ആഗോള അയ്യപ്പ സംഗമത്തിന്റെ ഓഡിറ്റ് റിപ്പോർട്ടിൽ ഗുരുതരമായ പിഴവുകൾ സംഭവിച്ചതായി തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ സമ്മതിച്ചു. ഹൈക്കോടതി നിശ്ചയിച്ച സമയപരിധി പാലിക്കാനായി റിപ്പോർട്ട് തിടുക്കത്തിൽ സമർപ്പിച്ചതാണ് ആശയക്കുഴപ്പങ്ങൾക്ക് കാരണമായതെന്നും ഇത് അന്തിമ റിപ്പോർട്ടല്ലെന്നും അദ്ദേഹം വാർത്താസമ്മേളനത്തിൽ വ്യക്തമാക്കി. ഓഡിറ്റർ ഉന്നയിച്ച സംശയങ്ങൾക്ക് കൃത്യമായ മറുപടി നൽകാത്തതാണ് റിപ്പോർട്ടിൽ അവ്യക്തതയുണ്ടാക്കിയത്. ഈ പിഴവുകൾ പരിഹരിച്ച് ഈ മാസം 27-നകം വ്യക്തത വരുത്തുമെന്നും ഇതിനായി പ്രത്യേക ടാസ്ക് ഫോഴ്സിനെ നിയോഗിച്ചതായും അദ്ദേഹം അറിയിച്ചു.
ഭക്ഷണ വിതരണം, ഭജന സംഘത്തിനുള്ള പ്രതിഫലം എന്നിവയുമായി ബന്ധപ്പെട്ട ക്ലെയിമുകളിൽ വീഴ്ചകൾ സംഭവിച്ചിട്ടുണ്ട്. എല്ലാ ക്ലെയിമുകളും ബോർഡിന് അംഗീകരിക്കാൻ കഴിയില്ല. പരിപാടിയുടെ ആകെ ചെലവ് 4.99 കോടി രൂപയായി നിജപ്പെടുത്താനാണ് ബോർഡിന്റെ തീരുമാനം. അദാനി ഗ്രൂപ്പിന്റെ 3.85 കോടി രൂപയുടെ സ്പോൺസർഷിപ്പ് ലഭിക്കുമെന്നാണ് പ്രതീക്ഷിക്കുന്നത്. ബാക്കിയുള്ള ഒരു കോടി 15 ലക്ഷം രൂപ കണ്ടെത്താൻ മുൻപ് വാഗ്ദാനം നൽകിയ മറ്റ് സ്പോൺസർമാരെ സമീപിക്കുമെന്നും ഇതിനായി ബോർഡിന്റെ തുക എടുക്കില്ലെന്നും പ്രസിഡന്റ് വ്യക്തമാക്കി.
പരിപാടിയുടെ നടത്തിപ്പുമായി ബന്ധപ്പെട്ട് ഊരാലുങ്കൽ ലേബർ കോൺട്രാക്ട് സൊസൈറ്റി 7 കോടി രൂപയാണ് ആവശ്യപ്പെടുന്നത്. ഊരാലുങ്കൽ ഉപകരാർ നൽകിയതിൽ തെറ്റില്ലെന്നും എന്നാൽ അവർ നൽകുന്ന ബില്ലുകൾ കൃത്യമായി പരിശോധിച്ച് മാത്രമേ തുക അനുവദിക്കൂ എന്നും ജയകുമാർ പറഞ്ഞു. ഓഡിറ്റുമായി ബന്ധപ്പെട്ട എല്ലാ സംശയങ്ങളും ദൂരീകരിച്ച ശേഷം മാത്രമേ പുതുക്കിയ റിപ്പോർട്ട് ഹൈക്കോടതിക്ക് കൈമാറൂ. വിവാദങ്ങളുടെ പശ്ചാത്തലത്തിൽ സുതാര്യമായ രീതിയിൽ തുടർനടപടികൾ പൂർത്തിയാക്കാനാണ് ബോർഡ് ലക്ഷ്യമിടുന്നത്.