രാജ്യത്ത് ബജറ്റ് സൗഹൃദ സ്മാർട്ട്ഫോണുകളുടെ വിൽപ്പനയിൽ വൻ ഇടിവ് രേഖപ്പെടുത്തി. ഇന്റർനാഷണൽ ഡാറ്റ കോർപ്പറേഷന്റെ (ഐഡിസി) ഏറ്റവും പുതിയ റിപ്പോർട്ട് പ്രകാരം, 2026-ന്റെ ആദ്യ പാദത്തിൽ മുൻ വർഷത്തെ അപേക്ഷിച്ച് 59 ശതമാനത്തിന്റെ കുറവാണ് ഈ വിഭാഗത്തിൽ ഉണ്ടായിരിക്കുന്നത്. ഫോൺ നിർമ്മാണത്തിന് ആവശ്യമായ ഘടകങ്ങളുടെ വില വർധിച്ചതും വിതരണത്തിലെ തടസ്സങ്ങളുമാണ് സാധാരണക്കാർക്ക് പ്രിയപ്പെട്ട കുറഞ്ഞ വിലയുള്ള ഫോണുകളുടെ വിപണിയെ പ്രതികൂലമായി ബാധിച്ചത്.
മൊബൈൽ നിർമ്മാണത്തിന് അത്യന്താപേക്ഷിതമായ റാം, സ്റ്റോറേജ് ചിപ്പുകൾ എന്നിവയുടെ ആഗോളതലത്തിലുള്ള ലഭ്യതക്കുറവാണ് വില വർധനവിന് പ്രധാന കാരണം. നിലവിൽ മെമ്മറി ചിപ്പുകൾ പ്രധാനമായും ആർട്ടിഫിഷ്യൽ ഇന്റലിജൻസ് ഡാറ്റാ സെന്ററുകൾക്കായി വൻതോതിൽ മാറ്റിവെക്കുന്നത് സ്മാർട്ട്ഫോൺ മേഖലയെ പ്രതിസന്ധിയിലാക്കി. ഇതിന്റെ ഫലമായി ഇന്ത്യയിൽ നിലവിലുള്ള സ്മാർട്ട്ഫോൺ മോഡലുകൾക്ക് പോലും 1,000 രൂപ മുതൽ 3,500 രൂപ വരെ വില വർധിച്ചു. പുതിയ ഫോണുകൾ വാങ്ങുന്നതിനേക്കാൾ കൈവശമുള്ള മോഡലുകൾ കൂടുതൽ കാലം ഉപയോഗിക്കാൻ ഉപയോക്താക്കൾ താല്പര്യപ്പെടുന്നതും വിപണിക്ക് തിരിച്ചടിയായി.
സ്മാർട്ട്ഫോൺ നിർമ്മാണച്ചെലവ് ഉയർന്നതോടെ 15,000 രൂപ പരിധിയിൽ 5ജി ഫോണുകൾ ലഭ്യമാക്കുക എന്നത് കമ്പനികൾക്ക് വെല്ലുവിളിയായിരിക്കുകയാണ്. വരും മാസങ്ങളിൽ കുറഞ്ഞ വിലയുള്ള 5ജി ഫോണുകളുടെ പ്രാരംഭ വില 20,000 രൂപയിലേക്ക് ഉയരാനാണ് സാധ്യത. ഈ സാഹചര്യം പുത്തൻ ഫോണുകൾ വാങ്ങുന്നവരുടെ എണ്ണം കുറയ്ക്കുമെങ്കിലും, സെക്കൻഡ് ഹാൻഡ് സ്മാർട്ട്ഫോൺ വിപണിക്ക് വലിയ രീതിയിൽ ഗുണകരമാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ. കുറഞ്ഞ വിലയിൽ 5ജി സൗകര്യമുള്ള ഫോണുകൾ തേടുന്നവർ സെക്കൻഡ് ഹാൻഡ് വിപണിയെ കൂടുതലായി ആശ്രയിക്കാനാണ് സാധ്യത.