തിരുവനന്തപുരം: എൽപിഎസ്ടി അധ്യാപക നിയമന പ്രതിസന്ധിയിൽ മുഖ്യമന്ത്രി വി.ഡി. സതീശന്റെ പരാമർശങ്ങൾക്കെതിരെ കടുത്ത വിമർശനവുമായി സമര സമിതി കൺവീനർ വളർമതി. സ്കൂളുകളിലെ തസ്തിക നിർണ്ണയ അനുപാതം കുറയ്ക്കുന്ന കാര്യത്തിൽ മാത്രമാണ് തീരുമാനമാകാനുള്ളതെന്ന പ്രസ്താവന ജനങ്ങളെ തെറ്റിദ്ധരിപ്പിക്കാനാണോ അതോ വിഷയം അറിയാഞ്ഞിട്ടാണോ എന്ന് വളർമതി ചോദിച്ചു. എച്ച്എസ്എ വിഭാഗത്തിൽ അനുപാതം കുറച്ച സർക്കാരിന് എൽപിഎസ്ടിയിൽ അത് നടപ്പാക്കാൻ എന്താണ് തടസ്സമെന്നും അവർ ചോദ്യമുയർത്തി.
സംസ്ഥാനത്തെ എല്ലാ എൽപി സ്കൂളുകളിലുമല്ല, മറിച്ച് ഡിവിഷൻ ഫോൾ ഉള്ളയിടങ്ങളിൽ മാത്രം തസ്തിക അനുപാതം കുറയ്ക്കാനാണ് സമര സമിതി ആവശ്യപ്പെടുന്നത്. നിലവിൽ കുട്ടികളുടെ കുറവുമൂലം എണ്ണൂറോളം അധ്യാപകരാണ് പുറത്തുനിൽക്കുന്നത്. ഈ പ്രതിസന്ധിക്ക് ഏക പരിഹാരം തസ്തിക അനുപാതം പുനർനിർണ്ണയിക്കൽ മാത്രമാണെന്ന് വളർമതി ചൂണ്ടിക്കാട്ടി. എയ്ഡഡ് സ്കൂളുകളുടെ പ്രശ്നങ്ങൾക്ക് ഉടൻ പരിഹാരം കാണുന്ന സർക്കാർ, സാധാരണക്കാരെയും പൊതുവിദ്യാഭ്യാസത്തെയും വഞ്ചിക്കുന്ന സമീപനമാണ് സ്വീകരിക്കുന്നത്.
തന്റെ കണ്ണീരിൽ നിന്നും പ്രതിഷേധത്തിൽ നിന്നുമൊക്കെ മൂന്ന് കേസുകളാണ് സർക്കാർ ചുമത്തിയത്. തല മുണ്ഡനം ചെയ്ത് പ്രതിഷേധിക്കേണ്ടി വന്നത് സർക്കാരിന്റെ തോൽവിയാണ്. “ഇനി സർക്കാരുമായി യാതൊരു ചർച്ചയ്ക്കുമില്ല. ഉത്തരവ് വരുന്നത് വരെ സമരം തുടരും. മറുപടി പറയാൻ താല്പര്യമില്ലെങ്കിൽ കുഴപ്പമില്ല, പക്ഷേ ഉളുപ്പില്ലാത്ത ന്യായീകരണങ്ങളുമായി വരരുത്. ഭരണത്തിലിരിക്കുമ്പോൾ ഒന്നും പുറത്തിരിക്കുമ്പോൾ മറ്റൊന്നും പറയുന്നത് ശരിയല്ല,” വളർമതി കട്ടായമായി വ്യക്തമാക്കി.