ദീപാവലി ആഘോഷങ്ങൾക്ക് ശേഷം രാജ്യതലസ്ഥാനമായ ഡൽഹിയിലെ വായു മലിനീകരണം അതീവ രൂക്ഷമായി. ഇന്ന് രാവിലെ ഏഴ് മണിക്ക് നഗരത്തിലെ ശരാശരി വായു ഗുണനിലവാര സൂചിക (AQI) 347 രേഖപ്പെടുത്തി, ഇത് ‘അതീവ ഗുരുതരം’ എന്ന വിഭാഗത്തിലാണ് ഉൾപ്പെടുന്നത്.
എന്നാൽ, ഡൽഹിയിലെ പല പ്രദേശങ്ങളിലും സ്ഥിതി ഇതിലും മോശമാണ്. നോയിഡയിൽ 392 ആണ് AQI. അതേസമയം, നഗരത്തിൻ്റെ ചില ഭാഗങ്ങളിൽ സൂചിക 400-ഉം 500-ഉം കടന്നു. സെൻട്രൽ ഡൽഹിയിൽ 409, ആനന്ദ് വിഹാറിൽ 500, രോഹിണിയിൽ 500 എന്നിങ്ങനെയാണ് മലിനീകരണത്തിൻ്റെ തോത്.
കൂടാതെ, പഞ്ചാബി ബാഗിൽ 899, നാരായണയിൽ 611 എന്നിങ്ങനെ അപകടകരമായ നിലയിലാണ് വായു ഗുണനിലവാരം രേഖപ്പെടുത്തിയിരിക്കുന്നത്. നഗരത്തിലെ ആകെ 37 നിരീക്ഷണ കേന്ദ്രങ്ങളിൽ 34 എണ്ണവും ഇപ്പോൾ റെഡ് സോണിലാണ് (AQI 300-ന് മുകളിൽ) ഉൾപ്പെട്ടിരിക്കുന്നത്. ഈ കനത്ത മലിനീകരണം കാരണം ഡൽഹി നിവാസികൾ കടുത്ത ആശങ്കയിലാണ്.
ഡൽഹിയിലെ വായു ഗുണനിലവാരം അതീവ ഗുരുതരമായതിനെത്തുടർന്ന് കമ്മീഷൻ ഫോർ എയർ ക്വാളിറ്റി മാനേജ്‌മെന്റ് ഗ്രേഡഡ് റെസ്‌പോൺസ് ആക്ഷൻ പ്ലാനിന്റെ (GRAP) സ്റ്റേജ് II ഡൽഹി-എൻസിആർ മേഖലയിൽ നടപ്പാക്കി. ശക്തമായ കാറ്റിന്റെ അഭാവം കാരണം പുക നിറഞ്ഞ ഈ അന്തരീക്ഷം തുടരാൻ സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പ് നൽകി.
അതേസമയം, ഡൽഹിയെ കൂടാതെ രാജ്യത്തെ മറ്റൊരു പ്രധാന നഗരമായ മുംബൈയിലും ഇന്നലെ രാവിലെ മൊത്തത്തിലുള്ള വായു ഗുണനിലവാര സൂചിക (AQI) ഗണ്യമായി ഇടിഞ്ഞു. മുംബൈയിൽ 187 ആണ് AQI രേഖപ്പെടുത്തിയത്. ഒക്ടോബർ 10 ന് മൺസൂൺ പിൻവാങ്ങിയതിനുശേഷം നഗരത്തിൽ രേഖപ്പെടുത്തിയ ഏറ്റവും മോശം അവസ്ഥയാണിത്.