ സമുദ്രോപരിതല താപനിലയിലുണ്ടാകുന്ന അസ്വാഭാവികമായ മാറ്റങ്ങളാണ് എൽ നിനോയ്ക്ക് പ്രധാന കാരണം.