ഇന്ത്യൻ രാഷ്ട്രീയത്തിലും ഡിജിറ്റൽ ലോകത്തും വൻ കോലാഹലങ്ങൾക്ക് തിരികൊളുത്തിക്കൊണ്ട് ആം ആദ്മി പാർട്ടി (എഎപി) ദേശീയ കൺവീനറും ഡൽഹി മുൻമുഖ്യമന്ത്രിയുമായ അരവിന്ദ് കെജ്രിവാളിന്റെ സോഷ്യൽ മീഡിയ അക്കൗണ്ട് മെറ്റാ നിയന്ത്രിച്ചതായുള്ള വാർത്ത പുറത്തുവന്നിരിക്കുന്നു. പ്രധാനമന്ത്രി നരേന്ദ്ര മോദി സർക്കാരിന്റെ കടുത്ത രാഷ്ട്രീയ സമ്മർദ്ദത്തിന് സോഷ്യൽ മീഡിയ ഭീമനായ മെറ്റാ പൂർണ്ണമായും വഴങ്ങിയെന്നും, യാതൊരുവിധ ഔദ്യോഗിക വിശദീകരണവുമില്ലാതെയാണ് തന്റെ അക്കൗണ്ട് ഇന്ത്യയിൽ പരിമിതപ്പെടുത്തിയതെന്നും കെജ്രിവാൾ ശക്തമായ ഭാഷയിൽ ആരോപിച്ചു. ഈ സംഭവം രാജ്യത്തെ ആവിഷ്കാര സ്വാതന്ത്ര്യത്തെയും ഡിജിറ്റൽ ഇടങ്ങളിലെ രാഷ്ട്രീയ സെൻസർഷിപ്പിനെയുംക്കുറിച്ചുള്ള ഗൗരവമേറിയ ചർച്ചകൾക്കാണ് വീണ്ടും വഴിവെച്ചിരിക്കുന്നത്.
കേന്ദ്ര സർക്കാരിന്റെ ജനവിരുദ്ധ നയങ്ങൾക്കും സാമ്പത്തിക പദ്ധതികൾക്കുമെതിരെ ശക്തമായ വിമർശനങ്ങൾ ഉന്നയിക്കുന്നതിനിടയിലാണ് ഈ നടപടി ഉണ്ടായിരിക്കുന്നത് എന്നത് ശ്രദ്ധേയമാണ്. പ്രത്യേകിച്ചും, ഗവൺമെന്റിന്റെ E20 എത്തനോൾ പെട്രോളിൽ കലർത്തുന്ന ജനദ്രോഹ നടപടിക്കെതിരെ അരവിന്ദ് കെജ്രിവാൾ വളരെ സജീവമായ പ്രചാരണം നടത്തിവരികയായിരുന്നു. E20 ഇന്ധനത്തിന്റെ യാഥാർത്ഥ സുരക്ഷയെയും അതിന്റെ ശാസ്ത്രീയ പിന്തുണയെയും കുറിച്ച് അദ്ദേഹം നിരവധി ചോദ്യങ്ങൾ ഉയർത്തുകയും, ഈ ഇന്ധനം വ്യോമയാന മേഖലയിലേക്ക് വ്യാപിപ്പിക്കുന്നതിലെ ഗുരുതരമായ അപകടങ്ങളെക്കുറിച്ച് കടുത്ത ആശങ്കകൾ പ്രകടിപ്പിക്കുകയും ചെയ്തിരുന്നു. ജനങ്ങളെ ബാധിക്കുന്ന ഇത്തരം നിർണ്ണായക വിഷയങ്ങളിൽ ശക്തമായ ശബ്ദമുയർത്തുന്ന രാഷ്ട്രീയ നേതാവിന്റെ അക്കൗണ്ട് പെട്ടെന്ന് നിയന്ത്രണവിധേയമാക്കപ്പെട്ടത് കേവലം യാദൃശ്ചികമല്ലെന്നാണ് എഎപി കേന്ദ്രങ്ങൾ ആരോപിക്കുന്നത്.
മെറ്റയുടെ ഇന്ത്യയിലെ ഓഫീസുകളിൽ നേരിട്ട് നടത്തിയ വാക്കാലുള്ള അന്വേഷണങ്ങളിലാണ് തന്റെ അക്കൗണ്ട് രാജ്യത്തിനുള്ളിൽ മനപ്പൂർവ്വം നിയന്ത്രിച്ചിട്ടുണ്ടെന്ന ഞെട്ടിക്കുന്ന വിവരം സ്ഥിരീകരിക്കപ്പെട്ടതെന്ന് കെജ്രിവാൾ എക്സ് പ്ലാറ്റ്ഫോമിലൂടെ വ്യക്തമാക്കി. എന്നാൽ, എന്ത് കാരണത്താലാണ് ഈ നടപടി സ്വീകരിച്ചതെന്നോ, അക്കൗണ്ടിലെ നിയന്ത്രണങ്ങൾ എങ്ങനെ നീക്കം ചെയ്യാമെന്നോ ഉള്ള യാതൊരുവിധ മാർഗ്ഗനിർദ്ദേശങ്ങളും കമ്പനി ഉദ്യോഗസ്ഥർ നൽകാൻ തയ്യാറായില്ല. “ഹായ് മെറ്റാ, എന്തിനാണ് എന്റെ അക്കൗണ്ട് നിയന്ത്രിച്ചത്? നിങ്ങളുടെ ഓഫീസിലെ ആരും ഒരു കാരണവും പറയുന്നില്ല,” എന്ന് ചോദിച്ചുകൊണ്ട് അദ്ദേഹം കമ്പനിയെ പരസ്യമായി ചോദ്യം ചെയ്തു. പ്രധാനമന്ത്രി നരേന്ദ്ര മോദിയുടെ സർക്കാരിന് മുന്നിൽ അടിയറവ് പറയരുതെന്നും, അധികാരികളുടെ ഭീഷണികൾക്ക് മുമ്പിൽ മുട്ടുകുത്തരുതെന്നും അദ്ദേഹം സക്കർബർഗിന്റെ കമ്പനിയെ ഓർമ്മിപ്പിച്ചു.