കസ്റ്റഡി മരണങ്ങളുടെ എണ്ണത്തിൽ ഈ വർഷം വലിയ വർദ്ധനവ്: കണക്ക് പുറത്ത് വിട്ട് കേന്ദ്ര ആഭ്യന്തര മന്ത്രാലയം

രാജ്യത്തെ കസ്റ്റഡി മരണങ്ങളുടെ എണ്ണത്തിൽ ഈ വർഷം വലിയ വർദ്ധനവുണ്ടായതായി കേന്ദ്ര ആഭ്യന്തര മന്ത്രാലയത്തിന്റെ ഞെട്ടിക്കുന്ന റിപ്പോർട്ട്. 2026 ജനുവരി 1 മുതൽ മാർച്ച് 15 വരെയുള്ള വെറും 74 ദിവസങ്ങൾക്കുള്ളിൽ ഇന്ത്യയിലുടനീളം 170 കസ്റ്റഡി മരണങ്ങളാണ് രേഖപ്പെടുത്തിയത്. കഴിഞ്ഞ വർഷം ഇതേ കാലയളവിൽ ഇത് 140 ആയിരുന്നു. പാർലമെന്റിൽ ആഭ്യന്തര സഹമന്ത്രി നിത്യാനന്ദ് റായ് ആണ് ഈ കണക്കുകൾ ഔദ്യോഗികമായി അവതരിപ്പിച്ചത്. മുൻ വർഷങ്ങളിൽ മരണനിരക്ക് കുറഞ്ഞുവരികയായിരുന്നുവെങ്കിലും ഈ വർഷത്തെ തുടക്കത്തിൽ തന്നെ കണക്കുകൾ ഉയരുന്നത് ഗൗരവകരമായ മനുഷ്യാവകാശ ലംഘനമായാണ് വിലയിരുത്തപ്പെടുന്നത്.

സംസ്ഥാനങ്ങൾ തിരിച്ചുള്ള കണക്കുകളിൽ 19 മരണങ്ങൾ റിപ്പോർട്ട് ചെയ്ത ബീഹാറാണ് പട്ടികയിൽ ഒന്നാമത്. തൊട്ടുപിന്നാലെ രാജസ്ഥാനും (18), ഉത്തർപ്രദേശും (15) ഉണ്ട്. ഗുജറാത്ത്, മഹാരാഷ്ട്ര, പഞ്ചാബ് എന്നീ സംസ്ഥാനങ്ങളിൽ 14 വീതം മരണങ്ങൾ റിപ്പോർട്ട് ചെയ്തപ്പോൾ ദക്ഷിണേന്ത്യൻ സംസ്ഥാനങ്ങളായ തമിഴ്‌നാട്ടിൽ ഏഴും തെലങ്കാനയിൽ അഞ്ചും മരണങ്ങൾ നടന്നു. കേരളത്തിൽ ഇതേ കാലയളവിൽ മൂന്ന് കസ്റ്റഡി മരണങ്ങളാണ് റിപ്പോർട്ട് ചെയ്തിട്ടുള്ളതെന്ന് ആഭ്യന്തര മന്ത്രാലയം വ്യക്തമാക്കി. ദേശീയ മനുഷ്യാവകാശ കമ്മീഷന്റെയും (NHRC) വിവിധ സംസ്ഥാന പോലീസിന്റെയും വിവരങ്ങൾ ക്രോഡീകരിച്ചാണ് ഈ റിപ്പോർട്ട് തയ്യാറാക്കിയിരിക്കുന്നത്.

പൊലീസിന്റെയും ജയിൽ അധികൃതരുടെയും ഭാഗത്തുനിന്നുള്ള സുരക്ഷാ വീഴ്ചകളിലേക്കും നിയമവിരുദ്ധമായ പീഡനങ്ങളിലേക്കും വിരൽ ചൂണ്ടുന്നതാണ് പുറത്തുവന്ന പുതിയ കണക്കുകൾ. 2021-22 കാലയളവിൽ 176 മരണങ്ങൾ റിപ്പോർട്ട് ചെയ്തിരുന്നുവെങ്കിലും പിന്നീട് വന്ന വർഷങ്ങളിൽ (2022-23ൽ 163, 2023-24ൽ 157) ഇത് കുറഞ്ഞുവരികയായിരുന്നു. എന്നാൽ ഈ വർഷത്തെ പെട്ടെന്നുള്ള വർദ്ധനവ് നിയമപാലന സംവിധാനങ്ങളിലെ പോരായ്മകളെക്കുറിച്ചുള്ള വലിയ ചർച്ചകൾക്ക് വഴിതുറന്നിരിക്കുകയാണ്. കസ്റ്റഡിയിൽ കഴിയുന്നവരുടെ സുരക്ഷ ഉറപ്പാക്കാൻ കർശനമായ നടപടികൾ സ്വീകരിക്കണമെന്ന ആവശ്യവും ശക്തമാവുകയാണ്.