ആഗോള സാങ്കേതിക രംഗത്ത് പുതിയ വിപ്ലവത്തിന് തുടക്കമിട്ടുകൊണ്ട് ഇന്ത്യയിൽ വമ്പൻ ആർട്ടിഫിഷ്യൽ ഇന്റലിജൻസ് ഡാറ്റാ സെന്റർ നിർമിക്കാൻ റിലയൻസ് ഇൻഡസ്ട്രീസും മെറ്റാ പ്ലാറ്റ്ഫോംസും കൈകോർക്കുന്നു. ഗുജറാത്തിലെ ജാംനഗറിലാണ് അത്യാധുനിക സൗകര്യങ്ങളോടെയുള്ള ഈ ഹൈപ്പർസ്കെയിൽ ഡാറ്റാ സെന്റർ സ്ഥാപിക്കുന്നത്. ഇരുകമ്പനികളുടെയും പങ്കാളിത്തത്തിൽ 168 മെഗാവാട്ട് ശേഷിയുള്ള ഈ കേന്ദ്രം അടുത്ത രണ്ട് വർഷത്തിനുള്ളിൽ നിർമാണം പൂർത്തിയാക്കി പ്രവർത്തനസജ്ജമാക്കാനാണ് ലക്ഷ്യമിടുന്നത്. ഭാവിയിൽ വർദ്ധിച്ചുവരുന്ന ആവശ്യങ്ങൾക്കനുസരിച്ച് ഇതിന്റെ ശേഷി കൂടുതൽ വിപുലീകരിക്കാനുള്ള പ്രത്യേക വ്യവസ്ഥകളും കരാറിലുണ്ട്.
ഫേസ്ബുക്ക്, ഇൻസ്റ്റാഗ്രാം, വാട്ട്സ്ആപ്പ് എന്നിവയുടെ മാതൃകമ്പനിയായ മെറ്റയുടെ ഇന്ത്യയിലെ ആദ്യത്തെ ‘ബിൽറ്റ്-ടു-സ്യൂട്ട്’ എഐ ഡാറ്റാ സെന്ററാണിത്. തങ്ങളുടെ ആഗോള ഇൻഫ്രാസ്ട്രക്ചർ വിപുലീകരണത്തിന്റെ ഭാഗമായി റിലയൻസ് നിർമിക്കുന്ന ഈ കേന്ദ്രം മെറ്റ പാട്ടത്തിനെടുക്കുകയാണ് ചെയ്യുന്നത്. മെറ്റയുടെ പ്രധാന ബിസിനസ്സ് ആവശ്യങ്ങൾക്കും ആഗോളതലത്തിലുള്ള എഐ കമ്പ്യൂട്ടിങ് ആവശ്യങ്ങൾക്കും, പ്രത്യേകിച്ച് ഉപയോക്താക്കൾക്കായി കമ്പനി വികസിപ്പിക്കുന്ന ‘പേഴ്സണൽ സൂപ്പർഇന്റലിജൻസ്’ സംവിധാനങ്ങൾക്കും ആവശ്യമായ വലിയ കമ്പ്യൂട്ടിങ് കരുത്ത് ഈ കേന്ദ്രം നൽകും.
കരാർ പ്രകാരം ഡാറ്റാ സെന്ററിന്റെ രൂപകൽപ്പന, നിർമാണം എന്നിവ മുതൽ യൂട്ടിലിറ്റി മാനേജ്മെന്റ്, പുനരുപയോഗ ഊർജ്ജ വിതരണം, നെറ്റ്വർക്ക് കണക്റ്റിവിറ്റി, ദൈനംദിന പ്രവർത്തനങ്ങൾ വരെയുള്ള മുഴുവൻ സേവനങ്ങളും നൽകുന്നത് റിലയൻസ് ആയിരിക്കും. ഇതോടെ, ഇന്ത്യയിൽ വമ്പൻ ഹൈപ്പർസ്കെയിൽ എഐ അടിസ്ഥാന സൗകര്യങ്ങൾ ഒരുക്കിക്കൊടുക്കുന്ന ഒരൊറ്റ വിൻഡോ സൊല്യൂഷൻസ് പ്രൊവൈഡർ എന്ന നിലയിലേക്ക് റിലയൻസ് ഇൻഡസ്ട്രീസ് മാറും. മെറ്റയുടെ ഇന്ത്യയിലെ ഏറ്റവും വലിയ ഡിജിറ്റൽ വിപണിയെ കൂടുതൽ ശക്തമാക്കാൻ ഈ കേന്ദ്രത്തിലൂടെ സാധിക്കും.
പരിസ്ഥിതി സൗഹൃദപരമായ സവിശേഷതകളോടെയാണ് ജാംനഗറിലെ ഈ കേന്ദ്രം ഒരുങ്ങുന്നത്. ഡാറ്റാ സെന്ററിന്റെ സുഗമമായ പ്രവർത്തനത്തിന് പൂർണ്ണമായും പുനരുപയോഗ ഊർജ്ജമാണ് ഉപയോഗിക്കുക. ഇതിനായി ക്ലീൻമാക്സ്, ഫോർത്ത് പാർട്ണർ എനർജി എന്നീ കമ്പനികളുമായി സഹകരിച്ച് ഇന്ത്യയിലുടനീളം ഏകദേശം 1 ജിഗാവാട്ട് ശേഷിയുള്ള സൗരോർജ്ജ-കാറ്റാടി നിലയങ്ങൾ മെറ്റ ഉറപ്പാക്കിയിട്ടുണ്ട്. കൂടാതെ, പ്രദേശത്തെ ശുദ്ധജല സ്രോതസ്സുകളെ ബാധിക്കാത്ത രീതിയിൽ, കടൽവെള്ളം ശുദ്ധീകരിച്ച് അത്യാധുനിക കൂളിംഗ് സംവിധാനങ്ങൾ പ്രവർത്തിപ്പിക്കാനും പദ്ധതിയുണ്ട്. ഇതിനാവശ്യമായ മുഴുവൻ ചെലവും മെറ്റയാണ് വഹിക്കുന്നത്.