സെക്രട്ടേറിയറ്റിന് മുന്നിലെ സനൽ കുമാർ ശശിധരന്റെ നിരാഹാര സമരത്തിനിടെ മഞ്ജു വാര്യർക്ക് പിന്തുണയുമായി കെ.കെ. ശൈലജ രംഗത്ത്. മഞ്ജുവിനെതിരെ സനൽ കുമാർ നടത്തുന്നത് ഹീനമായ അതിക്രമമാണെന്ന് ശൈലജ ആരോപിച്ചു. മലയാളത്തിന്റെ അഭിമാനമായ അഭിനേത്രിമാരിൽ ഒരാളാണ് മഞ്ജുവെന്നും ജീവിതത്തിലെ പ്രതിസന്ധികളെ മാതൃകാപരമായി അതിജീവിച്ച വ്യക്തിയെന്ന നിലയിൽ അവർ നിരവധി പേർക്ക് പ്രചോദനമാണെന്നും ശൈലജ പറഞ്ഞു.
മഞ്ജുവിന്റെ ജീവിതം ‘മാനസിക വിഭ്രാന്തി കാണിക്കുന്ന ഒരു കുറ്റവാളിയുടെ ജല്പനങ്ങൾക്ക്’ വിട്ടുകൊടുക്കാനുള്ളതല്ലെന്നും ഇത്തരക്കാർക്കെതിരെ സർക്കാർ ശക്തമായ നടപടി സ്വീകരിക്കണമെന്നും ശൈലജ ആവശ്യപ്പെട്ടു. മഞ്ജു നടത്തുന്ന നിയമപോരാട്ടങ്ങൾക്ക് എല്ലാ പിന്തുണയും പ്രഖ്യാപിക്കുന്നതായും അവർ വ്യക്തമാക്കി. നേരത്തെ വി. ശിവൻകുട്ടിയും മഞ്ജുവിനെ പിന്തുണച്ച് രംഗത്തെത്തിയിരുന്നു. സെക്രട്ടേറിയറ്റിന് മുന്നിൽ മഞ്ജുവിനെതിരെ നടക്കുന്ന നടപടികളെ അദ്ദേഹം ‘തരംതാണ കോപ്രായങ്ങൾ’ എന്നാണ് വിശേഷിപ്പിച്ചത്.
മഞ്ജു വാര്യർ തടവിലാണെന്നും ഇക്കാര്യത്തിൽ അന്വേഷണം വേണമെന്നും ആവശ്യപ്പെട്ടാണ് സനൽ കുമാർ ശശിധരൻ എട്ട് ദിവസമായി സെക്രട്ടേറിയറ്റിന് മുന്നിൽ നിരാഹാര സത്യാഗ്രഹം നടത്തുന്നത്. താൻ ഉന്നയിക്കുന്ന ആവശ്യങ്ങളിൽ സർക്കാരോ നിയമ സംവിധാനങ്ങളോ നടപടി സ്വീകരിക്കാത്തതിനാലാണ് സമരമെന്നാണ് സംവിധായകന്റെ വിശദീകരണം. ഇതിനിടെ മഞ്ജു വാര്യർ സനൽ കുമാറിനെതിരെ കോടതിയെ സമീപിച്ച് നിയമനടപടി ആരംഭിച്ചു. എന്നാൽ പരാതിയിലെ ഒപ്പ് മഞ്ജുവിന്റേതല്ലെന്നാണ് സനൽ കുമാറിന്റെ പ്രതികരണം.
സംഭവത്തിൽ മഞ്ജു വാര്യരുടെ സഹോദരനും നടനുമായ മധു വാര്യരും പ്രതികരിച്ചിരുന്നു. മഞ്ജുവിനെ കുടുംബം പിന്തുണയ്ക്കുന്നുവെന്ന സന്ദേശവുമായി, സമരത്തെ പരിഹസിച്ചുള്ള ഫേസ്ബുക്ക് കുറിപ്പാണ് അദ്ദേഹം പങ്കുവച്ചത്. മഞ്ജുവിനൊപ്പമുള്ള കുടുംബചിത്രവും പോസ്റ്റിനൊപ്പമുണ്ടായിരുന്നു. അതേസമയം, സനൽ കുമാറിന്റെ ആരോപണങ്ങളും മഞ്ജു വാര്യരുടെ നിയമനടപടികളും സംബന്ധിച്ച വിഷയങ്ങൾ നിലവിൽ നിയമപരമായ നടപടികളുടെ ഭാഗമായാണ് തുടരുന്നത്.