മട്ടാഞ്ചേരിയിൽ പാചകവാതക സിലിണ്ടറുകൾ തീർന്നതിനെത്തുടർന്ന് കടലിൽ പോയ മത്സ്യബന്ധന ബോട്ടുകൾ പകുതിവഴിയിൽ യാത്ര അവസാനിപ്പിച്ചു മടങ്ങുന്നു. തൊഴിലാളികൾക്ക് ഭക്ഷണം പാചകം ചെയ്യാൻ കഴിയാത്ത സാഹചര്യം വന്നതോടെയാണ് ബോട്ടുകൾക്ക് തിരിച്ചുവരേണ്ടി വന്നത്. മൂന്ന് ദിവസം മുൻപ് തോപ്പുംപടി ഫിഷറീസ് ഹാർബറിൽ നിന്ന് മത്സ്യബന്ധനത്തിനായി പുറപ്പെട്ട ആറോളം ബോട്ടുകളാണ് കഴിഞ്ഞ ദിവസം ഇത്തരത്തിൽ പാതിവഴിയിൽ മടങ്ങിയെത്തിയത്. കടലിൽ ദിവസങ്ങളോളം തങ്ങി ജോലി ചെയ്യുന്ന തൊഴിലാളികൾക്ക് ആഹാരം പാകം ചെയ്യാൻ മറ്റ് മാർഗങ്ങളില്ലാത്തതാണ് ഉടമകൾക്ക് വലിയ തിരിച്ചടിയായത്.
ഓരോ തവണയും മത്സ്യബന്ധനത്തിന് പുറപ്പെടുമ്പോൾ വലിയ സാമ്പത്തിക ബാധ്യതയാണ് ബോട്ട് ഉടമകൾ നേരിടുന്നത്. ചെറിയ ബോട്ടുകൾക്ക് പോലും 2000 ലിറ്ററോളം ഡീസൽ അടിക്കേണ്ടി വരുന്നുണ്ട്. ഇതിനുപുറമെ ഐസ്, റേഷൻ സാധനങ്ങൾ, തൊഴിലാളികളുടെ ബാറ്റ എന്നിവയടക്കം ഒരു യാത്രയ്ക്ക് കുറഞ്ഞത് മൂന്ന് മുതൽ നാല് ലക്ഷം രൂപ വരെ ചെലവാകും. കടലിൽ മത്സ്യലഭ്യത പൊതുവെ കുറഞ്ഞ സാഹചര്യത്തിൽ, നിശ്ചിത ദിവസം പൂർത്തിയാക്കാതെ മടങ്ങേണ്ടി വരുന്നത് ബോട്ട് ഉടമകൾക്ക് ലക്ഷങ്ങളുടെ കനത്ത നഷ്ടമാണ് വരുത്തിവെച്ചിരിക്കുന്നത്.
നിലവിലെ ഇന്ധനവില വർദ്ധനവിനിടയിൽ ഇത്തരത്തിലുള്ള അപ്രതീക്ഷിത പ്രതിസന്ധികൾ കൂടി ഉണ്ടാകുന്നത് മത്സ്യബന്ധന മേഖലയെ കൂടുതൽ തളർത്തുകയാണ്. തൊഴിലാളികൾ പട്ടിണിയിലാകുന്ന സാഹചര്യം ഒഴിവാക്കാൻ ബോട്ടുകൾക്ക് ഉടൻ കരയ്ക്കെത്തുകയല്ലാതെ മറ്റ് മാർഗ്ഗങ്ങളില്ലായിരുന്നു. വരും ദിവസങ്ങളിൽ വിപണിയിൽ മത്സ്യലഭ്യത കുറയാനും വില ഉയരാനും ഈ സാഹചര്യം കാരണമായേക്കുമെന്ന ആശങ്കയും ഉയരുന്നുണ്ട്.