ഐഫോൺ, ഐപാഡ്, മാക് ഉപകരണങ്ങൾ ഉപയോഗിക്കുന്നവർക്കും ഗൂഗിൾ ക്രോം ബ്രൗസർ ഉപയോഗിക്കുന്നവർക്കും അതീവ ജാഗ്രതാ നിർദ്ദേശം. ഉപയോക്താക്കളെ ലക്ഷ്യമിട്ടുള്ള ഒരു അജ്ഞാത ഹാക്കിംഗ് ക്യാമ്പയിൻ അഥവാ ‘സീറോ-ഡേ ആക്രമണം’ കണ്ടെത്തിയതിനെ തുടർന്ന് ആഗോള ടെക് ഭീമന്മാരായ ഗൂഗിളും ആപ്പിളും അടിയന്തര സുരക്ഷാ അപ്ഡേറ്റുകൾ പുറത്തിറക്കി. ഈ ആക്രമണം തടയുന്നതിനായി, ഉപയോക്താക്കൾ ഉടൻ തന്നെ അവരുടെ ഉപകരണങ്ങളിലും ക്രോം ബ്രൗസറിലും ലഭ്യമായ ഏറ്റവും പുതിയ സുരക്ഷാ പാച്ചുകൾ ഇൻസ്റ്റാൾ ചെയ്യേണ്ടത് അത്യാവശ്യമാണ്.
ഗൂഗിൾ ക്രോം ബ്രൗസറിൽ കണ്ടെത്തിയ ഗുരുതരമായ സുരക്ഷാ പിഴവുകൾ പരിഹരിക്കുന്നതിനായി ഗൂഗിൾ പുതിയ സുരക്ഷാ പാച്ച് പുറത്തിറക്കി. ഈ ബഗുകളിലൊന്ന് ഹാക്കർമാർ സജീവമായി ദുരുപയോഗം ചെയ്യുന്നുണ്ടെന്ന് (സീറോ-ഡേ ആക്രമണം) കമ്പനി സ്ഥിരീകരിച്ചിട്ടുണ്ട്. ഈ സുരക്ഷാ വീഴ്ച കണ്ടെത്തിയത് ആപ്പിളിന്റെ സുരക്ഷാ എഞ്ചിനീയറിംഗ് ടീമും ഗൂഗിളിന്റെ ത്രെറ്റ് അനാലിസിസ് ഗ്രൂപ്പും (TAG) സംയുക്തമായാണ്. സർക്കാർ ഹാക്കർമാരെയും ചാര സോഫ്റ്റ്വെയറുകളെയും നിരീക്ഷിക്കുന്നതിൽ വൈദഗ്ധ്യമുള്ള TAG ആണ് ബഗ് കണ്ടെത്തിയതെന്നതിനാൽ, ഈ ആക്രമണത്തിന് പിന്നിൽ ഒരു പ്രധാന സർക്കാർ ഏജൻസിയോ അതല്ലെങ്കിൽ വിദഗ്ദ്ധരായ പ്രൊഫഷണൽ ഹാക്കർമാരോ ആകാനാണ് സാധ്യത.
ഗൂഗിളിനൊപ്പം, ആപ്പിളും തങ്ങളുടെ പ്രധാന ഉൽപ്പന്നങ്ങളായ ഐഫോൺ, ഐപാഡ്, മാക്, വിഷൻ പ്രോ, ആപ്പിൾ ടിവി, ആപ്പിൾ വാച്ച്, സഫാരി ബ്രൗസർ എന്നിവയ്ക്കായി അടിയന്തര സുരക്ഷാ അപ്ഡേറ്റുകൾ പുറത്തിറക്കി. ഐഫോൺ, ഐപാഡ് ഉപകരണങ്ങളിലെ രണ്ട് ഗുരുതരമായ സുരക്ഷാ പിഴവുകളാണ് ആപ്പിൾ ഇതിലൂടെ പരിഹരിച്ചത്. പഴയ iOS പതിപ്പുകൾ ഉപയോഗിക്കുന്ന ചില ‘പ്രിവിലേജ്ഡ് വ്യക്തികളെ’ ലക്ഷ്യമിട്ടുള്ള അതിസങ്കീർണ്ണമായ ആക്രമണങ്ങൾക്ക് ഈ ബഗുകൾ ദുരുപയോഗം ചെയ്യപ്പെടാൻ സാധ്യതയുണ്ടെന്ന് കമ്പനി മുന്നറിയിപ്പ് നൽകിയിട്ടുണ്ട്.
‘സീറോ-ഡേ’ എന്നത് സോഫ്റ്റ്വെയർ നിർമ്മാതാക്കൾ ആ പിഴവ് തിരിച്ചറിയുന്നതിനും പരിഹരിക്കുന്നതിനും മുമ്പുതന്നെ ഹാക്കർമാർ കണ്ടെത്തി ചൂഷണം ചെയ്യുന്ന സുരക്ഷാ പാളിച്ചയെയാണ് സൂചിപ്പിക്കുന്നത്. ഇത്തരം ആക്രമണങ്ങൾക്കായി എൻഎസ്ഒ ഗ്രൂപ്പ് (പെഗാസസിന്റെ നിർമ്മാതാക്കൾ), പാരഗൺ സൊല്യൂഷൻസ് പോലുള്ള കമ്പനികൾ വികസിപ്പിച്ചെടുത്ത അത്യാധുനിക ടൂളുകളാണ് പലപ്പോഴും ഉപയോഗിക്കപ്പെടുന്നത്. ഈ ഹാക്കർമാരുടെ പ്രധാന ലക്ഷ്യം സാധാരണ ഉപയോക്താക്കളല്ല. മറിച്ച് പത്രപ്രവർത്തകർ, മനുഷ്യാവകാശ പ്രവർത്തകർ, പ്രമുഖ രാഷ്ട്രീയക്കാർ തുടങ്ങിയ പ്രത്യേക വിഭാഗത്തിൽപ്പെട്ട വ്യക്തികളെ ചാരപ്പണി ചെയ്യുക എന്നതാണ് ഇവരുടെ ലക്ഷ്യം.
ഗൂഗിളും ആപ്പിളും ചേർന്ന് ഈ ഗുരുതരമായ സുരക്ഷാ പ്രശ്നം പരിഹരിക്കുന്നതിനായി അതിവേഗം പ്രവർത്തിക്കുന്ന സാഹചര്യത്തിൽ, ഉപയോക്താക്കൾ സ്വന്തം സുരക്ഷ ഉറപ്പാക്കുന്നതിനായി ഒട്ടും വൈകാതെ അവരുടെ ഐഫോൺ, ഐപാഡ്, മാക്, ക്രോം ബ്രൗസർ ഉൾപ്പെടെയുള്ള എല്ലാ ഉപകരണങ്ങളും ഏറ്റവും പുതിയ സുരക്ഷാ പതിപ്പിലേക്ക് അപ്ഡേറ്റ് ചെയ്യണമെന്ന് ശക്തമായി നിർദ്ദേശിക്കുന്നു.